കോടതിയുടെ ഉത്തരവില്ലാതെ കുഞ്ഞിനെ കൈമാറിയാൽ നിയമ പ്രശ്നം ഉണ്ടാകുമോയെന്നാണ് ദമ്പതികൾക്ക് അറിയേണ്ടിയിരുന്നത്. കോടതിയുടെ നിർദ്ദേശം ഉദ്യോഗസ്ഥർ ദമ്പതികളെ അറിയിച്ചു. കുഞ്ഞിന്റെ അമ്മയ്ക്ക് നീതി ലഭിക്കണമെന്ന നിലപാടാണ് ദമ്പതികൾക്ക് ഉണ്ടായിരുന്നത്. പുതിയ വസ്ത്രങ്ങൾ വാങ്ങി നൽകിയാണ് ദമ്പതികൾ കുഞ്ഞിനെ യാത്രയാക്കിയത്. നടപടികൾ പൂർത്തിയാക്കാൻ തടസങ്ങൾ ഉണ്ടായിരുന്നില്ലെന്ന് ഉദ്യോഗസ്ഥർ പറഞ്ഞു.
കുഞ്ഞിനെ തിരികെ നൽകേണ്ടിവന്ന സാഹചര്യത്തിൽ വീണ്ടും കുഞ്ഞിനു വേണ്ടി അപേക്ഷിച്ചാൽ ദമ്പതികൾക്ക് മുൻഗണന ലഭിക്കും. കുഞ്ഞിനെ ദത്തെടുക്കുമ്പോൾ നടപടി ക്രമങ്ങൾ പാലിച്ചിരുന്നെന്ന് ദമ്പതികൾ പറഞ്ഞു. കേന്ദ്ര സർക്കാരിന്റെ സൈറ്റിൽ കുഞ്ഞിനെ ദത്തെടുക്കുന്നതിനായി അപേക്ഷിച്ചു. തുടർന്ന് വഞ്ചിയൂർ കുടുംബ കോടതിയിൽ സിറ്റിങ് ഉണ്ടായിരുന്നു. വിവാദങ്ങൾ മൂലം മാനസികമായി വിഷമിച്ചെന്ന് ദമ്പതികൾ പറഞ്ഞു. കുഞ്ഞിനെ ദത്തെടുത്ത ശേഷം നേരത്തെ താമസിച്ചിരുന്ന സ്ഥലത്തായിരുന്നില്ല ദമ്പതികൾ താമസിച്ചിരുന്നത്.
ഞായറാഴ്ച രാത്രി എട്ടരയോടെയാണ് തിരുവനന്തപുരം വിമാനത്താവളത്തിൽ കുഞ്ഞിനെ എത്തിച്ചത്. ശിശുക്ഷേമ സമിതിയുടെ മേൽന്നോട്ടത്തിൽ പാളയത്തെ നിർമ്മല ശിശുഭവനിൽ കുഞ്ഞിനെ പ്രവേശിപ്പിച്ചു. കോടതി വിധി വരുന്നതുവരെ കുഞ്ഞ് ഇവിടെയായിരിക്കും. കുട്ടിയുടെ ഡിഎൻഎ സാമ്പിൾ ശേഖരിച്ചിട്ടുണ്ട്. രാജീവ് ഗാന്ധി ബയോ ടെക്നോളജിയിൽ നിന്നുള്ള വിദഗ്ദർ എത്തിയാണ് സാമ്പിൾ ശേഖരിച്ചത്.
അനുപമയുടേയും പങ്കാളിയുടേയും സാമ്പിൾ ശേഖരിക്കും. ഇതു സംബന്ധിച്ച് അറിയിപ്പ് ലഭിച്ചെന്ന് പറഞ്ഞു. തന്റെയും ഭർത്താവിന്റെയും കുഞ്ഞിന്റെയും സാമ്പിൾ ഒരുമിച്ച് ശേഖരിക്കാത്തത് അംഗീകരിക്കാൻ സാധിക്കില്ലെന്ന് അനുപമ പറഞ്ഞു. തെറ്റു ചെയ്തവർക്ക് സാമ്പിൾ എടുക്കാൻ ഉത്തരവാദിത്വം നൽകിയാൽ അവർ പ്രതികാര മനോഭാവത്തോടെ പെരുമാറും. സാമ്പിളെടുത്ത കുഞ്ഞ് തന്റേതാണെന്ന് ഉറപ്പിക്കാനാവില്ലെന്നും അനുപമ ആരോപിച്ചു. ഒരുമിച്ച് സാമ്പിൾ ശേഖരിക്കുന്നതിനുള്ള സാങ്കേതിക തടസം എന്താണെന്ന് വ്യക്തമാക്കണമെന്നും അവർ ആവശ്യപ്പെട്ടു.
