‘കാസ’ കരുതുന്നു: ക്രിസ്ത്യാനികൾ അവഗണിക്കപ്പെടുകയാണ്

ഹിന്ദുത്വ സംഘടനകൾ ഉയർത്തിക്കൊണ്ടുവന്ന ‘ഹലാൽഭക്ഷണം’, ‘ലവ് ജിഹാദ്’ തുടങ്ങിയ നിരവധിയായ വിഷയങ്ങൾ കാസയ്ക്ക് പിന്നാലെ ഇപ്പോൾ കേരളത്തിലെ മുഖ്യധാരാ പാർട്ടികളും സംഘടനകളും ചർച്ച ചെയ്യുകയാണ്. ലവ് ജിഹാദിനൊപ്പം നാർക്കോട്ടിക്ക് ജിഹാദുമുണ്ടെന്ന പാലാ ബിഷപ്പ് മാർ ജോസഫ് കല്ലറങ്ങാട്ടിലിന്റെ സെപ്റ്റംബറിലെ പ്രസ്താവനയും വ്യാപകമായ ചർച്ചകൾക്ക് വഴിവെച്ചിരുന്നു. ബിഷപ്പിനെ അനുകൂലിച്ചും എതിർത്തും നിരവധി പേർ രംഗത്തെത്തി.

വർഗീയ പരാമർശം നടത്തിയ ബിഷപ്പിനെ അറസ്റ്റ് ചെയ്യണമെന്നാണ് മുസ്ലീം സംഘടനകൾ ആവശ്യപ്പെട്ടത്. എന്നാൽ, ബിഷപ്പിന് പിന്തുണ പ്രഖ്യാപിച്ച് കാസയുടെ നേതൃത്വത്തിലും പ്രകടനം നടന്നു. ന്യൂനപക്ഷ സ്‌കോളർഷിപ്പിൽ ക്രിസ്ത്യാനികൾ അവഗണിക്കപ്പെടുന്നുവെന്ന് ആരോപിച്ച് ക്ലബ് ഹൗസിൽ ചിലർ നടത്തിയ ചർച്ചകളിൽ വർഗീയ പരാമർശങ്ങളുണ്ടായെന്നും റിപ്പോർട്ടുകളുണ്ടായിരുന്നു. പല ആരോപണങ്ങളും കാസയ്ക്ക് എതിരെയാണ് ഉയർന്നത്. ഈ പശ്ചാത്തലത്തിലാണ് വിവാദങ്ങളിൽ വ്യക്തത തേടി
സമയം പ്ലസ് കാസ സംസ്ഥാന പ്രസിഡന്റ് കെവിൻ പീറ്ററുമായി സംസാരിക്കുന്നത്.

ചോദ്യം:
കേരളത്തിൽ ക്രിസ്ത്യാനികൾക്ക് ശക്തമായ സഭകളും രാഷ്ട്രീയാധികാരത്തിൽ പങ്കാളിത്തവുമുണ്ട്. എന്നിട്ടും എന്തിനാണ് ‘കാസ’ രൂപീകരിച്ചത്?

കെവിൻ പീറ്റർ: ഇറാഖിൽ സദ്ദാംഹുസൈനെ തൂക്കിക്കൊന്നതിൽ പ്രതിഷേധിച്ച് 2007 ജനുവരി ഒന്നിന് കേരളത്തിൽ ഹർത്താൽ നടന്നിരുന്നുവെന്ന കാര്യം ഓർമയുണ്ടാവുമെന്ന് കരുതുന്നു. ആ ഹർത്താലിൽ പ്രശസ്തമായ കൊച്ചിൻ കാർണിവൽ അടക്കമുള്ള പരിപാടികൾ തടസപ്പെട്ടു. തുടർന്ന് ക്രിസ്ത്യൻ വിശ്വാസികൾ ചേർന്ന് കാർണിവൽ പൈതൃക സംരക്ഷണ സമിതി രൂപീകരിച്ചു. കേരളത്തിൽ ക്രിസ്ത്യൻ വിശ്വാസവും ആചാരങ്ങളുമെല്ലാം സംരക്ഷിക്കാൻ പ്രത്യേക പ്രവർത്തനം വേണമെന്ന ചിന്തയിലാണ് 2008ൽ ‘കാസ’ രൂപീകരിച്ചത്.

പ്രവർത്തനം തുടങ്ങി അൽപ്പകാലത്തിന് ശേഷം ഞങ്ങളുടെ പ്രവർത്തകനായ ഡൊമിനിക് ഫോർട്ട്കൊച്ചി മണപ്പാട് നടന്ന ഒരു വർഗീയ സംഘർഷത്തിൽ കൊല്ലപ്പെട്ടു. കൊലയാളികളെ സംരക്ഷിക്കാൻ ശ്രമിച്ച വി.കെ ഇബ്രാഹിം കുഞ്ഞ് അടക്കമുള്ളവർക്കെതിരെ ഞങ്ങൾ ശക്തമായി പ്രതിഷേധിച്ചു. കാസയുടെ ഇപ്പോഴത്തെ എറണാകുളം ജില്ലാ പ്രസിഡന്റായ ഡെറിസൺ ആന്റണിയടക്കമുള്ളവർ പ്രതിഷേധ കേസുകളിൽ പ്രതിയായി ജയിലിൽ അടക്കപ്പെട്ടു. 2012 ആയതോടെ ക്രമേണ സംഘടന നിർജീവമായി.

വർഷങ്ങൾക്കിപ്പുറം, ക്രിസ്ത്യൻ പെൺകുട്ടികളെ ‘ലവ് ജിഹാദിന്’ ഇരയാക്കുന്നത് തടയാൻ 2016ൽ ക്രിസ്ത്യൻ ഹെൽപ്പ്ലൈൻ (സി.എച്ച്.എൽ) രൂപീകരിച്ചു. ഇപ്പോഴത്തെ നമോ ടി.വിയുടെ ഉടമയായ രഞ്ജിത് ടി.എബ്രഹാമാണ് പ്രവർത്തനത്തിന് നേതൃത്വം നൽകിയത്. ന്യൂനപക്ഷ മോർച്ചയുടെ ഭാഗമായിരുന്ന രഞ്ജിത് ക്രിസ്ത്യൻ ഹെൽപ്പ്ലൈനിനെ ബി.ജെ.പിയുടെ പോഷക സംഘടന പോലെയാക്കി മാറ്റാൻ ശ്രമിച്ചതോടെ എറണാകുളത്തെ പ്രവർത്തകർ പിൻമാറി. അവരാണ് 2019ൽ പഴയ ‘കാസയെ’ പുനസംഘടിപ്പിക്കാൻ തീരുമാനിച്ചത്.

ചോദ്യം: കേരളത്തിൽ ഏതൊക്കെ വിഭാഗം ക്രിസ്ത്യാനികളാണ് കാസയിൽ ചേരുന്നത് ?

കെവിൻ പീറ്റർ: കേരളത്തിലെ ‘യഹോവാ സാക്ഷികൾ’ ഒഴിച്ചുള്ള 17 സഭകളിൽ നിന്നും റീത്തുകളിൽ നിന്നും കാസക്ക് പ്രവർത്തകരുണ്ട്. സവർണരെന്നോ ദലിതരെന്നോ സംഘടന വിവേചനം കാണിക്കുന്നില്ല. 45 വയസിന് താഴെയുള്ള ഇടത്തരക്കാരായ ബിസിനസുകാരും ജോലിക്കാരുമാണ് കാസയിൽ കൂടുതലായും അംഗത്വമെടുക്കുന്നത്. എറണാകുളത്ത് ചിറ്റൂർ റോഡിലാണ് സംഘടനയുടെ സംസ്ഥാനകമ്മിറ്റി ഓഫീസ് പ്രവർത്തിക്കുന്നത്.

സമുദായ താൽപര്യം സംരക്ഷിക്കാൻ ആത്മസമർപ്പണം ചെയ്ത 3000 പ്രവർത്തകരാണ് കേരളത്തിൽ കാസയുടെ പ്രധാന ശക്തി. കൂടാതെ നിരവധി അനുഭാവികളുമുണ്ട്. വിദേശത്ത് ഏകദേശം 1000ത്തോളം പ്രവർത്തകരും ഉണ്ട്. ഓസ്ട്രേലിയ, ന്യൂസിലാൻഡ്, കാനഡ, ഇസ്രായേൽ, തുടങ്ങിയ രാജ്യങ്ങളിൽ കാസക്ക് യൂണിറ്റുകളുണ്ട്.

യൂറോപ്പിനായി പ്രത്യേക സമിതിയും രൂപീകരിച്ചു കഴിഞ്ഞു. കേരളത്തിൽ പത്തനംതിട്ട, തിരുവനന്തപുരം എന്നീ ജില്ലകൾ ഒഴിച്ച് എല്ലായിടത്തും ജില്ലാകമ്മിറ്റികളുണ്ട്. സംഘടനയിൽ ഒരാൾക്ക് അംഗത്വം നൽകുന്നതിന് മുമ്പ് അയാളുടെ പശ്ചാത്തലവും സോഷ്യൽ മീഡിയ ഉപയോഗവും കർശനമായി നിരീക്ഷിക്കും. മതഭ്രാന്തുള്ളവരെയും മോശം സ്വഭാവമുള്ളവരെയും സംഘടനയിൽ ചേർക്കാറില്ല.

ചോദ്യം: കേരളത്തിൽ ക്രിസ്ത്യാനികൾ പ്രത്യേകിച്ചെന്തെങ്കിലും വെല്ലുവിളികൾ നേരിടുന്നുണ്ടോ?

കെവിൻ പീറ്റർ: കേരളത്തിൽ ന്യൂനപക്ഷങ്ങൾക്കുള്ള ആനുകൂല്യങ്ങളിൽ ക്രിസ്ത്യാനികൾക്ക് വേണ്ടത്ര പ്രാതിനിധ്യം ലഭിക്കുന്നില്ലെന്നാണ് കാസ വിലയിരുത്തിയിട്ടുള്ളത്. ന്യൂനപക്ഷ സ്‌കോളർഷിപ്പിലെ 80:20 പ്രശ്നം തന്നെ നോക്കൂ. മറ്റേതെങ്കിലും ന്യൂനപക്ഷ സമുദായങ്ങൾക്ക് ലഭിക്കുന്ന ആനുകൂല്യങ്ങൾ ഇല്ലാതാക്കണമെന്ന് ഒരിക്കലും കാസ ആഗ്രഹിക്കുന്നില്ല. പക്ഷെ, ക്രിസ്ത്യാനികളുടെ ഭരണഘടനാപരമായ അവകാശങ്ങൾ സംരക്ഷിക്കപ്പെടണം.

കേരളത്തിലെ രാഷ്ട്രീയ-അധികാര സംവിധാനത്തിന്റെ അവഗണന മൂലം കൃഷി, വ്യാപാരം തുടങ്ങി എല്ലാ മേഖലകളിലും ക്രിസ്ത്യാനികൾക്ക് താൽപര്യം നശിച്ചിരിക്കുകയാണ്. സമുദായം ഒറ്റപ്പെട്ടതും അവഗണിക്കപ്പെട്ടതുമായ അവസ്ഥയിലായതുമാണ് ഇതിനുള്ള പ്രധാന കാരണങ്ങളിലൊന്ന്. ഇതെല്ലാം മൂലം ചില വിഭാഗങ്ങളിലെ യുവാക്കൾക്ക് വിവാഹം കഴിക്കാൻ പെൺകുട്ടികളെ ലഭിക്കാത്ത അവസ്ഥയും രൂപപ്പെട്ടിട്ടുണ്ട്. എങ്ങനെയെങ്കിലും രാജ്യം വിട്ടു പോയാൽ മതിയെന്നാണ് പല ക്രിസ്ത്യൻ യുവാക്കളുടെയും ആഗ്രഹം.

മലയോര മേഖലയിൽ മലഞ്ചരക്ക് അടക്കമുള്ള വ്യാപാരത്തിന്റെ നേട്ടങ്ങളെല്ലാം ഇതരസമുദായക്കാരായ ഇടനിലക്കാർ കൊണ്ടുപോവുകയാണ്. മൽസ്യബന്ധന മേഖലയിലെ തരകൻമാരിൽ വലിയൊരു വിഭാഗം പണ്ട് ക്രിസ്ത്യാനികളായിരുന്നു. ഇന്ന് ആയിരത്തിൽ നൂറു പേരേ ക്രിസ്ത്യാനികളായി ഉണ്ടാവൂ. ബാക്കിയിൽ ഭൂരിഭാഗവും മറ്റൊരു വിഭാഗത്തിൽ നിന്നുള്ളവരാണ്. കേരളത്തിന്റെ മലയോരമേഖലയിലെയും തീരദേശമേഖലയിലെയും ഇടത്തരക്കാരുടെ ചൂഷണം ക്രിസ്ത്യൻ സമുദായത്തെയും കുടുംബങ്ങളെയും തകർത്തിരിക്കുകയാണ്.

ചോദ്യം: ‘ലവ് ജിഹാദിനെതിരെ’ കാസ നിരന്തരമായി ക്യാമ്പയിൻ നടത്തുന്നതായി കാണുന്നു. എന്താണ് ഇതിന്റെ വസ്തുത?

കെവിൻ പീറ്റർ: 2010ന് ശേഷം വിവിധ ക്രിസ്ത്യൻ സഭകളിൽ നിന്നുള്ള 20000 പെൺകുട്ടികൾ ‘ലവ് ജിഹാദിന്’ ഇരയായിട്ടുണ്ടെന്നാണ് ഞങ്ങൾ വിലയിരുത്തുന്നത്. ഇതിൽ 15000 പെൺകുട്ടികളെങ്കിലും തീരുമാനങ്ങൾ തെറ്റായിരുന്നു എന്നു കരുതി ജീവിക്കുന്നവരാണ്. ഇവരെയെല്ലാം ക്രിസ്തുമത വിശ്വാസത്തിലേക്ക് തിരികെ കൊണ്ടുവരൽ കാസയുടെ പ്രധാന ലക്ഷ്യങ്ങളിലൊന്നാണ്.

ഓരോ ആഴ്ച്ചയും പത്തോ പതിനഞ്ചോ ഹേബിയസ് കോർപസ് ഹർജികളാണ് ഹൈക്കോടതി പരിഗണിക്കുന്നത്. പെൺകുട്ടികൾക്ക് പ്രായപൂർത്തിയായെന്ന് ചൂണ്ടിക്കാട്ടി അവരെ സ്വന്തം ഇഷ്ടത്തിന് വിടുകയാണ് കോടതി ചെയ്യുന്നത്. ബാലരാമപുരത്തെ കേസായാലും കാസർകോട് ഉപ്പളയിലെ കേസായാലും പ്രണയം നടിക്കുന്നവർക്ക് പിന്നിൽ സംഘടിത ശക്തികളുണ്ടെന്നാണ് ഞങ്ങൾ ഉറച്ചു വിശ്വസിക്കുന്നു.

കേരളത്തിലെ ‘ലവ് ജിഹാദിനെ’ കുറിച്ച് കേരള കൗമുദി പ്രസിദ്ധീകരിച്ച റിപ്പോർട്ടുകൾ അടങ്ങിയ പുസ്തകങ്ങളുടെ അഞ്ച് ലക്ഷം കോപ്പികളാണ് ചിലർ വാങ്ങി നശിപ്പിച്ചത് ഇതിനുള്ള തെളിവുകളിൽ ഒന്നാണ്. ദരിദ്രരായ പല പ്രതികൾക്കും വേണ്ടി ലക്ഷങ്ങൾ പ്രതിഫലം വാങ്ങുന്ന അഭിഭാഷകർ എത്തുന്നതും സംശയം ജനിപ്പിക്കുന്നു.

99 ശതമാനം ‘ലവ് ജിഹാദ്’ കേസുകളിലും മുസ്ലീം സമുദായത്തിൽ പെട്ട കൂട്ടുകാരികളാണ് മുഖ്യഘടകം. പ്രണയം അസ്ഥിക്കു പിടിച്ചു കഴിയുന്നതോടെ ഈ കൂട്ടുകാരി തിരശീലക്കു പുറകിൽ പോവും. നാർക്കോട്ടിക് ജിഹാദ് അടക്കമുള്ള വിഷയങ്ങളിൽ പാലാ പിതാവ് നടത്തിയ പ്രസ്താവന സത്യമാണ്. കേരളത്തിന്റെ വിവിധ ഭാഗങ്ങളിലായി നിരവധി കൗൺസിലിങ് സെന്ററുകളും ലഹരി വിമുക്ത കേന്ദ്രങ്ങളും സഭ നടത്തുന്നുണ്ട്. കാര്യങ്ങൾ അറിയാൻ പാലാ പിതാവിനെ പോലൊൾക്ക് നിഷ്പ്രയാസം സാധിക്കും. പിന്നെ തെളിവുകൾ, അത് കൊടുക്കേണ്ടവർക്ക് കൊടുത്താൽ പോരെ, വഴിയിൽ നിന്നും ചോദിക്കുന്ന എല്ലാവർക്കും കൊടുക്കേണ്ട ആവശ്യമില്ലല്ലോ. വിദേശത്ത് ജോലിയെടുക്കുന്ന നിരവധി ക്രിസ്ത്യൻ പെൺകുട്ടികളും ‘ലവ് ജിഹാദിന്’ ഇരയായിട്ടുണ്ട്. കുടുംബത്തിന്റെ അന്തസ് സംരക്ഷിക്കാനായി അവർ വിവരം മറിച്ചുവെക്കുകയാണ്.

‘ലവ് ജിഹാദിന്’ ഇരയായവരെ തിരികെ കൊണ്ടുവരാൻ ‘മിഷൻ: റീകാൾ ടു ക്രൈസ്റ്റ്സ് ലവ്’ എന്ന പേരിൽ പ്രത്യേക പദ്ധതി നടപ്പാക്കുന്നുണ്ട്. ‘ലവ് ജിഹാദിന്’ ഇരയായ 22ഓളം പേരെ തിരികെ കൊണ്ടുവരാൻ ഈ പ്രവർത്തനങ്ങൾക്ക് സാധിച്ചിട്ടുണ്ട്. കാസയുടെ അമ്പതോളം വനിതാപ്രവർത്തകർ അടങ്ങിയ സംഘമാണ് ഈ പ്രവർത്തനത്തിന് നേതൃത്വം നൽകുന്നത്. മോചിപ്പിച്ച ഒരു പെൺകുട്ടിയെ മറ്റൊരാളെ കൊണ്ട് വിവാഹം കഴിപ്പിക്കാനും കഴിഞ്ഞു. എട്ടോളം പെൺകുട്ടികളെ കുടുംബങ്ങൾ തിരികെ സ്വീകരിച്ചു. പത്തോളം പെൺകുട്ടികൾ കൗൺസിലിങ്ങിന്റെ വിവിധ ഘട്ടങ്ങളിലുണ്ട്. ലവ് ജിഹാദിന് ഇരയായ പെൺകുട്ടികളെയെല്ലാം തിരികെ കൊണ്ടുവരലാണ് ഞങ്ങളുടെ ലക്ഷ്യം.

കൗൺസിലിങ്, പ്രചരണ പ്രവർത്തനങ്ങൾ നടത്തുന്ന വിഭാഗത്തെ കുറിച്ചുള്ള വിവരങ്ങൾ പരസ്യപ്പെടുത്താൻ കാസ തയ്യാറല്ല. ലവ് ജിഹാദിനെ കുറിച്ച് പറയുമ്പോൾ തന്നെ പല കോണുകളിൽ നിന്ന് വലിയ ബഹളങ്ങളുണ്ടാവുന്നു. കേരളത്തിൽ കത്തോലിക്ക സഭ 2008ൽ നടത്തിയ പഠനത്തിൽ ‘ലവ്ജിഹാദിന്റെ’ ഭീകരത വിശദീകരിച്ചിരുന്നു. പ്രതിഷേധങ്ങളുണ്ടായതിനെ തുടർന്ന് പഠനത്തിന് നേതൃത്വം നൽകിയ പുരോഹിതനെ വിദേശത്തേക്ക് കടത്താൻ സഭ നിർബന്ധിതമായി. അതിനാലൊക്കെയാണ് പ്രവർത്തനം രഹസ്യമാക്കാൻ തീരുമാനിച്ചത്.

ചോദ്യം: ഹാഗിയ സോഫിയ വിവാദം ക്രിസ്ത്യാനികളെ മാറിചിന്തിപ്പിച്ചോ ?

കെവിൻ പീറ്റർ: തുർക്കിയിലെ ഹാഗിയ സോഫിയ പള്ളിയെ മുസ്ലീം പള്ളിയാക്കി മാറ്റിയത് ആഗോളതലത്തിൽ ക്രിസ്ത്യാനികളെ വേദനിപ്പിച്ചെങ്കിലും അത് തുർക്കിയിലെ ഒരു പ്രാദേശിക പ്രശ്നമായി മാത്രമാണ് കണ്ടിരുന്നത്. പക്ഷെ, കേരളത്തിൽ തങ്ങൾമാർ അതിനെ പ്രകീർത്തിച്ച് എഴുതിയ ലേഖനമാണ് ക്രിസ്ത്യാനികളുടെ വികാരത്തെ മുറിവേൽപ്പിച്ചത്. ക്രിസ്മസ് കരോൾ പാടിയാലോ കേക്ക് നൽകിയാലോ ഇനി ആ മുറിവ് ഉണങ്ങില്ല.

ചോദ്യം: സാമ്പത്തിക ജിഹാദ് എന്ന ആരോപണവും കാസ ഉയർത്തുന്നു. എന്താണ് കാരണം ?

കെവിൻ പീറ്റർ: ആരൊക്കെ എന്തൊക്കെ പറഞ്ഞാലും ‘ഇക്കണോമിക് ജിഹാദ്’ ഒരു വാസ്തവമാണ്. കോടിക്കണക്കിന് രൂപയുടെ കള്ളനോട്ടാണ് ചന്തിരൂർ, കരുനാഗപള്ളി തുടങ്ങിയ പ്രദേശങ്ങളിലേക്ക് പോയിരിക്കുന്നത്. ഒരു വിഭാഗം വൻതോതിൽ ഭൂമി വാങ്ങിക്കൂട്ടാൻ ഇത് കാരണമായി. ഭൂമിയുടെ വിലയും അവർ വർധിപ്പിച്ചു. വ്യാപാരം, വ്യവസായം തുടങ്ങി എല്ലാ മേഖലകളിലും പിടിച്ചെടുക്കാൻ കള്ളപ്പണം അവരെ സഹായിച്ചു. വ്യാജനോട്ടുകൾ ഇപ്പോൾ ഭൂമിയും സ്വർണ്ണവുമായി മാറിയിട്ടുണ്ട്.

ചോദ്യം: മൊബൈൽ സർവ്വീസ് സ്റ്റോറുകൾ നടത്തുമെന്ന് കാസ പറയുന്നുണ്ട്. എന്താണ് കാരണം ?

കെവിൻ പീറ്റർ: മൊബൈൽഫോൺ റീച്ചാർജ്, സർവ്വീസ് സെന്ററുകൾ എന്നിവ ഒരു വിഭാഗത്തിന്റെ കൈവശമാണുള്ളത്. കന്യാസ്ത്രീകളെയും ക്രിസ്ത്യൻ പെൺകുട്ടികളെയും ലക്ഷ്യമിടാൻ ഇത് ഉപയോഗിക്കപ്പെടുന്നു. കുടുംബങ്ങൾ തകരാൻ മൊബൈൽ ദുരുപയോഗം കാരണമാവുമെന്ന് എല്ലാവർക്കുമറിയാവുന്ന കാര്യവുമാണ്.

ചോദ്യം : എന്തു കൊണ്ടാണ് ഹലാൽ ഭക്ഷണം കാസക്ക് വിഷയമാവുന്നത് ?

കെവിൻ പീറ്റർ: അന്യദേവന് സമർപ്പിച്ച ഭക്ഷണം ഉപയോഗിക്കരുതെന്ന ക്യാമ്പയിൽ കഴിഞ്ഞ ക്രിസ്മസ് കാലത്താണ് കാസ തുടങ്ങിയത്. അത് മാധ്യമങ്ങൾ, പ്രത്യേകിച്ച് ഉത്തരേന്ത്യൻ മാധ്യമങ്ങൾ ഏറ്റെടുത്തു. മുൻകാലങ്ങളിൽ മാംസ മേഖലയിൽ ക്രിസ്ത്യാനികൾക്ക് വലിയ പങ്കാളിത്തമുണ്ടായിരുന്നു. ഇന്ന് അത് നഷ്ടപ്പെട്ടു കഴിഞ്ഞു. ഇടവക ദേവാലയങ്ങളും സഭകളും കേന്ദ്രീകരിച്ചു മൊബൈൽ ഫോൺ സർവീസ് സെന്ററുകളും ഇടവക ചന്തകളും മലഞ്ചരക്ക് വ്യാപാരവും മാംസവ്യാപാരവും തുടങ്ങാൻ സംഘങ്ങൾ രൂപീകരിക്കണമെന്നാണ് കാസയുടെ നിലപാട്.

ചോദ്യം: ആർ.എസ്.എസ് മോഡൽ സംഘടനയാണ് കാസ മുന്നോട്ടുവെക്കുന്നത്. കാരണം?

കെവിൻ പീറ്റർ: ”എന്റെ രാജ്യം എന്റെ വിശ്വാസം’ എന്നതാണ് കാസയുടെ മുദ്രാവാക്യം. ഇന്ത്യയിൽ കോൺഗ്രസും കമ്മ്യൂണിസ്റ്റ് പാർട്ടിയും എത്രയോ തവണ പിളർന്നു. ആർ.എസ്.എസ് എന്നെങ്കിലും പിളർന്നതായി കേട്ടിട്ടുണ്ടോ?. പാർലമെന്ററി താൽപര്യമില്ലാത്തതാണ് ആ സംഘടനയുടെ ശക്തി. ആർ.എസ്.എസ് ഹിന്ദുരാജ്യം സൃഷ്ടിക്കാൻ പ്രവർത്തിക്കുന്നതായി ഞങ്ങൾക്ക് തോന്നിയിട്ടില്ല. കൂടാതെ അവരുടെ സംഘടനാ-പ്രവർത്തനരീതികളും നല്ലതാണ്. കൂടാതെ അവർക്ക് സംഘടനാപരമായ രഹസ്യസ്വഭാവവും ഉണ്ടെന്ന് തോന്നുന്നു.

ചോദ്യം: കാസക്ക് രഹസ്യ സ്വഭാവമുണ്ടോ?

കെവിൻ പീറ്റർ: ലവ് ജിഹാദിന് ഇരയായവരെ തിരികെ കൊണ്ടുവരേണ്ട പ്രവർത്തനങ്ങൾക്ക് രഹസ്യസ്വഭാവം വേണമെന്ന് നേരത്തെ പറഞ്ഞല്ലോ. കാസയുടെ സംസ്ഥാനസമിതിയിൽ ഒരു പ്രസിഡന്റും വൈസ് പ്രസിഡന്റും സെക്രട്ടറിയും ജോയിന്റ് സെക്രട്ടറിയും ഖജാഞ്ചിയും അഞ്ച് എക്സിക്യൂട്ടിവ് അംഗങ്ങളും അടക്കം പത്ത് പേരാണുള്ളത്.

അതിന് മുകളിൽ സുപ്രധാന തീരുമാനങ്ങളും തന്ത്രങ്ങളും തയ്യാറാക്കാൻ ‘പ്രഭവകേന്ദ്രമെന്ന’ ഒരു സമിതി കൂടിയുണ്ട്. പ്രഭവ കേന്ദ്രത്തിൽ ആരൊക്കെയുണ്ടെന്ന കാര്യം വെളിപ്പെടുത്താൻ കാസ തയ്യാറല്ല. സംസ്ഥാനസമിതി അംഗങ്ങൾക്കു പോലും അവരെ കുറിച്ചുള്ള വിവരങ്ങൾ ലഭ്യമില്ല. കാസ സ്ഥാപകർ അതിലുണ്ടാവാം. നാർക്കോട്ടിക് ജിഹാദ് വെളിപ്പെടുത്തലിൽ പാലാ പിതാവിന് എതിരെ നടന്ന പ്രതിഷേധത്തിന് ഉടൻ മറുപടി നൽകിയത് കാസയാണ്. ഏകദേശം ആയിരത്തോളം പേരാണ് പ്രതിഷേധത്തിൽ പങ്കെടുത്തത്.

ചോദ്യം: കാസയെ സഭകൾ അംഗീകരിച്ചിട്ടുണ്ടോ ?

കെവിൻ പീറ്റർ: ഒരു സഭയുടെയും അംഗീകാരം നേടാൻ വേണ്ടിയല്ല കാസ പ്രവർത്തിക്കുന്നത്. ഏതെങ്കിലും സഭയുടെ അംഗീകാരമുണ്ടായാൽ കാസയുടെ പ്രവർത്തനങ്ങൾക്ക് അവർ മറുപടി നൽകേണ്ടി വരും. കൂടാതെ കാസ അവരുടെ നിയന്ത്രണത്തിൽ കുടുങ്ങാനും സാധ്യതയുണ്ട്. പക്ഷെ, പല സഭകളുടെയും പിതാക്കൻമാരുമായി അടുത്ത ബന്ധമുണ്ട്. അവരുടെ വിമർശനങ്ങളും ഉപദേശങ്ങളും കാസ പരിഗണിക്കാറുണ്ട്. കൂടാതെ കാസയുടെ ഉപദേശക സമിതിയിൽ പല സഭകളിലെയും പിതാക്കളും വൈദികരും വിരമിച്ച പോലീസ് ഉദ്യോഗസ്ഥരും അഭിഭാഷകരുമുണ്ട്. അത്തരം വിവരങ്ങളൊന്നും പുറത്തുവിടാൻ ഞങ്ങൾ തയ്യാറല്ല. രാജ്യദ്രോഹപ്രവർത്തനങ്ങൾ നടത്തുന്നവർ രഹസ്യപ്രവർത്തനം നടത്തിയാൽ അല്ലേ കുഴപ്പം!

ചോദ്യം: കൃസംഘി എന്ന ഒരു വാക്ക് തന്നെ വന്നു കഴിഞ്ഞു. കാസക്ക് ആർ.എസ്.എസുമായി ബന്ധമുണ്ടോ?

കെവിൻ പീറ്റർ: കാസയെ സംഘി, കൃസംഘി ചാപ്പയടിക്കുന്നത് കാണാം. യഥാർത്ഥത്തിൽ കാസക്ക് ആർ.എസ്.എസുമായോ ബി.ജെ.പിയുമായോ യാതൊരുവിധ സംഘടനാ ബന്ധവുമില്ല. രാജ്യത്തിന്റെ സുരക്ഷക്കും സമുദായത്തിന്റെ താൽപര്യം സംരക്ഷിക്കാനും വേണ്ടി പ്രവർത്തിക്കുന്ന ആരുമായി സഹകരിക്കാൻ കാസ തയ്യാറാണ്. ആർ.എസ്.എസ് പറയുന്ന അഫ്ഗാനിസ്താൻ ഒക്കെ അടങ്ങിയ അഖണ്ഡഭാരതം ഇനി സാധ്യമാണെന്ന് ഞങ്ങൾ വിശ്വക്കുന്നില്ല. പാക്ക് അധിനിവേശ കശ്മീർ തിരിച്ചെടുക്കണമെന്നാണ് കാസയുടെ ആഗ്രഹം.

ചോദ്യം: കാസക്ക് എന്തെങ്കിലും പിഴവുകൾ പറ്റിയിട്ടുണ്ടോ ?

കെവിൻ പീറ്റർ: കഴിഞ്ഞ നിയമസഭാ തിരഞ്ഞെടുപ്പിൽ എൻ.ഡി.എക്ക് പിന്തുണനൽകിയത് തെറ്റായ തീരുമാനമാണെന്നാണ് കാസ വിലയിരുത്തുന്നത്. കേരളത്തിലെ രണ്ടു പ്രമുഖ മുന്നണികളിലും ക്രിസ്ത്യൻ വിഭാഗത്തിൽ നിന്നുള്ള നേതാക്കളുണ്ട്. അവർ പക്ഷെ, പാർട്ടിക്കും മുന്നണിക്കും വേണ്ടിയാണ് നിലപാട് എടുക്കുന്നത്. മുസ്ലീംകൾക്ക് ഒരു പ്രശ്നമുണ്ടാവുമ്പോൾ വിവിധ പാർടികളിലുള്ള അവരുടെ നേതാക്കൾ ഒരുമിക്കുന്നു. ഈ പ്രശ്നം മറികടക്കാനൻ ക്രിസ്ത്യൻ വിഭാഗത്തിൽ നിന്ന് രണ്ടു യുവ എം.എൽഎമാരുണ്ടാവണമെന്ന് കാസ ആഗ്രഹിച്ചു. യു.ഡി.എഫ് തരംഗമാണ് കാസ പ്രതീക്ഷിച്ചതെങ്കിലും എൽ.ഡി.എഫ് ആണ് നേട്ടമുണ്ടാക്കിയത്.

ചോദ്യം: പരിവർത്തിത ക്രിസ്ത്യാനികൾക്ക് സംവരണം നൽകണമെന്നാണ് രംഗനാഥ കമ്മീഷൻ റിപ്പോർട്ട് പറയുന്നത്. എന്താണ് കാസക്ക് പറയാനുള്ളത് ?

കെവിൻ പീറ്റർ: കാസയിൽ ക്രിസ്ത്യാനികൾക്കിടയിൽ ഒരുതരത്തിലുള്ള വിവേചനവുമില്ല. ആത്യന്തികമായി സാമ്പത്തിക സംവരണമാണ് രാജ്യത്ത് നടപ്പാക്കേണ്ടത് എന്നാണ് കാസയുടെ നിലപാട്. ക്രെഡിബിലിറ്റിയുള്ള ഏതെങ്കിലും ഏജൻസിയെ കൊണ്ട് പഠനം നടത്തി എല്ലാ മേഖലകളിലും സാമ്പത്തിക സംവരണം നടപ്പാക്കണം. ജാതി സംവരണം ഒരു കാലഘട്ടത്തിന്റെ ആവശ്യമായിരുന്നു. ഇപ്പോൾ സാമ്പത്തിക സംവരണമാണ് ആവശ്യം. തുല്യത, സമത്വം സോഷ്യലിസം എന്നീ കമ്മ്യൂണിസ്റ്റ് പ്രത്യയശാസ്ത്രങ്ങൾ ലോകമെമ്പാടും പരാജയപ്പെട്ടു കഴിഞ്ഞല്ലോ. വിപണി മൽസരത്തിൽ അധിഷ്ഠിതമായ വികസന മോഡലാണ് മികച്ചതെന്നാണ് കാസയുടെ വിശ്വാസം.

ചോദ്യം: വടക്കേ ഇന്ത്യയിൽ ക്രിസ്ത്യാനികളെ ഹിന്ദുസംഘടനകൾ വേട്ടയാടുന്നതായി റിപ്പോർട്ടുകൾ വരുന്നുണ്ടല്ലോ?

കെവിൻ പീറ്റർ: ക്രിസ്ത്യൻ മിഷണറിമാർ വടക്കേ ഇന്ത്യയിൽ വിദ്യഭ്യാസ-ആരോഗ്യമേഖലയിൽ ശക്തമായ പ്രവർത്തനമാണ് നടത്തുന്നത്. മിഷണറി പ്രവർത്തനത്തിന്റെ ഭാഗമായി ശാക്തീകരിക്കപ്പെട്ട ദരിദ്രർ കൂലിയും അവകാശങ്ങളും ചോദിക്കുന്നത് ജന്മിമാരെ ചൊടിപ്പിക്കുന്നുണ്ട്. അവരാണ് മതപരിവർത്തനം ആരോപിച്ച് അക്രമങ്ങൾ നടത്തുന്നത്.

പ്രശ്നപരിഹാരത്തിനുള്ള എളുപ്പമാർഗമായാണ് ജന്മിമാർ മതത്തെ ഉപയോഗിക്കുന്നത്. പലതും യഥാർത്ഥത്തിൽ പ്രാദേശികപ്രശ്നങ്ങളാണ്. പണം, പ്രണയം,പ്രത്യാശ, പ്രലോഭനം, പാരിതോഷികം, എന്നിവ നൽകി ആരെയും മതപരിവർത്തനം നടത്തരുതെന്നാണ് കാസയുടെ നിലപാട്. വിശ്വാസം പ്രചരിപ്പിക്കുന്നതിൽ തെറ്റില്ല. പക്ഷെ, ആരെയും മതം മാറ്റരുത്.

ചോദ്യം: പൗരത്വ നിയമഭേദഗതിക്കെതിരെ മുസ്ലീം സമുദായം ശക്തമായ സമരത്തിലാണ്. എന്താണ് കാസക്ക് പറയാനുള്ളത്?

കെവിൻ പീറ്റർ: പൗരത്വ നിയമം നടപ്പാക്കണമെന്നാണ് കാസയുടെ നിലപാട്. അത് കേരളത്തിലെയോ ഇന്ത്യയിലെയോ മുസ്ലീംകളെ പ്രതികൂലമായി ബാധിക്കില്ല. നിലവിൽ കേരളത്തിൽ ബംഗാളികൾ എന്ന് വിളിക്കപ്പെടുന്ന നിരവധി പേരാണുള്ളത്. അന്യ സംസ്ഥാന തൊഴിലാളികൾ എന്നും അറിയപ്പെടുന്ന അവർ സത്യത്തിൽ ബംഗ്ലാദേശികളും അന്യരാജ്യതൊഴിലാളികളുമാണ്. വാട്ട്സാപ്പ് ഹർത്താലിൽ അവരും പങ്കെടുത്തിരുന്നല്ലോ. അവർ കേരളത്തിന് ഭീഷണിയാണ്. തീവ്രവാദ സംഘടനകൾ അവരെ ഉപയോഗിക്കും. അത്തരക്കാരെ രാജ്യത്ത് നിന്ന് പുറത്താക്കാൻ സി.എ.എ സഹായിക്കും.

ചോദ്യം : ഡൊണാൾഡ് ട്രംപിന് വേണ്ടി എന്തുകൊണ്ടാണ് എറണാകുളത്ത് ഫ്ളെക്സ് വെച്ചത് ?

കെവിൻ പീറ്റർ: കഴിഞ്ഞ യു.എസ് പ്രസിഡന്റ് തിരഞ്ഞെടുപ്പിനാണ് എറണാകുളം ജോസ് ജങ്ഷനിൽ ട്രംപിന്റെ ഫ്ളെക്സ് സ്ഥാപിച്ചത്. ട്രംപിനെ പോലെ ലോകത്തിന് നല്ലത് ചെയ്ത പ്രസിഡന്റ് യു.എസിൽ ഉണ്ടായിട്ടില്ലെന്നാണ് ഞങ്ങൾ കരുതുന്നത്. ട്രംപിന്റെ ഭരണകാലത്ത് യു.എസ് പുതിയ യുദ്ധമോ അധിനിവേശമോ നടത്തിയില്ല. നരേന്ദ്ര മോദിയുമായി ട്രംപിനുള്ള അടുപ്പമാണ് ചിലർ ട്രംപിനെ വിമർശിക്കാൻ കാരണം.

യു.എസ് പ്രസിഡന്റായ കാലത്ത് ട്രംപ് അറബ് രാജ്യങ്ങളെയും ഇസ്രായേലിനെയും അടുപ്പിച്ചു. കൂടാതെ വടക്കൻ കൊറിയൻ ഭരണാധികാരിയായ കിം ജോങ് ഉന്നിനെ നേരിൽ സന്ദർശിച്ചു. യു.എസിലെ കാസയുടെ പ്രവർത്തകരിൽ പലരും റിപ്പബ്ലിക്കൻ പാർട്ടിയുടെ ഉന്നതപദവികളിലുള്ളവരാണ്. ട്രംപ് ഒരു വെള്ള വംശീയവാദിയല്ല. സ്വന്തം രാജ്യത്തെ ജനങ്ങൾക്ക് മുൻഗണന നൽകുന്ന രാജ്യസ്നേഹിയാണ് അദ്ദേഹം. അത് ഒരു പക്ഷെ, കുടിയേറ്റക്കാർക്ക് ദോഷമായേക്കാം. പക്ഷെ, ഒരു രാജ്യസ്നേഹിക്ക് സ്വന്തം ജനങ്ങളെ അവഗണിക്കാനാവുമോ. കൂടാതെ ട്രംപ് ‘പ്രോ ലൈഫ്’ കൂടിയാണ്.

ചോദ്യം : കാസയും അബോർഷന് എതിരാണോ?

കെവിൻ പീറ്റർ: ദൈവം സൃഷ്ടിച്ച ജീവൻ എടുക്കാൻ ആർക്കും അവകാശവും അധികാരവുമില്ലെന്നാണ് ഞങ്ങൾ വിശ്വസിക്കുന്നത്. ഗർഭം ധരിക്കാതിരിക്കാൻ എത്രയോ മാർഗങ്ങളുണ്ട്. അത് സ്വീകരിക്കുന്നതിന് ആരും തടസം നിൽക്കുന്നില്ലല്ലോ. എൽ.ജി.ബി.ടി പ്രശ്നം ഒരു ജനിതക പ്രശ്നമാണെന്നാണ് എനിക്ക് തോന്നുന്നത്. അത് ലൈംഗിക അരാജകത്വത്തിലേക്ക് പോവുന്നതിനെ കാസ ശക്തമായി എതിർക്കും.

ചോദ്യം: എന്താണ് കാസയുടെ ഭാവിപ്രവർത്തനങ്ങൾ?

രാജ്യത്തെ നിയമങ്ങൾ പാലിച്ചു കൊണ്ടുള്ള പ്രവർത്തനങ്ങൾ മാത്രമായിരിക്കും ഞങ്ങൾ നടത്തുക. നിയമങ്ങൾ ലംഘിച്ചുകൊണ്ടുള്ള ഒരു പ്രവർത്തനത്തിനും നേതൃത്വം നൽകുകയോ അങ്ങനെ പ്രവർത്തിക്കാൻ അംഗങ്ങളെ അനുവദിക്കുകയോ ചെയ്യില്ല. ക്രിസ്ത്യൻ സമുദായത്തെ തകർക്കാൻ നടപ്പാക്കുന്ന ‘ലൗജിഹാദ്, നാർക്കോട്ടിക് ജിഹാദ്, ലാൻഡ് ജിഹാദ്, ഇക്കണോമിക് ജിഹാദ്, മെഡിക്കൽ ജിഹാദ്, ലീഗൽ ജിഹാദ്’ തുടങ്ങിയവയെ കാസ ഭാവിയിലും പ്രതിരോധിക്കും. ക്രിസ്ത്യൻ വിദ്യാർഥികൾക്കായി ഒരു സംഘടന രൂപീകരിക്കണമെന്ന് തീരൂമാനിച്ചിട്ടുണ്ട്. എല്ലാ ജില്ലകളിലും വിവിധ മേഖലകൾ തിരിച്ച് ക്രിസ്ത്യൻ ഹെൽപ്പ് സെന്ററുകൾ സ്ഥാപിക്കുക, റെസ്‌ക്യൂ ടീമുകളെ സജ്ജരാക്കുക, ഓരോ മേഖലാ ഹെൽപ് സെന്ററുകൾക്കും ഓരോ ആംബുലൻസ് എന്നതുൾപെടെയുള്ള കാര്യങ്ങളും ലക്ഷ്യമാണ്.

****