ദുരിതാശ്വാസ പ്രവർത്തനങ്ങളിൽ കുറവുണ്ടെങ്കിൽ ചൂണ്ടിക്കാണിക്കണമെന്നാണ് മുഖ്യമന്ത്രി പിണറായി വിജയൻ പറഞ്ഞത്. മുഖ്യമന്ത്രിക്കെതിരെ ആക്രോശിക്കുന്നതിനു പകരം ക്രിയാത്മക നിലപാട് സ്വീകരിക്കുകയാണ് വേണ്ടത്. എന്തു പ്രശ്നമുണ്ടായാലും മുഖ്യമന്ത്രി വ്യക്തിപരമായി അധിക്ഷേപിക്കുന്നതാണ് പ്രതിപക്ഷ നേതാവിന്റെ ശൈലി. രാഷ്ട്രീയമായി നേരിടാൻ സാധിക്കാത്തതുകൊണ്ടാണ് ഈ അധഃപതനം. മുഖ്യമന്ത്രിയെ വിമർശിക്കുന്ന സതീശൻ നരേന്ദ്ര മോദിക്ക് ഗുഡ് സർട്ടിഫിക്കറ്റ് നൽകുകയാണെന്നും വിജയരാഘവൻ ആരോപിച്ചു.
രക്ഷാപ്രവർത്തനം വൈകിയെന്ന പ്രതിപക്ഷ നേതാവിന്റെ ആരോപണം വസ്തുതാവിരുദ്ധമാണ്. മുൻ പ്രതിപക്ഷ നേതാവിനേക്കാളും മുന്നിലാണ് മുഖ്യമന്ത്രിയെ വിമർശിക്കുന്ന കാര്യത്തിൽ താനെന്ന് വരുത്തിതീർക്കാനുള്ള വ്യഗ്രതയിൽ നിന്നാണ് ഇത്തരത്തിലുള്ള പരാമർശങ്ങൾ വരുന്നതെന്നും വിജയരാഘവൻ ആരോപിച്ചു.
അതേസമയം സംസ്ഥാനത്തെ കാലാവസ്ഥാ മുന്നറിയിപ്പ് സംവിധാനം പരാജയപ്പെട്ടെന്നാണ് പ്രതിപക്ഷ നേതാവിന്റെ ആരോപണം. നദികളിൽ വെള്ളം ഉയർന്നാൽ എവിടെയൊക്കെ വെള്ളം കയറുമെന്ന് സർക്കാർ പഠിച്ചിട്ടില്ലെന്നും സതീശൻ കുറ്റപ്പെടുത്തി. പ്രളയത്തെ പ്രതിരോധിക്കുന്നതിലും കൈകാര്യം ചെയ്യുന്നതിലും സർക്കാർ വൻ പരാജയമാണെന്നും സതീശൻ ആരോപിച്ചു.
പ്രളയവുമായി ബന്ധപ്പെട്ട മുന്നറിയിപ്പ് സംവിധാനം മെച്ചപ്പെടുത്തണമെന്ന് ആവശ്യപ്പെട്ടുള്ള നാല് അടിയന്തര പ്രമേയങ്ങൾ നിയമസഭയിൽ അവതരിപ്പിച്ചിരുന്നു. വിമർശനങ്ങൾ അംഗീകരിക്കാനോ കേൾക്കാനോ സാധിക്കാത്ത അവസ്ഥയിലാണ് മുഖ്യമന്ത്രി. അദ്ദേഹം സ്തുപാടകരുടെ നടുവിലാണെന്നും സതീശൻ പറഞ്ഞു.
കോട്ടയം, ഇടുക്കി ജില്ലകളുടെ അതിർത്തി പ്രദേശത്ത് ഉരുൾപൊട്ടൽ ഉണ്ടായ ശേഷം ഉച്ചയ്ക്ക് ഒരുമണിക്കാണ് ജാഗ്രതാ നിർദ്ദേശം പുറപ്പെടുവിച്ചത്. കൊക്കയാറിൽ അപകടമുണ്ടായി 21 മണിക്കൂറിന് ശേഷമാണ് സർക്കാർ സംവിധാനം രക്ഷാപ്രവർത്തനത്തിന് എത്തിയത്. ജനപ്രതിനിധി എത്തിയപ്പോൾ പോലും സർക്കാർ സംവിധാനം രക്ഷാപ്രവർത്ത രംഗത്ത് ഉണ്ടായിരുന്നില്ല. പിന്നെ എന്ത് ആവശ്യമാണ് സർക്കാരിനെക്കൊണ്ട് ഉള്ളതെന്നും പ്രതിപക്ഷ നേതാവ് ചോദിച്ചു.
