കൊച്ചി: തൃക്കാക്കര നഗരസഭയിൽ ഭരണ-പ്രതിപക്ഷാംഗങ്ങൾ തമ്മിൽ കൂട്ടത്തല്ല്. നഗരസഭാധ്യക്ഷയുടെ മുറിയുടെ പൂട്ട് നന്നാക്കാൻ ചെലവായ തുകയെച്ചൊല്ലിയായിരുന്നു കൂട്ടയടി. പൂട്ട് നന്നാക്കാൻ ചെലവായ തുക നഗരസഭ വഹിക്കണമെന്ന ആവശ്യത്തെ പ്രതിപക്ഷം എതിർത്തതോടെ കൗൺസിൽ യോഗം സംഘർഷത്തിൽ കലാശിക്കുകയായിരുന്നു. പരിക്കേറ്റ ഭരണ-പ്രതിപക്ഷ കൗൺസിലർമാർ വിവിധ ആശുപത്രികളിൽ ചികിത്സ തേടി.
നേരത്തെ പണക്കിഴി വിവാദത്തെച്ചൊല്ലി നടന്നസമരങ്ങൾക്കിടെയാണ് മുറിയുടെ പൂട്ട് തകർന്നത്. ഈ പൂട്ട് ശരിയാക്കാൻ എണ്ണായിരം രൂപ ചെലവായെന്ന് നഗരസഭാധ്യക്ഷ അജിത തങ്കപ്പൻ കൗൺസിലർമാരെ അറിയിച്ചു. ഈ തുക നഗരസഭയുടെ കണക്കിൽ എഴുതണമെന്നും പറഞ്ഞു. ഇതോടെ ഇടത് കൗൺസിലർമാർ പ്രതിഷേധവുമായി രംഗത്തെത്തുകയായിരുന്നു.
വിജിലൻസ് പൂട്ടിയ മുറിയുടെ പൂട്ട് തകർത്തത് കോൺഗ്രസ് കൗൺസിലർമാരാണെന്നും അതിന് ചെലവായ തുക നഗരസഭയുടെ കണക്കിൽപ്പെടുത്താൻ കഴിയില്ലെന്നുമായിരുന്നു പ്രതിപക്ഷത്തിന്റെ വാദം. തുടർന്ന് ഭരണ-പ്രതിപക്ഷ അംഗങ്ങൾ തമ്മിൽ വാക്കേറ്റമുണ്ടാവുകയും കൂട്ടത്തല്ലിൽ കലാശിക്കുകയുമായിരുന്നു.
പ്രതിപക്ഷ കൗൺസിലർമാർ തന്നെ ക്രൂരമായി മർദിച്ചെന്നാണ് അധ്യക്ഷയായ അജിത തങ്കപ്പന്റെ ആരോപണം. ഡയസിൽ കയറിവന്നാണ് അടിച്ചതെന്നും അടിയേറ്റ് നിലത്തുവീണെന്നും അധ്യക്ഷ പറഞ്ഞു. അതേസമയം, ഭരണപക്ഷത്തെ കൗൺസിലർമാർ മർദിച്ചെന്ന് പ്രതിപക്ഷവും ആരോപിച്ചു.
Content Highlights:clash in thrikkakara municipality council meeting
