വിദ്യാര്‍ഥികള്‍ കിഴക്കോട്ട് തിരിഞ്ഞിരുന്നു പഠിക്കുന്നതാണ് മികച്ച പ്രകടനം നടത്താൻ നല്ല മാര്‍ഗമെന്നും ഇതു സംബന്ധിച്ച് പഠനം നടത്തിയ ഹാര്‍വാര്‍ഡ് സര്‍വകലാശാല വൃത്താകൃതിയിൽ നിര്‍മിച്ച ഹോസ്റ്റൽ പൊളിച്ചു കളഞ്ഞ് എല്ലാ കുട്ടികള്‍ക്കും കിഴക്കോട്ട് തിരിഞ്ഞിരുന്നു പഠിക്കാൻ സാധിക്കുന്ന തരത്തിലുള്ള ഹോസ്റ്റൽ സര്‍വകലാശാല നിര്‍മിച്ചെന്നുമാണ് ഇപ്പോള്‍ വൈറലാകുന്ന പ്രസംഗത്തിൽ അലക്സാണ്ടര്‍ ജേക്കബ് പറയുന്നത്. ഈ വീഡിയോ ശ്രദ്ധയിൽപ്പെട്ട പ്ലസ് ടു വിദ്യാര്‍ഥിയായ അഭിറാം ഹാര്‍വാര്‍ഡ് സര്‍വകലാശാലയിലെ ചരിത്രവിഭാഗത്തെ നേരിട്ട് ബന്ധപ്പെടുകയായിരുന്നു. എന്നാൽ ഇത്തരത്തിലുള്ള ഒരു സംഭവം ശ്രദ്ധയിൽപ്പെട്ടിട്ടില്ലെന്ന് സര്‍വകലാശാല മറുപടി നല്‍കിയതോടെ ഇക്കാര്യങ്ങള്‍ ചൂണ്ടിക്കാട്ടി അഭിറാം ‘ഒരു ഹാര്‍വാര്‍ഡ് അപാരത’ എന്ന പേരിൽ ശാസ്ത്രകേരളം മാസികയിൽ ലേഖനമെഴുതുകയായിരുന്നു. ഇതു വാര്‍ത്തയായതിനു പിന്നാലെയാണ് അലക്സാണ്ടര്‍ ജേക്കബിൻ്റെ പ്രതികരണം.
Also Read:
എന്നാൽ പ്രസംഗത്തിനിടെ പറഞ്ഞ സംഭവം വിവരിച്ചത് മറ്റൊരാളാണെന്നും ഇക്കാര്യം താൻ ഉദ്ധരിക്കുക മാത്രമാണുണ്ടായതെന്നും അലക്സാണ്ടര്‍ ജേക്കബ് പറഞ്ഞു. ഒരു സന്യാസി ന്യൂയോര്‍ക്കിൽ വെച്ചു നടത്തിയ പ്രസംഗമാണ് താൻ ഉദ്ധരിച്ചത്. താൻ യൂട്യൂബിൽ കണ്ട പ്രസംഗമാണിതെന്നും സന്യാസിവര്യൻ കള്ളം പറയുമെന്ന് കരുതിയില്ലെന്നും അലക്സാണ്ടര്‍ ജേക്കബ് പറഞ്ഞു. ഒരു പക്ഷെ സൈക്കോളജി വിഭാഗം നടത്തിയ പഠനത്തെപ്പറ്റി തങ്ങള്‍ക്ക് അറിയില്ലെന്ന് ചരിത്രവിഭാഗം മറുപടി നല്‍കുകയായിരിക്കാം ചെയ്തതെന്നും അലക്സാണ്ടര്‍ ജേക്കബ് പറഞ്ഞു.
താനൊരു ടെലിവിഷൻ ചാനലിൻ്റെ പരിപാടിയിൽ പങ്കെടുത്തതിൻ്റെ പേരിലാണ് തനിക്കെതിരെ പ്രചാരണം ഉണ്ടാകുന്നതെന്നും ചാനലുമായുള്ള തര്‍ക്കത്തിലേയ്ക്ക് തന്നെ വലിച്ചിടേണ്ട കാര്യമില്ലെന്നും മുൻ ഡിജിപി വ്യക്തമാക്കി. പ്രശ്നം ഹാര്‍വാര്‍ഡ് അല്ലെന്നും കേരളത്തിലെ തകര്‍ന്ന റോഡുകളും പ്രളയവുമാണ് സോഷ്യൽ മീഡിയ ചര്‍ച്ച ചെയ്യേണ്ടതെന്നും മുൻ ഡിജിപി പറഞ്ഞു.
Also Read:
ഹാര്‍വാര്‍ഡ് യൂണിവേഴ്സിറ്റിയിൽ ഗവേഷണത്തിൻ്റെ ഭാഗമായി വൃത്താകൃതിയിൽ ഒരു ഹോസ്റ്റലുണ്ടാക്കിയ ശേഷം കുട്ടികളെ 16 ദിശകളിലേയ്ക്ക് തിരിച്ചിരുത്തിയ ശേഷം പഠിക്കാൻ പറയുകയായിരുന്നുവെന്നാണ് ഡിജിപി പ്രസംഗത്തിൽ അവകാശപ്പെടുന്നത്. ആറു മാസത്തെ പഠനത്തിനു ശേഷം പരിശോധിച്ചപ്പോള്‍ തെക്കോട്ടു തിരിഞ്ഞിരുന്നു പഠിച്ച കുട്ടികളുടെ മാര്‍ക്ക് 15 ശതമാനം കുറവാണെന്നു കണ്ടെന്നും കിഴക്കോട്ട് തിരിഞ്ഞിരുന്നു പഠിച്ച കുട്ടികളുടെ മാര്‍ക്ക് 15 ശതമാനം വര്‍ധിച്ചതായും ഗവേഷകര്‍ കണ്ടെത്തിയെന്നായിരുന്നു അലക്സാണ്ടര്‍ ജേക്കബിൻ്റെ അവകാശവാദം. “ഹാർവാർഡ് യൂണിവേഴ്സിറ്റിയിലെ ശാസ്ത്രജ്ഞർമാർ വൈസ് ചാൻസലർക്ക് റിപ്പോർട്ട് ചെയ്തു. വൈസ് ചാൻസലറോട് പറഞ്ഞു, ആ ഹോസ്റ്റൽ ഇടിച്ചു നിരത്താൻ. ആ ഹോസ്റ്റൽ ഇടിച്ചു നിരത്തി, എല്ലാവരും കിഴക്കോട്ട് തിരിഞ്ഞിരുന്ന് പഠിക്കുന്ന ഒരു ഹോസ്റ്റൽ പുനർനിർമ്മിച്ചു.” അലക്സാണ്ടർ ജേക്കബ് പറഞ്ഞു.
എന്നാൽ ഈ പരാമർശങ്ങളിൽ സംശയം തോന്നിയ കൊല്ലം കാരംകോട് വിമല സെൻട്രൽ സ്കൂൾ വിദ്യാർഥി ഇക്കാര്യത്തിൽ ഹാർവാഡ് സർവകാശാലയുമായി നേരിട്ട് ബന്ധപ്പെട്ട് നിജസ്ഥിതി അന്വേഷിക്കുകയായിരുന്നു. ഇങ്ങനെയൊരു കാര്യം ശ്രദ്ധയിൽ പെട്ടിട്ടില്ലെന്നും ചരിത്രപ്രാധാന്യമുള്ള കെട്ടിടങ്ങളെല്ലാം സംരക്ഷിക്കുന്ന നിലപാട് മാത്രമാണ് സ‍ര്‍വകലാശാലയ്ക്ക് ഉള്ളതെന്നും വൃത്താകൃതിയിലുള്ള ഒരു ഹോസ്റ്റൽ തങ്ങൾക്കില്ലെന്നും സ‍ര്‍വകാലാശാല മറുപടി നല്‍കി. ഇക്കാര്യങ്ങളായിരുന്നു അഭിറാം ലേഖനത്തിൽ എഴുതിയത്.
