പാലക്കാട് അട്ടപ്പാടിയിലെ കോട്ടത്തറ സര്‍ക്കാര്‍ ട്രൈബല്‍ സ്‌പെഷ്യാലിറ്റി ആശുപത്രിക്ക് മികച്ച ആശുപത്രികള്‍ക്ക് ലഭിക്കുന്ന കായകല്‍പ്പ പുരസ്‌കാരം ലഭിച്ചിട്ടുണ്ട്. പക്ഷേ, ആശുപത്രിയെ ഉന്നതിയിലേക്ക് ഉയര്‍ത്തുന്നതില്‍ പങ്കുവഹിച്ച താല്‍ക്കാലിക ജീവനക്കാര്‍ക്ക് ശമ്പളം ലഭിച്ചിട്ട് മൂന്നുമാസമായി. അട്ടപ്പാടിയിലെ ആദിവാസി വിഭാഗങ്ങളില്‍ നിന്നുള്ളവര്‍ അടക്കമുള്ള 140ഓളം താല്‍ക്കാലിക ജീവനക്കാര്‍ക്കാണ് ശമ്പളം മുടങ്ങിയിരിക്കുന്നത്.
താല്‍ക്കാലിക അടിസ്ഥാനത്തില്‍ ജീവനക്കാരെ നിയമിക്കുന്നുണ്ടെന്ന പരസ്യത്തെ തുടര്‍ന്നാണ് ജോലിക്ക് അപേക്ഷ നല്‍കിയതെന്ന് ആംബുലന്‍സ് ഡ്രൈവറായ റോബര്‍ട്ട് തങ്കച്ചന്‍
സമയം പ്ലസിനോട് പറഞ്ഞു.
”ആംബുലന്‍സ് ഡ്രൈവ് ചെയ്തുള്ള പരിചയവും ഹെവി ലൈസന്‍സുമാണ് മൂന്നു വര്‍ഷം മുമ്പ് ജോലി ലഭിക്കാന്‍ സഹായിച്ചത്. കെ.കെ ഷൈലജ ആരോഗ്യമന്ത്രിയായിരുന്ന കാലത്ത് ഒരു മാസത്തെ ശമ്പളം അടുത്തമാസം തന്നെ ലഭിക്കുമായിരുന്നു. ഒരിക്കലും കുടിശിഖയുണ്ടാവാറില്ല. പക്ഷേ, ഇപ്പോള്‍ മൂന്നുമാസമായി ശമ്പളം ലഭിച്ചിട്ടില്ല.”– റോബര്‍ട്ട് പറയുന്നു.
അട്ടപ്പാടിയിലെ വിദൂര ഗ്രാമങ്ങളിലെ വിദഗ്ധ ചികില്‍സ ആവശ്യമായ രോഗികളെ മൂന്നും നാലും മണിക്കൂര്‍ ഡ്രൈവ് ചെയ്ത് 130ഉം 145ഉം കിലോമീറ്റര്‍ അകലെയുള്ള തൃശൂര്‍, കോഴിക്കോട് മെഡിക്കല്‍ കോളേജ് ആശുപത്രികളില്‍ എത്തിക്കേണ്ടി വരുന്നു. ഗുരുതരാവസ്ഥയിലുള്ള രോഗികളെയും ഗര്‍ഭിണികളെയുമാണ് മോശമായ മണ്ണാര്‍ക്കാട് ചുരം റോഡിലൂടെ സൂക്ഷ്മതയോടെ കൊണ്ടുപോവുന്നത്. ആംബുലന്‍സ് ഡ്രൈവര്‍ പോസ്റ്റിന് പുറമെ ക്ലീനിങ്, നഴ്‌സിങ് തുടങ്ങി മറ്റു മേഖലകളിലും താല്‍ക്കാലിക ജീവനക്കാരുണ്ട്. — റോബര്‍ട്ട് പറഞ്ഞു.
ശമ്പളം ചോദിക്കുമ്പോള്‍ മന്ത്രിക്കു നിവേദനം നല്‍കിയിട്ടുണ്ടെന്നാണ് അധികൃതര്‍ പറയുന്നതെന്ന് താല്‍ക്കാലിക ജീവനക്കാര്‍ ആരോപിക്കുന്നു. പക്ഷേ, ഫണ്ട് എപ്പോള്‍ വരുമെന്നോ ശമ്പളം എപ്പോള്‍ ലഭിക്കുമെന്നോ അവര്‍ ഉറപ്പ് നല്‍കുന്നില്ലത്രെ. ശമ്പളമില്ലാതെ തുടരാന്‍ പ്രയാസമാണെങ്കില്‍ പിരിഞ്ഞു പോയ്‌ക്കോളൂ എന്നും അധികാരികള്‍ പറഞ്ഞെന്ന് റോബര്‍ട്ട് ആരോപിക്കുന്നു.
”ഉള്ള ജോലിയും പോവുമെന്ന് കരുതിയാണ് പലരും പ്രതികരിക്കാത്തത്. താല്‍ക്കാലിക ജീവനക്കാരുടെ അധ്വാനം കൂടി ഉപയോഗിച്ച് വളര്‍ന്ന ആശുപത്രി ഇപ്പോള്‍ ഒരു കോര്‍പറേറ്റ് സ്ഥാപനം പോലെയാണ് പ്രവര്‍ത്തിക്കുന്നത്. ആശുപത്രിയുടെ പുരോഗതിയില്‍ അവര്‍ക്കുള്ള പങ്ക് അധികൃതര്‍ മറക്കുകയാണ്. ആശുപത്രി മിന്നിത്തിളങ്ങുമ്പോള്‍ താല്‍ക്കാലിക ജീവനക്കാര്‍ കൊടുംദുരിതത്തിലാണ്. വനത്തില്‍ കണ്ടെത്തുന്ന ജീര്‍ണിച്ച മൃതദേഹങ്ങള്‍ വരെ ഞങ്ങള്‍ പോസ്റ്റ്‌മോര്‍ട്ടത്തിനായി കൊണ്ടു പോവാറുണ്ട്. കഴിഞ്ഞ ദിവസം ആനയുടെ ചവിട്ടേറ്റു മരിച്ച നിലയില്‍ കണ്ടെത്തിയ മൃതദേഹത്തിന് നാലു ദിവസത്തോളം പഴക്കമുണ്ടായിരുന്നു.”– റോബര്‍ട്ട് പറയുന്നു.
തുടക്കകാലത്തുണ്ടായിരുന്ന 54 കിടക്കകള്‍ക്ക് അനുസൃതമായ സ്റ്റാഫ് പാറ്റേണ്‍ ഇപ്പോഴും ആശുപത്രിയിലുള്ളത്. 2017 മേയില്‍ നൂറ് കിടക്കകള്‍ കൂടി അനുവദിച്ചു. പക്ഷേ, ജീവനക്കാരെ താല്‍ക്കാലിക അടിസ്ഥാനത്തിലാണ് നിയമിച്ചത്. പി.എസ്.സി വഴി നിയമനം ലഭിച്ചവര്‍ക്ക് റിസ്‌ക് അലവന്‍സും മറ്റു ആനുകൂല്യങ്ങളും ലഭിക്കുമ്പോളും താല്‍ക്കാലിക ജീവനക്കാര്‍ക്ക് ശമ്പളം പോലും ലഭിക്കുന്നില്ല. വിഷയത്തില്‍ പട്ടികജാതി പട്ടിക വര്‍ഗ കമ്മീഷന്‍ നേരത്തെ ഇടപെട്ടിരുന്നു.
താല്‍ക്കാലിക ജീവനക്കാര്‍ക്ക് ശമ്പളം നല്‍കാന്‍ കഴിയാത്ത അവസ്ഥയെ തുടര്‍ന്ന് ആരോഗ്യമന്ത്രി വീണാ ജോര്‍ജിനെ കാണാന്‍ തിരുവനന്തപുരത്ത് പോയിരുന്നതായി അട്ടപ്പാടി ബ്ലോക്ക് പഞ്ചായത്ത് പ്രസിഡന്റ് മരുതി മുരുഗന്‍ സമയം മലയാളത്തോട് പറഞ്ഞു. പക്ഷേ, നിപാ വൈറസ് പ്രശ്‌നം പഠിക്കാന്‍ മന്ത്രി കോഴിക്കോട്ടേക്ക് അടിയന്തിരമായി പോയി. അതിനാല്‍, പ്രശ്‌നം മന്ത്രിയുടെ ഓഫീസിനെ ബോധിപ്പിച്ചു. പിന്നീട് ആദിവാസി വികസന ഫണ്ടില്‍ നിന്ന് 50 ലക്ഷം രൂപ ലഭിച്ചു. ശമ്പളം പ്രശ്‌നം ചര്‍ച്ച ചെയ്യാന്‍ പിന്നീട് വൈസ് പ്രസിഡന്റ് അടക്കമുള്ളവര്‍ തിരുവനന്തപുരത്ത് പോയിരുന്നു.
ആശുപത്രിയിലെ കൊവിഡ് വാര്‍ഡ് പിരിച്ചുവിടണമെന്ന നിര്‍ദേശം പാലിച്ചു കഴിഞ്ഞതായും മരുതി മുരുഗന്‍ പറഞ്ഞു. പക്ഷെ, ഒരു ഡോക്ടര്‍ അടക്കം എട്ട് പേരെ ഉള്‍പ്പെടുത്തി അഗളിയില്‍ കൊവിഡ് സെന്റര്‍ തുറന്നിട്ടുണ്ട്. ”കോട്ടത്തറ ആശുപത്രിയില്‍ നിലവില്‍ 98 പേരാണ് താല്‍ക്കാലിക അടിസ്ഥാനത്തില്‍ ജോലി ചെയ്യുന്നത്. ഇതില്‍ 84 പേര്‍ മതിയെന്നാണ് ജില്ലാ മെഡിക്കല്‍ ഓഫീസര്‍ അറിയിച്ചിരിക്കുന്നത്.
കൊവിഡ് വാര്‍ഡ് പൂട്ടിയതിനെ തുടര്‍ന്ന് ആശുപത്രിയില്‍ ശസ്ത്രക്രിയയും മറ്റും പുനരാംരഭിച്ചു. പേ-വാര്‍ഡുകളും തുറന്നു. കാന്‍റീനും സജീവമായി. സര്‍ക്കാര്‍ ഫണ്ട് കിട്ടുന്നതു വരെ പേവാര്‍ഡുകളിലെയും കാന്റീനിലെയും വരുമാനം ഉപയോഗിച്ച് താല്‍ക്കാലിക ജീവനക്കാര്‍ക്ക് ശമ്പളം നല്‍കും. അതിന് വേണ്ട നിര്‍ദേശം അക്കൗണ്ടന്റിന് നല്‍കിയിട്ടുണ്ട്.”– മരുതി മുരുഗന്‍ വിശദീകരിച്ചു.
താല്‍ക്കാലിക ജീവനക്കാര്‍ക്ക് ശമ്പളം ലഭിക്കാത്ത വിഷയം ആദിവാസി വികസന വകുപ്പിനെ അറിയിച്ചിരുന്നതായി മണ്ണാര്‍ക്കാട് എം.എല്‍.എ അഡ്വ. എന്‍.ശംസുദ്ദീന്‍
സമയം പ്ലസിനോട് പറഞ്ഞു. ഏകദേശം ഒന്നരമാസം മുമ്പായിരുന്നു സംഭവം. പക്ഷെ, അവര്‍ക്ക് ശമ്പളം ലഭിക്കാത്ത പശ്ചാത്തലത്തില്‍ വിഷയം നിയമസഭയില്‍ ഉന്നയിക്കും. വിഷയത്തിന്റെ ഗൗരവം മന്ത്രിമാരെ നേരില്‍ അറിയിക്കാനും തീരുമാനിച്ചിട്ടുണ്ട്.”– അഡ്വ. എന്‍.ശംസുദ്ദീന്‍ വ്യക്തമാക്കി.
ശമ്പളം മുടങ്ങിയ വിഷയത്തില്‍ പ്രതികരണംതേടി ഡി.എം.ഒ ഡോ. റീത്ത കെ.പിയെ തുടര്‍ച്ചയായി
സമയം പ്ലസ് ടെലിഫോണില്‍ ബന്ധപ്പെട്ടിരുന്നു. ഔദ്യോഗിക ജോലിയുടെ ഭാഗമായി തിരക്ക് ആയതിനാല്‍ പ്രതികരണം ലഭ്യമായിട്ടില്ല. ഇത് കിട്ടുന്ന മുറയ്ക്ക് വാര്‍ത്ത പുതുക്കും.
****
