‘രക്ഷിക്കണം സാർ, ജീവൻ എടുക്കരുത്.. പ്ലീസ്’; സ്റ്റാലിൻ്റെ ഫേസ്ബുക്ക് പേജ് ‘കയ്യേറി’ മലയാളികൾ

ചെന്നൈ: കേരളത്തിൽ മഴ ശക്തമായി തുടരുന്നതിനിടെ അണക്കെട്ടിൽ ജലനിരപ്പ് ആശങ്കപ്പെടുത്തുന്ന പശ്ചാത്തലത്തിൽ തമിഴ്നാട് മുഖ്യമന്ത്രി എം കെ സ്റ്റാലിൻ്റെ ഔദ്യോഗിക ഫേസ്ബുക്ക് പേജിൽ മലയാളികളുടെ അഭിപ്രായപ്രകടനം. ‘വെള്ളം എടുത്തോളൂ, ജീവൻ എടുക്കരുത്’ എന്ന കമൻ്റുകളാണുള്ളത്. മുല്ലപ്പെരിയാർ ഡാം അണക്കെട്ട് ഡി കമ്മീഷൻ ചെയ്യണമെന്ന കാമ്പയിൻ കേരളത്തിൽ ശക്തമാകുന്നതിനിടെയാണ് തമിഴ്നാട് മുഖ്യമന്ത്രിയുടെ ഫേസ്ബുക്ക് പേജിൽ അഭ്യർത്ഥനയുമായി എത്തിയത്.

#DecommisionMullaperiyarDam, #savemullaperiyar, #SaveKerala..’ എന്ന കാമ്പയിനാണ് സോഷ്യൽ മീഡിയയിൽ നടക്കുന്നത്. എം കെ സ്റ്റാലിന് ഏറെ ആരാധകരുള്ള സംസ്ഥാനമാണ് കേരളമെന്നും അതിനാൽ ഞങ്ങളുടെ ആവശ്യം പരിഗണിക്കണമെന്ന അഭിപ്രായമുണ്ട്. തമിഴ്നാടിന് വെള്ളം നൽകാൻ മടിയില്ലെന്നും, എന്നാൽ സുരക്ഷിതമാണെന്ന വാദം ഉപേക്ഷിക്കണമെന്നും കമൻ്റുകളുണ്ട്. പുതിയ അണക്കെട്ട് പണിയുന്നതിനിടെ എതിർക്കരുതെന്നും കമൻ്റുകളുണ്ട്. കേരള ജനത നിങ്ങളുടെ രാഷ്ട്രീയ നിലപാടുകളെ ബഹുമാനിക്കുന്നുണ്ട്, മുല്ലപ്പെരിയാറിൽ പുതിയ അണക്കെട്ട് എന്ന ഒരു അഭ്യർത്ഥന മാത്രമേ ഞങ്ങൾക്ക് ഉള്ളൂ. പുതിയ അണക്കെട്ട് വന്നാലും തമിഴ്നാടിന് വെള്ളമെടുക്കാൻ സാധിക്കുമെന്നും കമൻ്റുകളുണ്ട്.

മുല്ലപ്പെരിയാർ അണക്കെട്ട് കേരളത്തിലെ ജനങ്ങൾക്ക് വലിയ ഭീഷണിയാണെന്നാണ് ഒരു കമൻ്റ്. “കോൺക്രീറ്റ് ഉപയോഗിച്ച് നിർമ്മിച്ച അണക്കെട്ട് പോലും 50 വർഷം വരെ മാത്രമേ നിലനിൽക്കൂ എന്ന് എല്ലാവർക്കും അറിയാം. കോൺക്രീറ്റ് ഉപയോഗിക്കാതെയാണ് മുല്ലപ്പെരിയാർ അണക്കെട്ട് നിർമ്മിച്ചിരിക്കുന്നത്. അതിനാൽ അണക്കെട്ട് തകർന്നാൽ കുറഞ്ഞത് 50 ലക്ഷം ആളുകൾ എങ്കിലും മരിക്കും. അതിനൊപ്പം അഞ്ച് ജില്ലകൾ ഒലിച്ച് പോകുകയും ചെയ്യും. അയൽ സംസ്ഥാനമെന്ന നിലയിലും അണക്കെട്ടിൻ്റെ നിയന്ത്രണം കൈകാര്യം ചെയ്യുന്ന സംസ്ഥാനമെന്ന നിലയിലും വിഷയത്തിൽ കേരളത്തെ സഹായിക്കാൻ ഞങ്ങളെ സഹായിക്കണം. തമിഴ്നാടിന് മാത്രമേ ഞങ്ങളെ സഹായിക്കാൻ കഴിയൂ. വെള്ളം മുഴുവൻ നിങ്ങൾക്കുള്ളതാണ്. ദയവായി കേരള ജനതയുടെ ജീവൻ രക്ഷിക്കൂ. ഞങ്ങൾ മരിക്കാൻ ആഗ്രഹിക്കുന്നില്ല” – എന്നും ഒരാൾ കമൻ്റ് ചെയ്തു.

മുല്ലപ്പെരിയാർ അണക്കെട്ടിൽ ജലനിരപ്പ് 137 അടി കടന്നിട്ടുണ്ട്. 138 അടിയിലെത്തിയാൽ രണ്ടാമത്തെ അറിയിപ്പ് നൽകും. അണക്കെട്ടിൽ ജലനിരപ്പ് ഉയർന്നെങ്കിലും ആശങ്കപ്പെടേണ്ടെന്ന് ജില്ലാ ഭരണകൂടം വ്യക്തമാക്കി. ദേശീയ ദുരന്തനിവാരണ സേനയും റവന്യൂ സംഘവും സംയുക്തമായി മുല്ലപ്പെരിയാർ അണക്കെട്ടിനോട് ചേർന്ന് കിടക്കുന്ന പ്രദേശങ്ങളിൽ ബോധവത്കരണ പരിപാടികൾ ആരംഭിച്ചു. പെരിയാർ തീരത്ത് താമസിക്കുന്നവരുടെ ആശങ്കകൾ പരിഹരിക്കുന്നതിനായിരുന്നു നടപടി.

സംസ്ഥാനത്ത് മഴയുടെ ശക്തി കുറഞ്ഞതിനാൽ അണക്കെട്ടിലേക്കുള്ള നീരൊഴുക്ക് കുറഞ്ഞത് ആശ്വാസം പകരുന്നുണ്ട്. തമിഴ്നാട് കൊണ്ട് പോകുന്ന വെള്ളത്തിൻ്റെ അളവ് വർധിപ്പിക്കുകയും ചെയ്യുന്നുണ്ട്. മുല്ലപ്പെരിയാര്‍ അണക്കെട്ടിലെ ജലനിരപ്പ് കുറക്കാന്‍ അടിയന്തര നടപടി സ്വീകരിക്കണമെന്നാവശ്യപ്പെട്ട് മുഖ്യമന്ത്രി പിണറായി വിജയന്‍ തമിഴ്നാട് മുഖ്യമന്ത്രി എം കെ സ്റ്റാലിന് കത്തയച്ചു.

നേരത്തെ ജലനിരപ്പ് 133.45 അടി എത്തിയപ്പോള്‍ ഉദ്യോഗസ്ഥ തലത്തില്‍ ആശങ്ക അറിയിച്ചിരുന്നു. നിലവിലെ നീരൊഴുക്കും മഴ സാധ്യതയും കണക്കിലെടുക്കുമ്പോള്‍ ജലനിരപ്പ് 142 അടിയിലേക്ക് എത്താല്‍ സാധ്യതയുണ്ടെന്നാണ് വിലയിരുത്തൽ. അതിനാല്‍ മുല്ലപ്പെരിയാറില്‍ നിന്നും കൂടുതല്‍ വെള്ളം തമിഴ്നാട്ടിലെ വൈഗാ അണക്കെട്ടിലേക്ക് കൊണ്ടുപോകണമെന്നും അണക്കെട്ടിന്‍റെ ഷട്ടര്‍ തുറക്കുന്നതിന് 24 മണിക്കൂര്‍ മുൻപ് കേരളത്തെ അറിയിക്കണമെന്നും കത്തില്‍ കേരളം ആവശ്യപ്പെട്ടു.142 അടിയാണ് മുല്ലപ്പെരിയാർ അണക്കെട്ടിൽ അനുവദനീയമായ പരമാവധി സംഭരണശേഷി. ജലനിരപ്പ് ഉയരുന്ന സാഹചര്യത്തിൽ ഡാമിൽ നിന്ന് പരമാവധി വെള്ളം കൊണ്ടുപോകണമെന്നും സ്പിൽവേയിലൂടെ വെള്ളം തുറന്ന് വിടണമെന്നും കേരളം നേരത്തെ തമിഴ്നാടിനോട് രേഖാമൂലം ആവശ്യപ്പെട്ടിരുന്നു. ഇക്കാര്യം കാണിച്ച് കേന്ദ്രസർക്കാരിനും കത്തയച്ചിട്ടുണ്ട്.