അണക്കെട്ടിലെ ജലനിരപ്പ് സംബന്ധിച്ച് ചർച്ചകൾക്ക് തയ്യാറാകണമെന്ന വിമർശനം കേരളത്തിനെതിരെ കോടതി നടത്തുകയും ചെയ്തു. ജലനിരപ്പ് എത്രയാകണമെന്ന് കോടതിയിൽ വാദിക്കാതെ തമിഴ്നാടുമായി ചർച്ച ചെയ്യാൻ തയ്യാറാകണമെന്നും ഇതൊരു രാഷ്ട്രീയ വിഷയമാക്കരുതെന്നുമായിരുന്നു കോടതിയുടെ പമാർശം. ഉദ്യോഗസ്ഥരുടെ ഭാഗത്ത് നിന്നുമുണ്ടാകുന്ന അനാസ്ഥ മൂലമാണ് ഇത്തരം വിഷയങ്ങളിൽ കോടതി ഇടപെടേണ്ടിവരുന്നതെന്നും സുപ്രീം കോടതി പറഞ്ഞു. കേസ് പരിഗണിക്കുന്നതുവരെ ജലനിരപ്പ് 137 അടിയിൽ നിർത്തണമെന്ന നിർദേശം തമിഴ്നാടിന് നൽകണമെന്ന കേരളത്തിൻ്റെ ആവശ്യമാണ് കോടതിയെ ചൊടിപ്പിച്ചത്.
കേരളവുമായും മേൽനോട്ട സമിതിയുമായും ആലോചിക്കുമെന്ന് തമിഴ്നാട് സുപ്രീം കോടതിയെ അറിയിച്ചു. മുല്ലപ്പെരിയാർ അണക്കെട്ടിനോട് ചേർന്നുള്ള പ്രദേശത്തെ ആളുകൾ ഭീതിയിലാണെന്നും ജലനിരപ്പ് 139 അടിയാക്കി ജലനിരപ്പ് നിർത്തണമെന്ന് കേരളം ആവശ്യപ്പെട്ടു. എന്നാൽ ജലനിരപ്പ് 139 അടിയാക്കി നിർത്തേണ്ട അടിയന്തര സാഹചര്യമുണ്ടോ എന്ന് ചോദിച്ച കോടതി മുല്ലപ്പെരിയാറിലെ സ്ഥിതി ജനങ്ങളുടെ സുരക്ഷയുമായി ബന്ധപ്പെട്ട വിഷയമാണെന്നും പറഞ്ഞു.
കേരളത്തിൽ പ്രളയം ഉണ്ടായ 2018ൽ മുല്ലപ്പെരിയാർ അണാക്കെട്ടിലെ ജലനിരപ്പ് 139 അടിയായി സുപ്രീം കോടതി നിജപ്പെടുത്തിയിരുന്നു. നിലവിൽ പ്രളയ സാഹചര്യം ഉള്ളതിനാൽ 2018ന് സമാനമായ രീതിയിൽ അണക്കെട്ടിലെ ജലനിരപ്പ് 139 അടിയായി നിലനിർത്തണമെന്ന് കേരളം സുപ്രീം കോടതിയോട് ആവശ്യപ്പെട്ടു. കേരളത്തിലെ കാലാവസ്ഥ പരിഗണിക്കുമ്പോൾ വരും ദിവസങ്ങളിൽ അണക്കെട്ട് സ്ഥിതി ചെയ്യുന്ന പ്രദേശത്ത് ശക്തമായ മഴയ്ക്ക് സാധ്യതയുണ്ടെന്നാണ് കാലാവസ്ഥ നിരിക്ഷണ കേന്ദ്രം വ്യക്തമാക്കുന്നതെന്നും കേരളം കോടതിയിൽ പറഞ്ഞു.
കേരളത്തിൻ്റെ ഈ വാദത്തെ തള്ളുന്ന നിലപടാണ് തമിഴ്നാട് സ്വീകരിച്ചത്. ഇടുക്കിയിൽ ശക്തമായ മഴ രേഖപ്പെടുത്തിയ 2018ൽ അണക്കെട്ടിലെ ജലനിരപ്പ് 139 അടി കടന്നിരുന്നു. അത്തരം സാഹചര്യമല്ല നിലവിൽ പ്രദേശത്ത് ഉള്ളതെന്ന് തമിഴ്നാട് കോടതിയെ അറിയിക്കുകയും ചെയ്തു. ഇന്ന് രാവിലെ അണക്കെട്ടിലെ ജലനിരപ്പ് 137.2 അടി ആണെന്ന് തമിഴ്നാട് സർക്കാർ സുപ്രീം കോടതിയെ അറിയിച്ചു.
മുല്ലപ്പെരിയാര് അണക്കെട്ടിലെ ജലനിരപ്പ് കുറക്കാന് അടിയന്തര നടപടി സ്വീകരിക്കണമെന്നാവശ്യപ്പെട്ട് മുഖ്യമന്ത്രി പിണറായി വിജയന് തമിഴ്നാട് മുഖ്യമന്ത്രി എം കെ സ്റ്റാലിന് കത്തയച്ചു. നേരത്തെ ജലനിരപ്പ് 133.45 അടി എത്തിയപ്പോള് ഉദ്യോഗസ്ഥ തലത്തില് ആശങ്ക അറിയിച്ചിരുന്നു. നിലവിലെ നീരൊഴുക്കും മഴ സാധ്യതയും കണക്കിലെടുക്കുമ്പോള് ജലനിരപ്പ് 142 അടിയിലേക്ക് എത്താല് സാധ്യതയുണ്ടെന്നാണ് വിലയിരുത്തൽ. അതിനാല് മുല്ലപ്പെരിയാറില് നിന്നും കൂടുതല് വെള്ളം തമിഴ്നാട്ടിലെ വൈഗാ അണക്കെട്ടിലേക്ക് കൊണ്ടുപോകണമെന്നും അണക്കെട്ടിന്റെ ഷട്ടര് തുറക്കുന്നതിന് 24 മണിക്കൂര് മുൻപ് കേരളത്തെ അറിയിക്കണമെന്നും കത്തില് കേരളം ആവശ്യപ്പെട്ടു.
142 അടിയാണ് മുല്ലപ്പെരിയാർ അണക്കെട്ടിൽ അനുവദനീയമായ പരമാവധി സംഭരണശേഷി. ജലനിരപ്പ് ഉയരുന്ന സാഹചര്യത്തിൽ ഡാമിൽ നിന്ന് പരമാവധി വെള്ളം കൊണ്ടുപോകണമെന്നും സ്പിൽവേയിലൂടെ വെള്ളം തുറന്ന് വിടണമെന്നും കേരളം നേരത്തെ തമിഴ്നാടിനോട് രേഖാമൂലം ആവശ്യപ്പെട്ടിരുന്നു. ഇക്കാര്യം കാണിച്ച് കേന്ദ്രസർക്കാരിനും കത്തയച്ചിട്ടുണ്ട്.
