പെൺകുട്ടിയുടെ കുടുംബത്തോട് സ്ത്രീധനം ആവശ്യപ്പെട്ടിരുന്നില്ലെന്ന് പ്രതിശ്രുത വരൻ പറഞ്ഞു. കുടുംബത്തിന് സാമ്പത്തിക ബുദ്ധിമുട്ട് ഉള്ളതായി അറിയുമായിരുന്നില്ല. വിവാഹത്തിൽ നിന്നും പിന്മാറില്ലെന്നും വിപിന്റെ മരണാനന്തര ചടങ്ങും പുലയും കഴിഞ്ഞ ശേഷം വിവാഹം നടത്തുമെന്നും അദ്ദേഹം പറഞ്ഞു.
ഗാന്ധിനഗർ കുണ്ടുവാറയിൽ പച്ചാലപ്പൂട്ട് വീട്ടിൽ വിപിൻ (25) ആണ് ബാങ്ക് വായ്പ ലഭിക്കാത്തതിന്റെ വിഷമത്തിൽ ആത്മഹത്യ ചെയ്തത്. സഹോദരിയുടെ വിവാഹം നടത്തുന്നതിന് വിപിൻ പുതുതലമുറ ബാങ്കിൽ വായ്പയ്ക്ക് അപേക്ഷിച്ചിരുന്നു. മൂന്ന് സെന്റ് ഭൂമി മാത്രം ഉള്ളതിനാൽ കുടുംബത്തിന് എവിടെ നിന്നും വായ്പ ലഭിച്ചിരുന്നില്ല.
കഴിഞ്ഞ ദിവസം വായ്പ പാസായെന്ന അറിയിപ്പിനെത്തുടർന്ന് വിപിനും അമ്മയും സഹോദരിയും സ്വർണ്ണം വാങ്ങാൻ ജ്വല്ലറിയിൽ പോയിരുന്നു. ആഭരണം എടുത്ത ശേഷം പണവുമായി വരാമെന്ന് അറിയിച്ച് വിപിൻ പോയി. എന്നാൽ വായ്പ നൽകാൻ കഴിയില്ലെന്നായിരുന്നു ബാങ്കിൽ നിന്നും അറിയിച്ചത്.
ജ്വല്ലറിയിൽ ഏറെ നേരം കാത്തിരുന്നിട്ടും വിപിനെ കാണാതായതോടെ അമ്മ ബേബിയും സഹോദരി വിദ്യയും തിരികെ വീട്ടിൽ എത്തിയപ്പോഴാണ് വിപിനെ മരിച്ച നിലയിൽ കണ്ടെത്തിയത്.
സൂപ്പർമാർക്കറ്റിൽ ജോലി ചെയ്തിരുന്ന വിപിന് കൊവിഡ് ലോക്ക്ഡൗണിനെത്തുട‍ര്‍ന്ന് ജോലി നഷ്ടമായിരുന്നു. കുറച്ചു നാൾ മുമ്പാണ് വിദ്യയുടെ വിവാഹം നിശ്ചയിച്ചത്. അടുത്ത ഞായറാഴ്ചയായിരുന്നു വിവാഹം നടക്കേണ്ടിയിരുന്നത്. ഇതിനിടെയാണ് വിപിന്റെ മരണം.
