തലശേരി > സംസ്ഥാനത്തെ സഹകാരി പ്രതിഭകൾക്കായി തലശേരി സഹകരണ റൂറൽ ബാങ്ക് ഏർപ്പെടുത്തിയ രണ്ടാമത് ഇ നാരായണൻ സ്മാരക പുരസ്കാരം പ്രമുഖ സഹകാരി പി രാഘവന്. അരലക്ഷം രൂപയും പ്രമുഖ ചിത്രകാരൻ കെ കെ മാരാർ രൂപകൽപന ചെയ്ത ശിൽപവുമടങ്ങുന്നതാണ് പുരസ്കാരം. 21ന് വൈകിട്ട് 3.30ന് സിപിഐ എം കേന്ദ്രകമ്മിറ്റി അംഗം ഇ പി ജയരാജൻ വീട്ടിലെത്തി പുരസ്കാരം കൈമാറുമെന്ന് പുരസ്കാര സമിതി ചെയർമാൻ കാരായി രാജൻ വാർത്താസമ്മേളനത്തിൽ അറിയിച്ചു.
കാസർകോട് ജില്ലയിലെ മുന്നാട് സ്വദേശിയാണ് പി രാഘവൻ (76). സിപിഐ എം കാസർകോട് ജില്ലാ സെക്രട്ടറിയറ്റംഗവും ഉദുമ മുൻ എംഎൽഎയുമാണ്. സഹകരണ പ്രസ്ഥാനത്തിന് അമൂല്യ സംഭാവന നൽകിയ മാതൃക സഹകാരിയാണ്. 25ലേറെ സഹകരണ സംരംഭങ്ങൾക്ക് കാസർകോട് ജില്ലയിൽ തുടക്കംകുറിച്ചു. അസുഖ ബാധിതനാവും വരെ സഹകരണ രംഗത്തും പൊതുപ്രവർത്തനത്തിലും സജീവ സാന്നിധ്യമായിരുന്നു. സിഐടിയു സംസ്ഥാന വൈസ് പ്രസിഡന്റ്, സെക്രട്ടറി, കാസർകോട് ജില്ല പ്രസിഡന്റ്, ജനറൽ സെക്രട്ടറി എന്നീ നിലകളിൽ ദീർഘകാലം പ്രവർത്തിച്ചു.
അഖിലേന്ത്യാ ജനറൽ കൗൺസിലിലും പ്രവർത്തക സമിതിയിലും അംഗമായിരുന്നു. ബേഡകം പഞ്ചായത്ത് പ്രസിഡന്റായിരുന്നു. ഭാര്യ കമല. അജിത്കുമാർ, അരുൺകുമാർ എന്നിവർ മക്കളാണ്. വാർത്താസമ്മേളനത്തിൽ പുരസ്കാര സമിതി കൺവീനറായ ബാങ്ക് പ്രസിഡന്റ് സി വത്സൻ, പുരസ്കാര സമിതി അംഗങ്ങളായ വാഴയിൽ ശശി, ടി ഹരിദാസൻ, കെ വിമോഹനൻ, ബാങ്ക് ജനറൽ മാനേജർ ഇൻചാർജ് സി എം സന്തോഷ്കുമാർ എന്നിവരും പങ്കെടുത്തു.
