റോഡ് മുഴുവൻ കറൻസി നോട്ടുകൾ! പണം വാരിക്കൂട്ടി, തുള്ളിച്ചാടി ജനം

ചിലരെങ്കിലും സ്വപ്നം കാണാറില്ലേ? പണം കായ്ക്കുന്ന ഒരു മരം മുറ്റത്തുണ്ടായിരുന്നെങ്കിൽ. ചിലരുടെ ആഗ്രഹം ഏതെങ്കിലും ഒരു വമ്പൻ പണക്കാരൻ ഒരുപാട് പണം തങ്ങൾക്ക് എഴുതി തന്നിരുനെങ്കിൽ എന്നാവും. ചിലർക്ക് ലോട്ടറിയടിച്ചാൽ കൊള്ളാം എന്നുണ്ടാകും. ചിലരുടെ ആഗ്രഹം ഒരു വണ്ടി നിറയെ പണം ലഭിച്ചിരുന്നെങ്കിൽ എന്നാവും. ഏറെക്കുറെ ഈ സ്വപ്‌നങ്ങൾ സ്വപ്നങ്ങളായി തുടരുകയാണ് സംഭവിക്കാറുള്ളത്. എന്ന അടുത്തിടെ അമേരിക്കയിലെ ഒരു ഹൈവേയിൽ വണ്ടിയോടിച്ചവർക്ക് ഇത്തരത്തിൽ ഒരു കാഴ്ച്ച കാണേണ്ടി വന്നു. റോഡ് നിറയെ ഡോളർ നോട്ടുകൾ.

കാൾസ്ബാഡിലെ ഇന്റർസ്റ്റേറ്റ് 5 ഹൈവേയിലാണ് സംഭവം. പണവുമായി വന്ന ലോറിയുടെ പുറകിലെ ഡോർ തുറന്നു പോവുകയും ബാഗുകളിൽ സൂക്ഷിച്ചിരുന്ന പണം റോഡിലെത്തുകയും ചെയ്‌തെന്നാണ് സിനിമകളിൽ മാത്രം കണ്ടിട്ടുള്ള ഒരു സാഹചര്യത്തിനിടയാക്കിയത് എന്ന് ABC10 ന്യൂസ് റിപ്പോർട്ട് ചെയ്യുന്നു. ഈ മാസം 19നാണ് സംഭവം നടന്നത്.

പുറകിലെ ഡോർ തുറന്നതും പണം നിലത്ത് വീണതുമൊന്നും അറിയാതെ ഡ്രൈവറും സുരക്ഷാ ജീവനക്കാരും വാഹനവുമായി കുറച്ച് ദൂരം മുന്നോട്ട് പോയി. ഇതോടെ വഴിയിലുടനീളം കറൻസി നോട്ടുകൾ വീണു കിടന്നു. പുറകെ വാഹനത്തിൽ വന്ന പലരും നടുറോഡിൽ വാഹനം നിർത്തി നോട്ട് പെറുക്കാൻ ആരംഭിച്ചതോടെ നാഷണൽ ഹൈവേയിൽ രൂപപ്പെട്ടത് വമ്പൻ ബ്ലോക്ക്.

ഫിറ്റ്‌നസ് ഇൻഫ്ലൂവൻസർ ഡെമി ബാഗ്ബി ഇൻസ്റ്റാഗ്രാമിൽ പോസ്റ്റ് ചെയ്ത വീഡിയോ ക്ലിപ്പിൽ റോഡിൽ ഉടനീളം പണം ചിതറിക്കിടക്കുന്നത് കാണാം. ആ വഴി അതെ സമയം വന്നവർ വാഹനം റോഡിൽ നിർത്തിയിട്ട് പണം വരുന്നതും വിഡിയോയിൽ വ്യക്തമാണ്. “ഇത് ഞാൻ കണ്ടിട്ടുള്ളതിൽ വച്ച് ഏറ്റവും ഭ്രാന്തമായ കാര്യമാണ്. ഹൈവേയിൽ ആരോ പണം ഇറക്കി – സാൻ ഡീഗോ അടച്ചുപൂട്ടി. അക്ഷരാർത്ഥത്തിൽ, അത് അടച്ചുപൂട്ടി, ഇപ്പോൾ ഫ്രീവേ നോക്കൂ, ദൈവമേ,” ഡെമി ബാഗ്ബി വീഡിയോയിൽ പറയുന്നത് കേൾക്കാം.

പ്രാദേശിക ബാങ്കിൽ നിന്ന് ഫെഡറൽ റിസർവിലേക്ക് പോവുകയായിരുന്ന ട്രക്കിന്റെ വാതിൽ കാനൺ റോഡിന് സമീപം തുറന്നതിനെ തുടർന്നാണ് പണം ചോർന്നത്. കാലിഫോർണിയ ഹൈവേ പട്രോൾ (CHP) അനുസരിച്ച്, ഓൺലൈനിൽ അപ്‌ലോഡ് ചെയ്‌ത നിരവധി വീഡിയോകൾ പണം ആരൊക്കെ എടുത്തിട്ടുണ്ട് എന്ന സൂചന നൽകിയിട്ടുണ്ട്. തങ്ങൾ നിലവിൽ എഫ്ബിഐയുമായി കേസിൽ പ്രവർത്തിക്കുന്നുണ്ടെന്ന് സിഎച്ച്പി പറഞ്ഞു. പലരും വസ്ത്രത്തിലും പോക്കറ്റിലും പണവുമായി സ്ഥലം വിട്ടപ്പോൾ ചിലർ പണം സിഎച്ച്പിക്ക് തിരികെ നൽകി.