കഴിഞ്ഞ ദിവസമായിരുന്നു അപ്രതീക്ഷിതമായി യൂസഫലിയെ കണ്ട ആമിന തന്‍റെ ദുരിതം തുറന്നുപറ‍ഞ്ഞത്. പനങ്ങാട് ഹെലികോപ്റ്റര്‍ അടിയന്തിരമായി നിലത്തിറക്കിയപ്പോള്‍ രക്ഷാപ്രവര്‍ത്തകരായ പ്രദേശവാസികളെ നേരിട്ടു കാണാനായിരുന്നു യൂസഫലി സ്ഥലത്തെത്തിയത്. ഈ സമയത്ത് യൂസഫലി വരുന്ന വിവരമറിഞ്ഞ് ആമിന ഓടിയെത്തുകയായിരുന്നു. ആമിനയുമായി സംസാരിക്കുകയും ‘വിഷമിക്കണ്ട, ജപ്തി ചെയ്യൂല്ലട്ടോ, ഞാന്‍ നോക്കിക്കോളാം’ എന്നു വാക്കു നല്‍കിയ യൂസഫലിയുടെ നിര്‍ദേശ പ്രകാരം ലുലു ഗ്രൂപ്പ് ഉദ്യോഗസ്ഥര്‍ ബാങ്കുമായി ബന്ധപ്പെടുകയായിരുന്നു. വീടിൻ്റെ രേഖകള്‍ ആമിനയ്ക്ക് കൈമാറിയ വിവരം മാതൃഭൂമിയാണ് റിപ്പോര്‍ട്ട് ചെയ്തത്.
Also Read:
യൂസഫലി വിഷയത്തിൽ ഇടപെടാമെന്നും പരിഹരിക്കാമെന്നും വാക്കു നല്‍കിയിരുന്നെങ്കിലും ഇത്ര വേഗം പരിഹാരമാകുമെന്ന് ആമിനയും കരുതിയിരുന്നില്ല. തൊഴിലുറപ്പ് ജോലിയ്ക്ക് പോയ സമയത്തായിരുന്നു ലുലു ഗ്രൂപ്പ് ഉദ്യോഗസ്ഥര്‍ വീട്ടിലെത്തിയത്. ലുലു ഗ്രൂപ്പിൻ്റെ ജീവനക്കാരാണെന്നു പറഞ്ഞെങ്കിലും ആമിനയ്ക്ക് പെട്ടെന്ന് ഇവരെ മനസ്സിലായില്ലെന്നു റിപ്പോര്‍ട്ടിൽ പറയുന്നു. യൂസഫലി അയച്ചതാണെന്നും ബാങ്കിൽ കുടിശികയായി അടയ്കകാനുണ്ടായിരുന്ന തുകയും വായ്പാ തുകയുമായി 3,81,160 രൂപ അടച്ചു തീര്‍ത്തതായും ജീവനക്കാര്‍ അറിയിച്ചു. തുക അടച്ചതിൻ്റെ രസീതും അധികൃതര്‍ ആമിനയ്ക്ക് കൈമാറി.
ലുലു ഗ്രൂപ്പ് മീഡിയ കോര്‍ഡിനേറ്റര്‍ എൻ ബി സ്വരാജ് ആണ് ആമിനയുടെ കൈകളിൽ രേഖകള്‍ ഏൽപിച്ചത്. ഒരു നിമിഷം ആശ്ചര്യപ്പെട്ടു നിന്ന് ആമിനയുടെ കണ്ണുകള്‍ നിറഞ്ഞെന്നും അവര്‍ യൂസഫലിയ്ക്ക് ഹൃദയത്തിൻ്റെ ഭാഷയിൽ നന്ദി പറഞ്ഞെന്നും റിപ്പോര്‍ട്ടിൽ പറയുന്നു. ഇതു കൂടാതെ അര്‍ബുദരോഗബാധിതനായ ആമിനയുടെ ഭര്‍ത്താവ് സെയ്ദ് മുഹമ്മദിനു ചികിത്സാ ആവശ്യങ്ങള്‍ക്കായി 50,000 രൂപയും കൈമാറിയിട്ടുണ്ട്.
Also Read:
മകളുടെ വിവാഹ ആവശ്യത്തിനായിരുന്നു വീടിരിക്കുന്ന സ്ഥലം പണയപ്പെടുത്തി കീച്ചേരി സര്‍വീസ് സഹകരണ ബാങ്കിൽ നിന്ന് ആമിനയുടെ കുടുംബം വായ്പയെടുത്തത്. എന്നാൽ ഭര്‍ത്താവ് സെയ്ദ് മുഹമ്മദിൻ്റെ ചികിത്സയ്ക്കായി പണം നീക്കി വെക്കേണ്ടി വന്നതോടെ വായ്പാ തിരിച്ചടവ് മുടങ്ങുകയായിരുന്നു. ഇതോടെ ഭൂമി ജപ്തി ഭീഷണിയായി. വായ്പാ തുകയായ 2,14,242 രൂപയും പലിശയും പിഴയുമടക്കം 3,81,160 രൂപയാണ് അടയ്ക്കാനുണ്ടായിരുന്നത്. ഈ തുകയാണ് യൂസഫലി അടച്ചു തീര്‍ത്തത്.
