പാര്‍ട്ടി മുന്നോട്ടു വെക്കുന്ന പത്ത് നിബന്ധനകള്‍ അംഗീകരിക്കുന്നവര്‍ക്ക് മാത്രമായിരിക്കും ഇനി കോൺഗ്രസ് അംഗത്വം നല്‍കുക. പാര്‍ട്ടിയുടെ അംഗത്വ ഫോമിൽ തന്നെ ഇക്കാര്യങ്ങള്‍ വ്യക്തമാക്കിയിട്ടുണ്ടെന്നാണ് ഇതു സംബന്ധിച്ച മാതൃഭൂമി റിപ്പോര്‍ട്ട്. പാര്‍ട്ടി നയങ്ങളെയും പരിപാടികളെയും പൊതവേദിയിൽ വിമര്‍ശിക്കില്ല, മദ്യവും മയക്കുമരുന്നും വര്‍ജിക്കും, നിയമപ്രകാരം അനുവദിച്ചിട്ടുള്ളതിൽ കൂടുതൽ സ്വത്തുവകകള്‍ കൈവശം വെച്ചിട്ടില്ല തുടങ്ങിയ കാര്യങ്ങളിലാണ് അംഗത്വം സ്വീകരിക്കുന്നവര്‍ സത്യവാങ്മൂലം നല്‍കേണ്ടത്. ഒരുരതത്തിലുമുള്ള സാമൂഹിക വിവേചനങ്ങളിൽ ഏര്‍പ്പെടില്ലെന്നും ഇവ നിര്‍മാര്‍ജനം ചെയ്യാനായി പ്രവര്‍ത്തിക്കുമെന്നും അംഗങ്ങള്‍ പ്രതിജ്ഞ ചെയ്യണം. അടുത്ത വര്‍ഷം മാര്‍ച്ച് 31 വരെയാണ് കോൺഗ്രസ് അംഗത്വ വിതരണം.
Also Read:
“ഞാൻ പതിവായി തനതു ഖാദി ധരിക്കുന്നയാളാണ്; ഞാൻ മദ്യപിക്കുകയോ ലഹരി ഉപയോഗിക്കുകയോ ഇല്ല; ഞാൻ സാമൂഹികവിവേചനമോ അസമത്വമോ കാണിക്കില്ല; ഇത്തരം വികലമായ കാര്യങ്ങൾ സമൂഹത്തിൽനിന്ന് നിർമാർജനം ചെയ്യുന്നതിനായി പ്രവർത്തിക്കുന്നതിൽ ഞാൻ വിശ്വസിക്കുന്നു; കായികാധ്വാനമുൾപ്പെടെ പ്രവർത്തകസമിതി ഏൽപ്പിക്കുന്ന ഏതു ജോലിയും ചെയ്യാൻ ഞാൻ സന്നദ്ധമാണ്” എന്നിങ്ങനെയാണ് അംഗത്വ ഫോമിലുളള സത്യവാങ്മൂലത്തിലെ പരാമര്‍ശങ്ങൾ.
മുൻപ് കെ സുധാകരൻ കെപിസിസി അധ്യക്ഷനായി ചുമതലയേറ്റതിനു പിന്നാലെ പാർട്ടിയെ പൊതുവേദിയിലും മാധ്യമങ്ങളിലും വിമർശിക്കുന്ന നേതാക്കൾക്കെതിരെ കർശന മുന്നറിയിപ്പ് നൽകിയിരുന്നു. പാർട്ടിയ്ക്കുള്ളിലെ ഗ്രൂപ്പിസത്തിനെതിരെയും സുധാകരൻ കർശന മുന്നറിയിപ്പ് നൽകിയിരുന്നു. പുതിയ ഡിസിസി പട്ടിക തയ്യാറാക്കിയപ്പോഴും ഗ്രൂപ്പുനേതാക്കളുടെ നിർദേശങ്ങൾ അവഗണിച്ചതായി ആരോപണം ഉയർന്നിരുന്നു.
വരുന്ന ലോക്സഭാ തെരഞ്ഞെടുപ്പിനു മുന്നോടിയായി കോൺഗ്രസിനെ സെമി കേഡര്‍ ശൈലിയിലേയ്ക്ക് മാറ്റാനും പാര്‍ട്ടിയിൽ തെരഞ്ഞെടുപ്പ് നടത്തി പുതിയ അധ്യക്ഷനെ കണ്ടെത്താനുമാണ് കോൺഗ്രസ് പദ്ധതിയിടുന്നത്. അടുത്ത വര്‍ഷം ഓഗസ്റ്റ് 21നും സെപ്റ്റംബര്‍ 30നും ഇടയിൽ പുതിയ ദേശീയ അധ്യക്ഷനെ തെരഞ്ഞെടുക്കുമെന്നാണ് കോൺഗ്രസ് പ്രവര്‍ത്തകസമിതി അംഗീകരിച്ച സമയക്രമത്തിൽ വ്യക്തമാക്കുന്നത്.
Also Read:
അതേസമയം, പഞ്ചാബും ഗുജറാത്തും അടക്കുള്ള സംസ്ഥാനങ്ങളിൽ നടക്കാനിരിക്കുന്ന നിയമസഭാ തെരഞ്ഞെടുപ്പുകള്‍ക്കുള്ള മുന്നൊരുക്കങ്ങള്‍ കോൺഗ്രസ് ആരംഭിച്ചു. അഞ്ച് സംസ്ഥാനങ്ങളിലെ നിയമസഭാ തെരഞ്ഞെടുപ്പുകള്‍ക്കുള്ള തന്ത്രങ്ങള്‍ രൂപപ്പെടുത്താനായി നേതാക്കള്‍ ചൊവ്വാഴ്ച രാവിലെ അടിയന്തര യോഗം ചേരും. ഡൽഹിയിലെ എഐസിസി ആസ്ഥാനത്താണ് യോഗം നടക്കുക. ജനറൽ സെക്രട്ടറിമാര്‍, ഇൻ ചാര്‍ജുമാര്‍, പിസിസി അധ്യക്ഷന്മാര്‍ തുടങ്ങിവയരാണ് യോഗത്തിൽ പങ്കെടുക്കുക.
