പ്രധാനമന്ത്രി മോദി നടത്തിയ വിദേശസന്ദർശനങ്ങളെല്ലാം വ്യക്തിപ്രഭാവത്തിന് ഉന്നൽ നൽകിയുള്ളതായിരുന്നു. എല്ലാ കാലത്തും അങ്ങനെ തന്നെയാണ് ഇക്കാര്യമുള്ളത്. രാജ്യത്തിൻ്റെ വികസനമോ വ്യാപാര – വ്യവസായ കരാറുകളോ അല്ല മോദിയുടെ വിദേശ സന്ദർശനത്തിൽ വിഷയമാകുന്നത്. ഇപ്പോൾ മാർപാപ്പയെ കാണാൻ പോകുന്നവർ ഇവിടെ തിരിച്ചെത്തിയാൽ ചെയ്യുന്നത് വർഗീയ പ്രവർത്തനങ്ങളാണ്. അതിനാൽ ഇത്തരം കൂടിക്കാഴ്ചകളിലെ അർഥമില്ലായ്‌മയാണ് വിലയിരുത്തപ്പെടേണ്ടതെന്നും കെപിസിസി പ്രസിഡൻ്റ് പറഞ്ഞതായി റിപ്പോർട്ടർ ടിവി റിപ്പോർട്ട് ചെയ്തു.
ജി 20 ഉച്ചകോടിയിൽ പങ്കെടുക്കാൻ റോമിലെത്തിയ പ്രധാനമന്ത്രി വത്തിക്കാനിൽ ഫ്രാൻസിസ് മാർപാപ്പയുമായി കൂടിക്കാഴ്ച നടത്തി. മാർപാപ്പയെ പ്രധാനമന്ത്രി ഇന്ത്യയിലേക്ക് ഔദ്യോഗികമായി ക്ഷണിച്ചു. ഒന്നേകാൾ മണിക്കൂറിലേറെ നേരം ചർച്ചകൾ നീണ്ടുനിന്നു. വിദേശകാര്യമന്ത്രി എൻ ജയശങ്കർ, ദേശീയ സുരക്ഷാ ഊപദേഷ്ടാവ് അജിത് ഡോവർ എന്നിവർ ഇന്ത്യൻ പ്രധാനമന്ത്രിക്കൊപ്പം ഉണ്ടായിരുന്നു.
മാർപാപ്പയുമായി നടത്തിയ കൂടിക്കാഴ്ച ഊഷ്‌മളമായിരുന്നുവെന്ന് പ്രധാനമന്ത്രി ട്വീറ്റ് ചെയ്തു. മാർപാപ്പയുമായി വിവിധ വിഷയങ്ങളിൽ ചർച്ച നടത്താൻ അവസരമുണ്ടായി. അദ്ദേഹത്തെ ഇന്ത്യയിലേക്ക് ക്ഷണിക്കുകയും ചെയ്തുവെന്നും അദ്ദേഹം പറഞ്ഞു. മാർപാപ്പയെ സന്ദർശിച്ച ശേഷം വത്തിക്കാൻ വിദേശകാര്യ സെക്രട്ടറി കർദിനാൾ പിയത്ര പരോളിൻ ഉൾപ്പെട്ട പ്രതിസംഘവുമായി മോദി കൂടിക്കാഴ്ച നടത്തി. മാർപാപ്പയെ വത്തിക്കാനിൽ സന്ദർശിക്കുന്ന അഞ്ചാമത്തെ പ്രധാനമന്ത്രിയാണ് നരേന്ദ്ര മോദി.
ഇന്ത്യയിൽ ക്രൈസ്തവരും മറ്റ് ന്യൂനപക്ഷങ്ങളും അനുഭവിക്കുന്ന ദുരിതം പ്രധാനമന്ത്രി മോദിയുമായുള്ള കൂടിക്കാഴ്ചയിൽ മാർപാപ്പ സൂചിപ്പിക്കുമെന്ന് സിറോ മലബാർ സഭാ മുൻ വക്താവ് ഫാദർ പോൾ തേലക്കാട്ട് വ്യക്തമാക്കിയിരുന്നു. “ആരും പീഡനത്തിന് വിധേയമാകരുതെന്ന സന്ദേശമായിരിക്കും മാർപാപ്പ ഇന്ത്യക്ക് നൽകുക. മാർപാപ്പയുടെ ഇന്ത്യ സന്ദർശനം അടുത്ത വർഷമുണ്ടാകുമെന്ന് പ്രതീക്ഷിക്കുന്നു. അതിനു വേണ്ട നടപടികൾ കേന്ദ്ര സർക്കാർ ചെയ്യുമെന്നാണ് പ്രതീക്ഷ”- പോൾ തേലക്കാട്ട് പറഞ്ഞതായി മീഡിയവൺ റിപ്പോർട്ട് ചെയ്തു.
