ദേശീയപാത – 766, വയനാട് ജില്ലയിലെ ലക്കിടി റോഡ് നവീകരണത്തിന് സ്വകാര്യവ്യക്തിക്ക് സഹായകരമാകും വിധം സംരക്ഷണഭിത്തി നിർമ്മാണ പ്രവർത്തി നടപ്പിലാക്കിയതായി ചീഫ് എഞ്ചിനിയർ റിപ്പോർട്ട് നൽകിയിട്ടുണ്ട്. പൊതുമരാമത്ത് വകുപ്പിന്റെ ചട്ടങ്ങൾക്ക് വിരുദ്ധമായി പ്രവർത്തിച്ച ദേശീയപാത വിഭാഗം കൊടുവള്ളി സബ്ഡിവിഷനിലെ അസിസ്റ്റൻറ് എൻജിനീയറേയും ഫസ്റ്റ് ഗ്രേഡ് ഓവർസിയറേയും സർവീസിൽ നിന്ന് സസ്പെൻഡ് ചെയ്യാൻ ഉത്തരവ് നൽകിയിട്ടുണ്ട്- മന്ത്രി പറഞ്ഞു.
ഈ വിഷയത്തിൽ വിശദമായ പരിശോധന നടത്തി റിപ്പോർട്ട് സമർപ്പിക്കുവാൻ പൊതുമരാമത്ത് വിജിലൻസിന് നിർദ്ദേശം നൽകിയിട്ടുണ്ട്. വിഷയം ശ്രദ്ധയിൽ കൊണ്ടുവന്ന മാധ്യമ പ്രവർത്തകരെയും ജനങ്ങളെയും പ്രത്യേകം അഭിനന്ദിക്കുന്നു- മുഹമ്മദ് റിയാസ് ഫേസ്ബുക്ക് പോസ്റ്റിൽ പറഞ്ഞു.
അതേസമയം റോഡിന്റെ അറ്റകുറ്റപ്പണി ഏറ്റെടുത്ത കരാറുകാരനോ ഉദ്യോഗസ്ഥനോ വീഴ്ച സംഭവിച്ചാൽ ജനങ്ങൾക്ക് പരാതിപ്പെടാമെന്ന് മന്ത്രി നേരത്തെ വ്യക്തമാക്കിയിരുന്നു. ജനങ്ങൾ കാഴ്ചക്കാരല്ല, കാവൽക്കാരാകണമെന്ന് മന്ത്രി പറഞ്ഞു. ഡിഫക്ട് ലയബലിറ്റി പിരിയഡ് (ഡിഎൽപി) അടിസ്ഥാനത്തിൽ കേരളത്തിൽ നിർമ്മിക്കുന്ന റോഡുകളുടെ വിവരങ്ങൾ വെബ്സൈറ്റിൽ പ്രസിദ്ധീകരിക്കുമെന്നും മന്ത്രി വ്യക്തമാക്കി. ഡിഎൽപി പദ്ധതി പ്രകാരം നിർമ്മിക്കുന്ന റോഡുകളുടെ വശങ്ങളിൽ കരാറുകാരന്റെയും ബന്ധപ്പെടേണ്ട ഉദ്യോഗസ്ഥന്റേയും ഫോൺ നമ്പറുകൾ പരസ്യപ്പെടുത്തും. കുറ്റക്കാരാണെന്നു കണ്ടെത്തിയാൽ ശക്തമായ നടപടി സ്വീകരിക്കുമെന്നും അദ്ദേഹം വ്യക്തമാക്കിയിരുന്നു.
