മുല്ലപ്പെരിയാറിൽ യാതൊരു മുന്നറിയിപ്പുമില്ലാതെ തമിഴ്നാട് രാത്രിയിൽ വെള്ളം തുറന്നു വിടുന്ന നടപടിയിൽ ശക്തമായി പ്രതിഷേധിക്കുന്നുവെന്നും ഫേസ്ബുക്ക് പോസ്റ്റിലൂടെ ജോസ് കെ മാണി വ്യക്തമാക്കി. മുല്ലപ്പെരിയാർ വിഷയത്തിൽ അടിയന്തിര ഇടപെടൽ ആവശ്യപ്പെട്ട് പാർലമെൻ്റിനു മുന്നിൽ തോമസ് ചാഴികാടൻ എം പി യോടൊപ്പം ധർണ ആരംഭിച്ചുവെന്നും അദ്ദേഹം പറഞ്ഞു.
മുല്ലപ്പെരിയാര്‍ അണക്കെട്ടില്‍ നിന്ന് രാത്രി വൈകി ജലം തുറന്നു വിടുന്നത് അവസാനിപ്പിക്കണമെന്ന് തോമസ് ചാഴികാടൻ എം പി വ്യക്തമാക്കി. മുല്ലപ്പെരിയാർ വിഷയത്തിൽ തമിഴ്നാട് സർക്കാർ കേരളത്തിലെ ജനങ്ങളോട് ശത്രുത മനോഭാവം അവസാനിപ്പിക്കണം. തമിഴ്നാട് സർക്കാർ അനുകൂല നിലപാട് സ്വീകരിക്കണം. വിഷയം പാർലമെൻ്റിൻ്റെ ശൂന്യവേളയിൽ വിഷയം ഉന്നയിക്കാൻ ശ്രമിക്കുമെന്നും അദ്ദേഹം കൂട്ടിച്ചേർത്തു.
മുന്നറിയിപ്പില്ലാതെ തിങ്കാഴ്ച അർധരാത്രി തമിഴ്നാട് മുല്ലപ്പെരിയാർ അണക്കെട്ട് തുറക്കുകയായിരുന്നു. ഒമ്പത് ഷട്ടറുകളാണ് തമിഴ്നാട് തുറന്നത്. ഇതോടെ കറുപ്പുപാലം, ഇഞ്ചിക്കാട്, ആറ്റോരം, വികാസ് നഗര്‍, വള്ളക്കടവ് പ്രദേശങ്ങളിലാണ് വെള്ളംകയറിയത്. വൻ തോതിൽ വെള്ളം തുറന്നുവിട്ടതോടെ പെരിയാർ തീരത്തെ വീടുകളിൽ വെള്ളം കേറി. സ്ഥലം സന്ദർശിക്കാൻ എത്തിയ മന്ത്രി റോഷി അഗസ്റ്റിനോട് പ്രദേശ വാസികൾ പരാതി പറയുകയും ചെയ്തു. ഞായറാഴ്ച രാത്രി മുന്നറിയിപ്പില്ലാതെ മുല്ലപ്പെരിയാർ ഡാം തമിഴ്നാട് തുറന്നിരുന്നു. അതിന്റെ തുടര്‍ച്ചയായാണ് തിങ്കളാഴ്ചയും അണക്കെട്ട് തുറന്ന് വിട്ടിരിക്കുന്നത്.
മുല്ലപ്പെരിയാർ അണക്കെട്ട് തുറന്ന് വിട്ടതിന് പിന്നാലെ ഇടുക്കി അണക്കെട്ട് നാലാം വട്ടവും തുറന്നിരുന്നു. ഇന്ന് പുലര്‍ച്ചെയാണ് മൂന്നാം നമ്പര്‍ ഷട്ടർ 40 സെന്റീമീറ്റര്‍ ഉയര്‍ത്തിയത്. ജലനിരപ്പ് 2401 അടി പിന്നിട്ടതോടെയാണ് അണക്കെട്ട് തുറക്കാൻ തീരുമാനമായത്. തിങ്കളാഴ്ച ഒരു ദിവസം കൊണ്ട് ജലനിരപ്പിൽ 0.24 അടിയുടെ വര്‍ദ്ധനവാണ് ഉണ്ടായിരിക്കുന്നത്. 141.25 ഘനയടി വെള്ളമാണ് അണക്കെട്ടിൽ നിന്നും പുറത്തേക്ക് ഒഴുക്കുന്നത്.
