സംസ്ഥാനത്ത് പ്രതീക്ഷിച്ചതിനെക്കാൾ കൂടുതൽ മഴ; പല ജില്ലകളും ‘കണക്കുകൾ’ തെറ്റിച്ചു

കൊച്ചി: കേരളത്തിൽ പല ജില്ലകളിലും ശക്തമായി തുടരുകയാണ്. ഇടിയോടുകൂടിയ മഴ തുടരുമെന്ന മുന്നറിയിപ്പുള്ളതിനാൽ പല ജില്ലകളിലും കേന്ദ്ര കാലാവസ്ഥ വകുപ്പ് അലേർട്ട് പ്രഖ്യാപിച്ചിട്ടുണ്ട്. മഴ തുടരുമെന്ന സൂചന അധികൃതർ നൽകുമ്പോഴും സംസ്ഥാനത്ത് പ്രതീക്ഷിച്ചതിനേക്കാൾ കൂടുതൽ മഴ ലഭിച്ചതായി റിപ്പോർട്ട്.

ഒക്ടോബർ പകുതി കഴിഞ്ഞപ്പോഴേക്കും പ്രതീക്ഷിച്ചതിനേക്കാൾ കൂടുതൽ മഴ സംസ്ഥാനത്തിന് ലഭിച്ചതായി മാതൃഭൂമി റിപ്പോർട്ട് ചെയ്തു. പല ജില്ലകളിലും ഇക്കൊല്ലം തുലാവർഷക്കാലത്ത് പൂർണമായി ലഭിക്കുമെന്ന് പ്രതീക്ഷിച്ചിരുന്ന മഴ ഇതിനകം ലഭിച്ചു. ഒക്ടോബർ പതിനേഴുവരെ 412.2 മില്ലിമീറ്റർ മഴയാണ് സംസ്ഥാനത്തിന് ലഭിച്ചത്. ഒക്ടോബർ ഒന്ന് മുതൽ ഡിസംബർ 31വരെയുള്ള തുലാവർഷക്കാലത്ത് ലഭിക്കേണ്ട മഴയുടെ 84 ശതമാനമാണിത്. 492 മില്ലിമീറ്റർ മഴയാണ് ഇക്കാലയളവിൽ പ്രതീക്ഷിച്ചിരുന്നത്.

മറ്റ് ജില്ലകളുമായി താരതമ്യം ചെയ്യുമ്പോൾ പലപ്പോഴും കുറഞ്ഞ തോതിൽ മഴ ലഭിക്കുന്ന കാസർകോട് ജില്ലയിൽ 344 മില്ലിമീറ്റർ മഴ പ്രതീക്ഷിച്ചപ്പോൾ ഒക്ടോബർ 13വരെ 406 മില്ലീമീറ്റർ മഴയാണ് ജില്ലയിൽ ലഭിച്ചത്. തുലാവർഷക്കാലത്ത് കണ്ണൂർ ജില്ലയിൽ 376 മില്ലിമീറ്റർ മഴയുണ്ടാകുമെന്ന് പ്രതീക്ഷിച്ചപ്പോൾ ഒക്ടോബർ 18ന് മുൻപായി 441 മില്ലിമീറ്റർ മഴയാണ് ജില്ലയിൽ ലഭിച്ചത്. 450 മില്ലീമീറ്റർ മഴ പ്രതീക്ഷിച്ച കോഴിക്കോട് ജില്ലയിൽ 515 മില്ലിമീറ്റർ മഴ ലഭിച്ചു.

വരും ദിവസങ്ങളിൽ ശക്തമായ മഴയ്ക്ക് മുന്നറിയിപ്പ് നൽകിയ പശ്ചാത്തലത്തിൽ തെക്കൻ കേരളത്തിൽ മഴയുടെ അളവ് 100 ശതമാനത്തിലധികമാകുമെന്നാണ് പ്രതീക്ഷിക്കുന്നത്.

മഴ നാശം വിതച്ച കോട്ടയം, ഇടുക്കി ജില്ലകളിലും പാലക്കാട് ജില്ലയിലും 90 ശതമാനം മഴ ലഭിച്ചപ്പോൾ മലപ്പുറം ജില്ലയിൽ മാത്രം 86 ശതമാനം മഴ ഇതുവരെ പെയ്തുകഴിഞ്ഞു. പത്തനംതിട്ട ജില്ലയിൽ ഈ സീസണിൽ ലഭിക്കേണ്ട മഴയുടെ 97 ശതമാനം പെയ്തു. ശക്തമായ മഴയിൽ ജില്ലയിലെ ജലവൈദ്യുതി പദ്ധതിയുടെ ഭാഗങ്ങളിലെല്ലാം നല്ല മഴ ലഭിച്ചു. സംസ്ഥാനത്തെ വൈദ്യുതി പദ്ധതികളിലെല്ലാം പ്രതിദിന ഉത്പാദനത്തിനാവശ്യമായതിൻ്റെ ഇരട്ടി മുതൽ നാലിരട്ടിവരെ വെള്ളം ഒഴുകിയെത്തി. ചുരുങ്ങിയ ദിവസങ്ങൾക്കൊണ്ടാണ് പദ്ധതികൾക്ക് ആവശ്യമായ വെള്ളം ലഭിച്ചതെന്നാണ് ശ്രദ്ധേയം. മഴ ശക്തമാകുന്ന തുലാവർഷക്കാലത്താണ് സംസ്ഥാനത്തെ പ്രധാന സംഭരണികൾ വെള്ളം സംഭരിക്കപ്പെടുന്നത്. എന്നാൽ ഇക്കൊല്ലം എല്ലാ പദ്ധതി സംഭരണികളും പ്രതീക്ഷിച്ചതിലധികം മഴ ലഭിച്ചതോടെ പല സംഭരണികളും തുറന്നുവിടേണ്ട സാഹചര്യമുണ്ടായി.

അതേസമയം, ഇടുക്കി അണക്കെട്ടിൽ നിന്ന് തുറന്ന് വിട്ടത് 18.30 കോടി രൂപയുടെ വൈദ്യുതി ഉൽപ്പാദിപ്പിക്കാൻ ആവശ്യമായ വെള്ളമാണെന്ന് ഏഷ്യാനെറ്റ് ന്യൂസ് റിപ്പോർട്ട് ചെയ്തു. നാല് കോടി യൂണിറ്റ് വൈദ്യുതി ഉൽപ്പാദിപ്പിക്കാനുള്ള വെള്ളമാണ് മൂന്ന് ദിവസം കൊണ്ട് ഒഴുക്കിയത്. സെക്കൻ്റിൽ ഒരു ലക്ഷത്തി അയ്യായിരം ലീറ്റർ വെള്ളം വീതം പുറത്തേക്ക് ഒഴുകിയപ്പോൾ മണിക്കൂറിൽ 378 ദശലക്ഷം ലീറ്റർ വെള്ളം അണക്കെട്ടിൽ നിന്നും പുറത്തേക്ക് പോയി. 74 മണിക്കൂർ കഴിഞ്ഞ് രണ്ടു ഷട്ടറുകൾ അടച്ചു. ഈ സമയം കൊണ്ട് 27,657 ദശലക്ഷം ലീറ്റർ വെളളം ഒഴുകി. സംസ്ഥാനത്തെ പ്രധാന വൈദ്യുതി പദ്ധതിയായ ഇടുക്കി പദ്ധതിയുടെ മൂലമറ്റം വൈദ്യുത നിലയത്തിൽ ഒരു യൂണിറ്റ് വൈദ്യുതി ഉത്പ്പാദിപ്പിക്കാൻ വേണ്ടത് 680 ലീറ്റർ വെള്ളമാണ്.