കൊറോണ പ്രതിസന്ധിയെത്തുടർന്ന് സ്കൂൾ അടച്ചിട്ട് ഒരു വർഷം പൂർത്തിയായ 2021 മെയ്, ജൂൺ മാസങ്ങളിലാണ് സർവ്വേ നടത്തിയത്. 14 ജില്ലകളിൽ നിന്നായി 321 അധ്യാപകരാണ് സർവ്വേയിൽ പങ്കെടുത്തത്. ക്ലാസ് മുറിയിൽ നിന്നും ഓൺലൈൻ അധ്യാപനത്തിലേക്കുള്ള മാറ്റം, ജോലിയും വീട്ടു ജോലിയും ഒന്നിച്ചു കൊണ്ടുപോകാനുള്ള ബുദ്ധിമുട്ട്, ജോലിയിലെ ആത്മസംതൃപ്തി, ആത്മഹത്യാ പ്രവണത തുടങ്ങിയവയാണ് പഠനത്തിന് വിധേയമാക്കിയത്.
സ്വകാര്യ-സ‍ര്‍ക്കാര്‍ സ്കൂളുകളിൽ പഠിപ്പിക്കുന്ന അധ്യാപകരാണ് സര്വ്വേയിൽ പങ്കെടുത്തത്. ഇതിൽ 76 ശതമാനം പേര്‍ക്ക് നല്ല തോതിൽ സമ്മര്‍ദ്ദമുണ്ട് എന്നാണ് കണ്ടെത്തൽ. 2.2 ശതമാനം പേ‍ര്‍ക്കാണ് താങ്ങാനാവാത്ത മാനസിക സമ്മര്‍ദ്ദമുള്ളത്. 10 ശതമാനം പേര്‍ ആത്മഹത്യയെക്കുറിച്ച് ചിന്തിച്ചു. 2.2 ശതമാനം പേരാണ് ആത്മഹത്യയെക്കുറിച്ച് ചിന്തിക്കുകയും മരിക്കാൻ ആഗ്രഹിക്കുകയും ചെയ്തത്. 0.6 ശതമാനം പേര്‍ മരിക്കാനാഗ്രഹിക്കുകയും ആത്മഹത്യക്ക് ശ്രമിക്കുകയും ചെയ്തു. കൂടാതെ വിവരം അറിയിച്ച ശേഷം 2.5 ശതമാനം അധ്യാപര്‍ ആത്മഹത്യക്ക് ശ്രമിച്ചെന്നും സര്വ്വേയിൽ പറയുന്നു. സര്വ്വേയിൽ പങ്കെടുത്തവരിൽ 85.7 പേരും സ്ത്രീകളാണ്-മാതൃഭൂമി റിപ്പോ‍ര്‍ട്ട് ചെയ്തു.
അധ്യാപകരിൽ മാനസികാരോഗ്യ ശേഷി വര്‍ദ്ധിപ്പിക്കാനുള്ള പരിശീലനങ്ങളും പദ്ധതികളും നടപ്പാക്കണമെന്നാണ് നിംഹാൻസ് നി‍ര്‍ദ്ദേശിക്കുന്നത്. നിംഹാൻസിലെ സെന്റര്‍ ഫോര്‍ സൈക്കോ സോഷ്യൽ സപ്പോര്‍ട്ട് ഇൻ ഡിസാസ്റ്റര്‍ മാനേജ്മെന്റ് ഫെലോഷിപ്പ് വിദ്യാ‍ര്‍ത്ഥികളായ സോനു പി രാജു, അനിൽ ദൊഡ്ഡമണി, കെവൈ ഷഫീഖ്, ഗവേഷണ വിദ്യാ‍ര്‍ത്ഥി കെ എ തൻസ, അസി പ്രൊഫസർ ഡോ സഞ്ജീവ് കുമാർ മണികപ്പ, സീനിയ‍ര്‍ ടെക്‌നിക്കൽ കൺസൽട്ടന്റ് ഡോ ശേഖർ കാശി എന്നിവരാണ് പഠനം നടത്തിയത്.
(ശ്രദ്ധിക്കുക: ആത്മഹത്യ ഒന്നിനും പരിഹാരമല്ല. മാനസികാരോഗ്യ വിദഗ്ധരുടെ സഹായം തേടുക, അതിജീവിക്കാന്‍ ശ്രമിക്കുക)
