“പരിശുദ്ധ പിതാവ് ഫ്രാൻസിസ് മാർപാപ്പയുടെ ആഹ്വാനത്തിൻ്റെയും പൗരസ്ത്യ സഭകൾക്കായുള്ള കാര്യാലത്തിൻ്റെ നിർദേശങ്ങളുടെയും അടിസ്ഥാനത്തിൽ സീറോ മലബാർസഭയുടെ ഐക്യത്തിലുള്ള വളർച്ച ലക്ഷ്യമാക്കി സഭയുടെ സിനഡ് ഏകകണ്ഠമായി എടുത്ത തീരുമാനമാണ് ഏകീകൃത വിശുദ്ധ കുർബാനയർപ്പണരീതി 2021 നവംബർ 28ന് സഭയിൽ നടപ്പിലാക്കുക എന്നത്. സിനഡിൻ്റെ ഈ തീരുമാനത്തിൽ നിന്ന് മെത്രാപ്പോലീത്തൻ വികാരി എറണാകുളം – അങ്കമാലി അതിരൂപതയ്ക്ക് ഒഴിവ് നൽകിയതായി മാധ്യമങ്ങളിൽ നിന്ന് അറിയുന്നു. എന്നാൽ പരിശുദ്ധ സിംഹാസനത്തിൽ നിന്ന് ഇതു സംബന്ധിച്ച് യാതൊരു അറിയിപ്പും എനില്ല് ലഭിച്ചിട്ടില്ല”
“സിനഡിൻ്റെ തീരുമാനത്തിനു യാതൊരു മാറ്റവുമില്ല. അത് അതേപടി നിലനിൽക്കുന്നുവെന്നും അതിനാൽ ഈ തീരുമാനം എല്ലാവരും നടപ്പിലാക്കണമെന്നും ഇതിനാൽ അറിയിക്കുന്നു. തികഞ്ഞ ക്രൈസ്തവ ചൈതന്യത്തിലും സഭാത്‌മകയിലും കൂട്ടായ്‌മയിലും അഭിപ്രായവ്യത്യാസങ്ങളും വ്യക്തിപരമായ താത്പര്യങ്ങളും മാറ്റിവച്ചു സിനഡുതീരുമാനം നടപ്പിലാക്കാൻ സഭാമക്കൾ ഏവരെയും ആഹ്വാനം ചെയ്യുന്നു” – എന്നും സർക്കുലറിലൂടെ കർദിനാൾ മാർ ജോർജ് ആലഞ്ചേരി അറിയിച്ചു.
കർദിനാൾ മാർ ജോർജ് ആലഞ്ചേരിയുടെ അറിയിപ്പ് പുറത്തുവന്നതിനൊപ്പം നിലപാട് വ്യക്തമാക്കി തൃശൂർ അതിരൂപത രംഗത്തുവന്നു.
ഏകീകൃത കർബാന ക്രമം നടപ്പാക്കേണ്ടെന്ന ബിഷപ്പ് മാർ ആന്‍റണി കരിയിലിന്‍റെ നിർദേശം ആശയ കുഴപ്പം സൃഷ്ടിക്കുന്നുവെന്ന് തൃശൂർ അതിരൂപത അറിയിച്ചു. നാളെ മുതൽ പുതുക്കിയ കുർബാന രീതി നടപ്പാക്കണമെന്ന് നിർദേശിച്ച് ആർച്ച് ബിഷപ്പ് മാർ ആൻഡ്രൂസ് താഴത്ത് സർക്കുലർ പുറത്തിറക്കി. നാളെ മുതൽ ആണ് സീറോ മലബാർ സഭയ്ക്ക് കീഴിൽ പരിഷ്കരിച്ച ആരാധനക്രമം നിലവിൽ വരേണ്ടിയിരുന്നത്.
ജനാഭിമുഖ കുർബാന തുടരാൻ ഫ്രാൻസിസ് മാർപാപ്പ അനുമതി നൽകിയെന്ന് മെത്രാപ്പോലീത്തൻ വികാരി ആൻ്റണി കരിയിൽ വ്യക്തമാക്കിയെന്നും അതിനാൽ എറണാകുളം അങ്കമാലി അതിരൂപതയിൽ ഏകികൃത കുർബാന ക്രമം നടപ്പാക്കില്ലെന്നുമുള്ള വാർത്തകളാണ് മുൻപ് പുറത്തുവന്നത്. ഇതിനെതിരെയാണ് കർദിനാൾ മാർ ജോർജ് ആലഞ്ചേരി നിലപാട് വ്യക്തമാക്കിയത്.
മാർപാപ്പയുമായുള്ള കൂടിക്കാഴ്ച 45 മിനിറ്റോളം നീണ്ടുനിന്നുവെന്ന് സഭാ വൃത്തങ്ങൾ വ്യക്തമാക്കിയിരുന്നു. മോൺ. ഫാ. ആൻ്റണി നരികുളവും കൂടിക്കാഴ്ചയിൽ പങ്കെടുത്തു. വത്തിക്കാൻ നിർദേശം ഉൾക്കൊള്ളിച്ചുള്ള സർക്കുലർ ആൻ്റണി കരിയിൽ പുറത്തിറക്കിയെന്ന വാർത്തകളും പുറത്തുവന്നിരുന്നു.
കുർബാനയിലെ രീതികൾ ഏകീകരിക്കണമെന്ന നിർദേശത്തിൽ എതിർപ്പ് വ്യക്തമാക്കി എറണാകുളം – അങ്കമാലി അതിരൂപതയിലെ വൈദികർ മുൻപ് മാർപാപ്പയ്ക്ക് കത്ത് എഴുതിയിരുന്നു. മാർപാപ്പയ്ക്ക് അയച്ച കത്തിൽ അതിരൂപതയിൽപ്പെട്ട 466 വൈദികർ ഒപ്പിട്ടു. ഇന്ത്യയിലെ പൗരസ്ത്യ സഭയുടെയും അപ്പോസ്തോലിക് നൂൺസിയോയുടെയും പ്രിഫെക്റ്റിനും മെമ്മോറാണ്ടം അയക്കുകയും ചെയ്തിരുന്നു. ഏകീകരണ രീതി നിർബന്ധിച്ച് അടിച്ചേൽപ്പിക്കാൻ ശ്രമിച്ചാൽ സഭയുടെ ഐക്യത്തെ ബാധിക്കുമെന്നാണ് വൈദികർ വ്യക്തമാക്കിയിരുന്നത്.
