ലോകത്തെ ഏറ്റവും വിലയുള്ള പഴം ഏത് എന്നറിയാമോ? ജപ്പാൻകാരൻ തണ്ണിമത്തൻ

പഴവർഗ്ഗങ്ങൾ ഇഷ്ടമില്ലാത്തവർ വിരളമായിരിക്കും. എല്ലാ പഴങ്ങളും എല്ലാവർക്കും ഇഷ്ടമല്ല എങ്കിലും ബഹുഭൂരിപക്ഷം പേർക്കും ഒന്നല്ലെങ്കിൽ രണ്ട് പഴവർഗ്ഗങ്ങൾ ഇഷ്ടമായിരിക്കും. എന്നാൽ ലോകത്തിലെ ഏറ്റവും വിലകൂടിയ പഴം ഏതാണ് എന്ന് ചിന്തിച്ചിട്ടുണ്ടോ? ഡ്രാഗൺ ഫ്രൂട്ട്, കിവി തുടങ്ങിയ താരതമ്യേന നമ്മുടെ വിപണിയിൽ വില കൂടിയ പഴങ്ങളല്ല. യുബാരി കിംഗ് എന്ന് പേരുള്ള ഒരു തരാം തണ്ണിമത്തനാണ് താരം. ജപ്പാനിൽ മാത്രം ലഭ്യമായ യുബാരി കിംഗ് പഴത്തിന് വില എത്ര എന്നല്ലേ? ലക്ഷങ്ങൾ ചിലവാക്കാൻ തയ്യാറാക്കണം.

ജപ്പാനിൽ മാത്രമേ യുബാരി കിംഗ് ലഭിക്കൂ. അതും പ്രാദേശിക ഷോപ്പുകളിലും സൂപ്പർമാർക്കറ്റുകളിലും യുബാരി കിംഗ് പഴത്തിന്റെ പൊടി പോലും കിട്ടില്ല. അതിസമ്പന്നർക്ക് മാത്രം പ്രത്യേകം തയ്യാറാക്കുന്ന പഴമാണ് യുബാരി കിംഗ്. 2019ൽ ഒരു ജോടിയുബാരി കിംഗ് പഴം വിറ്റത് 42,450 ഡോളറിന് (31.6 ലക്ഷം രൂപ). അതായത് ഒരെണ്ണത്തിന് 15 ലക്ഷം രൂപയിലധികം. റിപോർട്ടുകൾ അനുസരിച്ച് ഒരു കിലോഗ്രാം യുബാരി തണ്ണിമത്തന് 20 ലക്ഷം രൂപ വരെ വിലവരും. ഈ പഴം സമൂഹത്തിലെ ഏറ്റവും ഉയർന്ന തലത്തിലുള്ളവർക്ക് മാത്രമുള്ളതാണ്, അതായത് അതിസമ്പന്നർ.

ഷാംപെയ്ൻ, ബർബൺ, അല്ലെങ്കിൽ കോബി ബീഫ് തുടങ്ങിയ നിരവധി ആഡംബര ഭക്ഷണ പാനീയങ്ങൾ പോലെ, യുബാരി കിംഗ് തണ്ണിമത്തൻ ഹൊക്കൈഡോ പ്രിഫെക്ചറിലെ ഒരു പ്രത്യേക പ്രദേശത്ത് മാത്രമേ വളർത്താൻ സാധിക്കൂ. ജപ്പാനിലെ സമ്പന്നർക്കിടയിൽ ഇതിന് ഇപ്പോഴും ആവശ്യക്കാരുണ്ട്. ജപ്പാനിലെ യുബാരി മേഖലയിൽ മാത്രം വളരുന്ന ഈ പഴം വൻതോതിലുള്ള കൃഷിയിൽ നിന്ന് വ്യത്യസ്തമായി ഹരിതഗൃഹത്തിനുള്ളിൽ മാത്രമേ വളർത്താനാവൂ. കർഷകർ തണ്ണിമത്തന് നിരന്തരമായ ശ്രദ്ധയും പരിചരണവും നൽകുന്നു. ഓരോ തണ്ണിമത്തനും വളരാൻ 100 ദിവസമെടുക്കും ബിസിനസ്സ് ഇൻസൈഡർ റിപ്പോർട്ട് ചെയ്യുന്നു.

വാഗ്യു ബീഫ് അല്ലെങ്കിൽ ഐബീരിയൻ ഹാം പോലെയുള്ള ഭൂമിശാസ്ത്രപരമായ സൂചകങ്ങളാൽ സംരക്ഷിക്കപ്പെട്ടിരിക്കുന്നതാണ് യുബാരി കിംഗ് തണ്ണിമത്തന് ഇത്രയേറെ വില കൂടാനുള്ള മറ്റൊരു കാരണം.