കൊവിഡ് 19 മഹാമാരിയും ലോക്ക് ഡൗണും മൂലം ബസ വ്യവസായം പ്രതിസന്ധിയിലായ സാഹചര്യത്തിലാണ് പുതിയ ആവശ്യവുമായി ബസുടമകള്‍ രംഗത്തെത്തിയത്. മൂന്ന് വര്‍ഷം മുൻപായിരുന്നു കേരളത്തിൽ അവസാനമായി ബസ് ചാരര്‍ജ് വര്‍ധിപ്പിച്ചത്. 2018 മാര്‍ച്ചിൽ ബസ് ചാര്‍ജ് വര്‍ധിപ്പിക്കുമ്പോള്‍ അന്ന് ഒരു ലിറ്റര്‍ ഡീസലിൻ്റെ വില 66 രൂപ മാത്രമായിരുന്നു. ഒരു വര്‍ഷത്തിനിടെ മാത്രം ഡീസൽ വിലയിൽ രാജ്യത്ത് 26.58 രൂപയുടെ വര്‍ധനവുണ്ടായിട്ടുണ്ട്. കൊവിഡ് കാലത്ത് ബസുകളിൽ സാമൂഹിക അകലം ഏര്‍പ്പെടുത്തുന്നതിൻ്റെ ഭാഗമായി കിലോമീറ്റര്‍ നിരക്കിൽ 20 പൈസയുടെ വര്‍ധനവ് സര്‍ക്കാര്‍ അനുവദിച്ചിരുന്നെങ്കിലും ഇത് പര്യാപ്തമല്ലെന്ന് ബസുടമകള്‍ ചൂണ്ടിക്കാണിക്കുന്നതായി ഇതു സംബന്ധിച്ച മീഡിയ വൺ റിപ്പോര്‍ട്ടിൽ പറയുന്നു.
എന്നാൽ ബസുടമകളുടെ ആവശ്യം പരിഗണിച്ച് കഴിഞ്ഞ വര്‍ഷം ജൂലൈയിൽ മിനിമം നിരക്കിനുള്ള മാനദണ്ഡം പുതുക്കിയിരുന്നു. കുറഞ്ഞ ചാര്‍ജിൽ സഞ്ചരിക്കാവുന്ന ദൂരം അഞ്ച് കിലോമീറ്ററിൽ നിന്ന് രണ്ടര കിലോമീറ്ററായാണ് കുറച്ചത്.
Also Read:
മിനിമം ചാര്‍ജ് വര്‍ധനവിനൊപ്പം വിദ്യാര്‍ഥികളുടെ യാത്രാനിരക്കിലും കാലോചിതമായ പരിഷ്കാരം വേണമെന്നാണ് ബസുടമകള്‍ ആവശ്യപ്പെട്ടിട്ടുള്ളത്. വിദ്യാര്‍ഥികളുടെ കുറഞ്ഞ യാത്രാനിരക്ക് 6 രൂപയാക്കണമെന്ന് ബസുടമകള്‍ ആവശ്യപ്പെടുന്നതായാണ് റിപ്പോര്‍ട്ട്. കൂടാതെ സര്‍ക്കാരിൽ നിന്ന് നികുതിയിളവും തേടിയിട്ടുണ്ട്. ഇതോടൊപ്പം സ്പെയര്‍ പാര്‍ട്സ് വില വര്‍ധനവ്, ഇൻഷുറൻസ് നിരക്കിലെ വര്‍ധനവ് തുടങ്ങിയവയും കണക്കിലെടുത്ത് ജസ്റ്റിസ് രാമചന്ദ്രൻ കമ്മീഷൻ നല്‍കിയിരിക്കുന്ന ശുപാര്‍ശ ഉടൻ നടപ്പാക്കണമെന്നാണ് ബസുടമകള്‍ ആവശ്യപ്പെട്ടിരിക്കുന്നത്. ഇക്കാര്യം ആവശ്യപ്പെട്ട് പലവട്ടം സര്‍ക്കാരിനെ സമീപിച്ചെങ്കിലും അനുകൂല സാഹചര്യം ഉണ്ടാകാത്ത സാഹചര്യത്തിലാണ് സര്‍വീസുകള്‍ നിര്‍ത്തി വെച്ച് ബസുടമകള്‍ സമരത്തിന് ഒരുങ്ങുന്നതെന്നാണ് റിപ്പോര്‍ട്ട്.
Also Read:
നിരക്കുവര്‍ധന ആവശ്യപ്പെട്ട് ഒരു മാസം മുൻപും ബസുടമകള്‍ ഗതാഗതമന്ത്രി ആൻ്റണി രാജുവിന് നിവേദനം നല്‍കിയിരുന്നു. കഴിഞ്ഞ ഒന്നര വര്‍ഷമായി സ്വകാര്യ ബസ് വ്യവസായം വലിയ പ്രതിസന്ധി നേരിടുകയാണെന്നും പല ബസുകളും നിരത്തിലിറങ്ങുന്നില്ലെന്നും ഉടമകള്‍ ചൂണ്ടിക്കാട്ടി. നിലവിൽ 60 ശതമാനം ബസുകള്‍ മാത്രമാണ് സര്‍വീസ് നടത്തുന്നതെന്നും നഷ്ടം മൂലം ഓടാൻ സാധിക്കാത്തതാണ് മറ്റു ബസുകള്‍ നിരത്തിലിറങ്ങാത്തിനു കാരണമെന്നും അവര്‍ വ്യക്തമാക്കിയിരുന്നു. വിദ്യാര്‍ഥികളുടെ യാത്രാനിരക്ക് വര്‍ധിപ്പിക്കുന്നതുമായി ബന്ധപ്പെട്ട ചര്‍ച്ചയ്ക്ക് ബസുടമകള്‍ വിദ്യാഭ്യാസമന്ത്രി വി ശിവൻകുട്ടിയെയും കണ്ടിരുന്നു. ഓഗസ്റ്റ് 30നു മുൻപ് വിഷയത്തിൽ തീരുമാനമെടുക്കണമെന്നായിരുന്നു അവര്‍ സര്‍ക്കാരിനു മുന്നിൽ വെച്ചിരുന്ന നിര്‍ദേശം.
