മുസ്ലിം സമുദായത്തിൽ പി കെ കുഞ്ഞാലിക്കുട്ടിക്ക് ഉള്ളതിനേക്കാൾ പിന്തുണ പിണറായി വിജയനുണ്ട്. കാവിക്കാർ വിചാരിച്ചിട്ട് പിണറായി വിജയനെ ഇല്ലാതാക്കൻ കഴിഞ്ഞില്ല. ഇനി പച്ചക്കാർ വിചാരിച്ചാലും അത് നടക്കില്ല. ലീഗിന് ഭരണം നഷ്ടപ്പെട്ടപ്പോൾ തലയ്ക്ക് സൂക്കേട് വന്നു. മുദ്രാവാക്യം വിളിക്കുമ്പോൾ സൂക്ഷിച്ചാൽ മതി- എ കെ ബാലൻ പറഞ്ഞു.
അതേസമയം സർവ്വകലാശാല വൈസ് ചാൻസലർ നിയമന വിഷയത്തിൽ കലക്കവെള്ളത്തിൻ മീൻ പിടിക്കാനാണ് ബിജെപി ശ്രമിക്കുന്നതെന്ന് ബാലൻ ആരോപിച്ചു. ഭരണഘടനാ ബാധ്യത നിർവ്വഹിക്കേണ്ട ഉത്തരവാദിത്വം ഗവർണർക്കും സർക്കാരിനുമാണ്. സ്വതന്ത്ര്യമായ അധികാരത്തെ ബാധിക്കുന്നുവെന്ന കാരണം പറഞ്ഞ് ഭരണഘടനാപരമായ ബാധ്യത നിർവ്വഹിക്കാതിരിക്കാൻ ഗവർണർക്കാവില്ല.
ബാഹ്യമായ ഇടപെടൽ ഭരണ കക്ഷികളുടെ ഭാഗത്തു നിന്നു മാത്രമല്ല, ബിജെപിയുടെ ഭാഗത്തു നിന്നും ഉണ്ടായെന്ന് ഗവർണർ പറഞ്ഞു. അത് ഏത് സാഹചര്യത്തിലെന്ന് വ്യക്തമാക്കണം. ചാൻസലർ പദവി ഭരണഘടനാപരമായ പദവിയല്ല. സർവകലാശാല നിയമങ്ങൾ ലംഘിച്ച് ഒന്നും ചെയ്യാൻ ആവശ്യപ്പെട്ടിട്ടില്ല. വിസിയുടെ നിയമനം നിയമപരമാണെന്ന് ഗവർണറും സമ്മതിച്ചതാണ്. ഇപ്പോൾ നിയമപരമല്ലെന്നു പറയുന്നത് ഗവർണർക്ക് ഗുണകരമാകില്ല. വിഷയത്തിൽ കലക്കവെള്ളത്തിൽ മീൻ പിടിക്കാനുള്ള ബിജെപിയുടെ ശ്രമം വിജയിക്കില്ല. നിലവിലെ പ്രശ്നം ഗവർണറും മുഖ്യമന്ത്രിയും തമ്മിലുള്ള ഏറ്റുമുട്ടലായി കേരളം കാണുന്നില്ലെന്നും എ കെ ബാലൻ പറഞ്ഞു.
