അയ്യായിരത്തി ഇരുന്നൂറ് വോട്ടർമാരുള്ള സംഘത്തിൽ എട്ടു വീതം പേരെയാണ് ഡയറക്ടർ ബോർഡ് സ്ഥാനത്തേക്ക് ഇരു വിഭാഗവും മത്സരിപ്പിച്ചത്. കെ സുധാകരൻ ഗുണ്ടകളെ ഇറക്കി തെരഞ്ഞെടുപ്പ് അട്ടിമറിക്കാൻ ഇടയുണ്ടെന്ന മമ്പറം ദിവാകരന്റെ ആക്ഷേപത്തെ തുടർന്ന് തെരഞ്ഞെടുപ്പ് നടന്ന മമ്പറം ഇന്ദിര ഗാന്ധി സ്കൂളിൽ കനത്ത സുരക്ഷയാണ് ഏർപ്പെടുത്തിയിരുന്നത്. രാവിലെ പത്ത് മുതൽ വൈകിട്ട് നാല് വരെയായിരുന്നു വോട്ടിങ് നിശ്ചയിച്ചത്. എന്നാൽ ഇത് ആറര വരെ നീണ്ടു- ഏഷ്യാനെറ്റ് ന്യൂസ് റിപ്പോർട്ട് ചെയ്തു.
പാർട്ടി അച്ചടക്കം ലംഘിച്ചതിന് മമ്പറം ദിവാകരനെ കോൺഗ്രസിൽ നിന്നും പുറത്താക്കിയിരുന്നു. കെപിസിസി പ്രസിഡന്റ് കെ സുധാകരനുമായി ഒരു പതിറ്റാണ്ടിലേറെയായി തുടരുന്ന തർക്കമാണ് പുറത്താക്കലിൽ കലാശിച്ചത്.
1992 ൽ എൻ രാമകൃഷ്ണനെ പുറത്താക്കി കണ്ണൂർ ഡിസിസി പിടിക്കാൻ കെ സുധാകരനെ സഹായിച്ചത് മമ്പറം ദിവാകരനായിരുന്നു. എന്നാൽ പിന്നീട് ഇവർ തമ്മിൽ തർക്കം ഉടലെടുക്കുകയും ബന്ധം വഷളാകുകയുമായിരുന്നു. പാർട്ടിയിൽ നിന്നും പുറത്താക്കിയെങ്കിലും എളുപ്പത്തിൽ വിജയിക്കാമെന്നായിരുന്നു മമ്പറം ദിവാകരന്റെ ആത്മവിശ്വാസം. തെരഞ്ഞെടുപ്പിൽ പരാജയപ്പെട്ട ദിവാകരൻ ഇനി എവിടേക്ക് ചേക്കേറുമെന്ന് ഉറ്റു നോക്കുകയാണ് കണ്ണൂർ.
അതേസമയം 1992 ൽ കെ സുധാകരൻ ഡിസിസി പ്രസിഡന്റ് ആയതിനു ശേഷമാണ് ക്രൂരമായ അക്രമ രാഷ്ട്രീയം കണ്ണൂരിൽ അരങ്ങേറിയതെന്ന് മമ്പറം ദിവാകരൻ കഴിഞ്ഞ ദിവസം പറഞ്ഞിരുന്നു. മാതൃഭൂമി ന്യൂസിൽ ചർച്ചയ്ക്കിടെയായിരുന്നു അദ്ദേഹത്തിന്റെ പ്രതികരണം. അന്ധമായ കമ്മ്യൂണിസ്റ്റ് വിരോധം മാത്രമാണ് കേരളത്തിലെ കോൺഗ്രസ് പ്രവർത്തകർക്ക് ഉള്ളത്. കമ്യൂണിസ്റ്റ് വിരോധം വെച്ചുകൊണ്ട് കണ്ണൂരിലെ പ്രവർത്തകരെ ഇനിയും ബലിയാടാക്കരുതെന്ന് ദിവാകരൻ പറഞ്ഞു.
കണ്ണൂരിൽ ഡസൺ കണക്കിന് കോൺഗ്രസ് പ്രവർത്തകർ കൊല്ലപ്പെട്ടിട്ടുണ്ട്. അവരുടെ കുടുംബത്തെ സംരക്ഷിക്കാനുള്ള ചുമതല കെ സുധാകരനുണ്ട്. എന്നാൽ ഏത് രക്തസാക്ഷി കുടുംബത്തെയാണ് സുധാകരൻ സഹായിച്ചിട്ടുള്ളതെന്ന് ദിവാകരൻ ചോദിച്ചു.
