കൊച്ചി
യുഡിഎഫ് കാലത്തെ കാലടി സർവകലാശാല വൈസ് ചാൻസലർ ഇപ്പോൾ ബിജെപി സംസ്ഥാന വൈസ് പ്രസിഡന്റ്. ഡോ. കെ എസ് രാധാകൃഷ്ണൻ ആണ് എ കെ ആന്റണി മുഖ്യമന്ത്രി ആയിരുന്നപ്പോൾ കാലടി സംസ്കൃത സർവകലാശാലാ വൈസ്ചാൻസലറും ഉമ്മൻചാണ്ടിയുടെ കാലത്ത് പിഎസ്സി ചെയർമാനുമായത്.
കോൺഗ്രസിന് അക്കാദമിക അടിത്തറ നിർമിക്കാൻ രാധാകൃഷ്ണൻ നടത്തിയ ശ്രമങ്ങൾക്ക് ആന്റണി നൽകിയ ഉപഹാരമായിരുന്നു വൈസ് ചാൻസലർ സ്ഥാനം. 2004 മുതൽ 2008 വരെ വിസിയായി. 2012ൽ ഉമ്മൻചാണ്ടി മുഖ്യമന്ത്രിയായിരിക്കെ കേരള പിഎസ്സിയുടെ ചെയർമാനുമാക്കി.
എറണാകുളം മഹാരാജാസ് കോളേജിൽ ഫിലോസഫി റീഡറായിരുന്ന രാധാകൃഷ്ണൻ, കോൺഗ്രസ് അനുകൂല അധ്യാപകസംഘടനയുടെ സജീവപ്രവർത്തകനായിരുന്നു. രാഷ്ട്രീയത്തിലേക്കില്ലെന്ന തീരുമാനം 2016ൽ മാധ്യമങ്ങളെ അറിയിക്കുകയും കോൺഗ്രസ് സംസ്കാരത്തിൽ അഭിമാനം കൊള്ളുന്നുവെന്ന് പറയുകയും ചെയ്ത രാധാകൃഷ്ണൻ, മൂന്നുവർഷം കഴിഞ്ഞ് ബിജെപിയിൽ ചേർന്നു. ആലപ്പുഴയിൽ ബിജെപിയുടെ ലോക്സഭാ സ്ഥാനാർഥിയുമായി. കഴിഞ്ഞ നിയമസഭാ തെരഞ്ഞെടുപ്പിൽ തൃപ്പൂണിത്തുറയിലും ബിജെപി സ്ഥാനാർഥിയായി.
