അലമാര നിറയെ പണം! വൈറൽ ചിത്രത്തിന് പുറകിലെ സത്യമെന്ത്?

കഴിഞ്ഞ കുറച്ച് ദിവസങ്ങളായി സമൂഹ മാധ്യമങ്ങളിൽ വൈറലാവുന്ന ചിത്രമാണ് ഒരു അലമാര നിറയെ പണം. അഞ്ഞൂറ് രൂപയുടെ നോട്ടുകൾ പല കെട്ടുകളിലായാണ് ഒരു അലമാര നിറയെ അടുക്കി വച്ചിരിക്കുന്നത്. ചിത്രം വൈറലായതിനെ തുടർന്ന് പലരും പല വിവരണങ്ങളുമായെത്തി. ചിലർ മുകേഷ് അംബാനിയുടെ വീട്ടിലെ അലമാര എന്ന് തട്ടി വിട്ടപ്പോൾ മറ്റു ചില വിരുതന്മാർ തട്ടി വിട്ടത് ഒസാമ ബിൻ ലാദൻ ഒളിച്ചിരുന്ന സ്ഥലത്തെ അലമാരയുടെ ചിത്രമാണ് എന്നാണ്. യഥാത്ഥത്തിൽ എന്താണ് വൈറലായ ചിത്രത്തിന് പുറകിലെ സത്യം? എവിടെ നിന്നുള്ളതാണ് ഈ ചിത്രം?

ഹൈദരാബാദ് ആസ്ഥാനമായുള്ള ഒരു ഫാർമസ്യൂട്ടിക്കൽ കമ്പനിയിൽ നിന്ന് കണ്ടെടുത്ത 550 കോടി രൂപയുടെ കണക്കിൽപ്പെടാത്ത വരുമാനത്തിൻ്റെ ഒരു ഭാഗം മാത്രമാണിത്. ഈ മാസം ആറിനാണ് റൈഡ് നടത്തിയത് എന്ന് ആദായനികുതി വകുപ്പ് വ്യക്തമാക്കുന്നുണ്ട്. തിരച്ചിലിൽ നിരവധി ബാങ്ക് ലോക്കറുകൾ കണ്ടെത്തിയെന്നും അതിൽ 16 ലോക്കറുകൾ തുറന്നു എന്നുമാണ് ടൈംസ് നൗ റിപ്പോർട്ട് ചെയുന്നത്. ഹൈദരാബാദ് കൂടാതെ ആറ് സംസ്ഥാനങ്ങളിലായി 50 ലധികം സ്ഥലങ്ങൾ ഒരേ സമയ തിരച്ചിൽ നടത്തിയിട്ടുണ്ട് എന്ന് ആദായനികുതി വകുപ്പ് പറയുന്നു.

പണം കൂടാതെ ഡിജിറ്റൽ മീഡിയ, പെൻ ഡ്രൈവുകൾ, രേഖകൾ തുടങ്ങിയവയുടെ രൂപത്തിൽ കുറ്റകരമായ തെളിവുകൾ കണ്ടെത്തി പിടിച്ചെടുത്തു. കൂടാതെ, ഭൂമി വാങ്ങുന്നതിന് പണമടച്ചതിന്റെ തെളിവുകളും കണ്ടെത്തി. ഇതുവരെ കണ്ടെത്തിയിട്ടില്ലാത്ത കണക്കിൽപ്പെടാത്ത വരുമാനം ഏകദേശം 550 കോടിയോളം വരും. കണ്ടെത്തിയ വെളിപ്പെടുത്താത്ത വരുമാനത്തിന്റെ കൂടുതൽ അന്വേഷണങ്ങളും അളവുകളും പുരോഗമിക്കുകയാണ്.

യുഎസ്എ, യൂറോപ്പ്, ദുബായ്, ആഫ്രിക്കൻ രാജ്യങ്ങളിലേക്ക് കയറ്റുമതി ചെയ്യുന്നതാണ് ഫാർമസ്യൂട്ടിക്കൽ ഗ്രൂപ്പിന്റെ മിക്ക ഉൽപ്പന്നങ്ങളും. ആക്റ്റീവ് ഫാർമസ്യൂട്ടിക്കൽ ഇൻഗ്രിഡിയൻ്റുകളുടെ (എപിഐ) നിർമ്മാണത്തിലും ഈ കമ്പനി ഏർപ്പെട്ടിരുന്നത്രെ.

അതെ സമയം പണം നിറഞ്ഞ അലമാരയുടെ ചിത്രം വൈറലായതോടെ നിരവധി പേരാണ് നർമം കലർന്ന കമന്റുകളുമായി രംഗത്തെത്തിയിരിക്കുന്നത്. “അവർ രണ്ടായിരത്തിന്റെ നോട്ടുകൾ ഉപയോഗിച്ചിരുന്നെങ്കിൽ 75 ശതമാനം സ്ഥലത്ത് അവർക്ക് വസ്ത്രങ്ങൾക്കായി ഉപയോഗിക്കാമായിരുന്നു” എന്നാണ് ഒരാളുടെ കമന്റ്. അതെ സമയം നാളെ മുതൽ “ഈ ചിത്രം ഫോർവേഡ് ചെയ്യുക, നിങ്ങൾ ഇത് അവഗണിക്കുകയാണെങ്കിൽ ഈ ദീപാവലിക്ക് നിങ്ങൾക്ക് പണമുണ്ടാകില്ല” എന്നിങ്ങനെ ഫോർവേഡ് മെസ്സേജുകൾ ആരംഭിക്കും എന്നാണ് മറ്റൊരാളുടെ കമന്റ്.