ലണ്ടൻ
മാഞ്ചസ്റ്റർ യുണൈറ്റഡ് വിജയവഴിയിൽ. ഓൾഡ് ട്രാഫോർഡിൽ ലിവർപൂളിനോടേറ്റ ദാരുണതോൽവിക്കു പിന്നാലെ ഇംഗ്ലീഷ് പ്രീമിയർ ലീഗിൽ ടോട്ടനം ഹോട്സ്പറിനെ മൂന്ന് ഗോളിന് വീഴ്ത്തി. ക്രിസ്റ്റ്യാനോ റൊണാൾഡോയാണ് യുണൈറ്റഡിന് മിന്നുംജയമൊരുക്കിയത്.
ആദ്യഗോൾ നേടിയ റൊണാൾഡോ എഡിൻസൺ കവാനിയുടെ ഗോളിന് വഴിയൊരുക്കുകയും ചെയ്തു. മാർക്സ് റഷ്ഫഡാണ് മറ്റൊന്ന് നേടിയത്. ജയം യുണൈറ്റഡ് പരിശീലകൻ ഒലേ ഗുണ്ണാർ സോൾചെയറിന് ആശ്വാസം നൽകുന്നതായി. പുറത്താക്കലിന്റെ വക്കത്തായിരുന്നു സോൾചെയർ. 10 കളിയിൽ 17 പോയിന്റുമായി അഞ്ചാമതാണ് യുണൈറ്റഡ്. ചെൽസി–-25 ഒന്നാമതും ലിവർപൂൾ–-22 രണ്ടാമതുമുണ്ട്. ചാമ്പ്യൻമാരായ മാഞ്ചസ്റ്റർ സിറ്റി (20) മൂന്നാമതാണ്.
