ഒരു പക്ഷെ സ്റ്റീവ് ഇർവിൻ എന്ന പേര് നമുക്ക് അത്ര പരിചിതമല്ലെങ്കിലും നാഷണൽ ജിയോഗ്രഫിക് ചാനലിലും, ഡിസ്‌കവറി ചാനലിലും കാക്കി നിറത്തിലുള്ള ഷർട്ടും നിക്കറും ധരിച്ച് വെള്ള തലമുടിയുമായി നമ്മുടെ ടിവിയിൽ പ്രത്യക്ഷപ്പെട്ടിരുന്ന മുതലപിടുത്തക്കാരനെ ഒരമ്മയില്ലേ? ആ വ്യക്തി തന്നെയാണ് സ്റ്റീവ് ഇർവിൻ.
1996 മുതൽ 2007 വരെ സംപ്രേഷണം ചെയ്തിരുന്ന ‘ദി ക്രോക്കഡൈൽ ഹണ്ടർ’ എന്ന ടെലിവിഷൻ പരമ്പരയിലൂടെയാണ് സ്റ്റീവ് ഇർവിൻ ലോകമെമ്പാടും പ്രശസ്തി നേടി. മൃഗങ്ങളെക്കുറിച്ച് ആളുകളെ ബോധവൽക്കരിക്കുന്നതിനായി ജീവിതം തന്നെ മാറ്റിവച്ച സ്റ്റീവ് ഇർവിൻ നിരവധി വേട്ടയാടൽ വിരുദ്ധ പ്രചാരണങ്ങളിലും പരിപാടികളിലും സ്ഥിരം സാന്നിദ്ധ്യമായിരുന്നു.
അപ്രതീക്ഷിതമായിരുന്നു സ്റ്റീവ് ഇർവിന്റെ മരണം. 2006-ൽ ഓഷ്യൻസ് ഡെഡ്‌ലീസ്റ്റ് എന്ന പേരിൽ വെള്ളത്തിനടിയിൽ ഒരു ഡോക്യുമെന്ററി ചിത്രീകരിക്കുമ്പോൾ തിരണ്ടിയുടെ വാൽ ഹൃദയത്തിൽ കുത്തിയാണ് സ്റ്റീവ് ഇർവിൻ മരിച്ചത്. 44-ാം വയസ്സിൽ മരണപ്പെട്ടു എങ്കിലും സ്റ്റീവ് ഇർവിൻ ഇപ്പോഴും പ്രീയങ്കരനാണ്.
വെറുതെയാണോ നവംബർ 15 സ്റ്റീവ് ഇർവിൻ ദിനമായത്. ഇർവിന്റെ പ്രിയപ്പെട്ട മൃഗങ്ങളിലൊന്നായ ഗാലപ്പഗോസ് ദ്വീപുകളിൽ നിന്നുള്ള ആമയുടെ ജന്മദിനം ആണ് നവംബർ 15. ഇതാണ് ഈ ദിവസം തന്നെ സ്റ്റീവ് ഇർവിൻ ദിനമായി തിരഞ്ഞെടുത്തത്. സ്റ്റീവ് ഇർവിന്റെ ജീവിതത്തിന്റെയും പാരമ്പര്യത്തിന്റെയും ആഘോഷമാണ് സ്റ്റീവ് ഇർവിൻ ദിനം. ഓസ്‌ട്രേലിയ മൃഗശാലയിലെ ‘വൈൽഡ്‌ലൈഫ് വാരിയേഴ്‌സി’നായി പണം സ്വരൂപിക്കുന്നതിലും ഈ ദിവസം ശ്രദ്ധ കേന്ദ്രീകരിക്കുന്നു. സമാഹരിക്കുന്ന പണം ഓസ്‌ട്രേലിയൻ മൃഗശാലയിലെ ജീവനക്കാരെ മൃഗങ്ങൾക്കായുള്ള അവരുടെ സംരക്ഷണ പ്രവർത്തനങ്ങൾ തുടരാൻ പ്രാപ്തരാക്കുന്നു.
കഴിഞ്ഞ ദിവസമായിരുന്നു നവംബർ 15. എല്ലാ വർഷത്തേയും പോലെ, ഈ വർഷവും സ്റ്റീവ് ഇർവിന്റെ മക്കൾ ‘സ്റ്റീവ് ഇർവിൻ ദിനം’ ആചരിക്കുന്നതിൻ്റെ ഭാഗമായി പിതാവിന് ഹൃദയംഗമമായ ആദരാഞ്ജലികൾ അർപ്പിച്ചു.
