എംഎൽഎമാർക്കും കരാറുകാർക്കും മന്ത്രിയെ കാണാം. എന്നാൽ അവർ ഒരുമിച്ചുവരുന്നത് ശരിയല്ല. നിയമം അനുസരിച്ച് കരാറുകാരൻ്റേത് ഉന്നതമായ പദവിയാണ്. ഇക്കാര്യം അവർ മനസിലാക്കുകയാണ് വേണ്ടത്. സർക്കാരുമായിട്ടാണ് അവർ കാരാറിലേർപ്പെടുന്നത്. വ്യവസ്ഥകൾ ലംഘിച്ചാൽ പിഡബ്ല്യൂഡിയുടെ ചട്ടമനുസരിച്ച് പിഴയീടാക്കാൻ കഴിയും. ആലപ്പുഴയിൽ വിവിധ പാലങ്ങളുടെ പണിയിൽ വീഴ്ചവരുത്തിയ കരാറുകാരിൽ നിന്ന് താൻ അഞ്ച് കോടി രൂപ പിഴയീടാക്കിയിരുന്നു. പുതിയ ടെൻഡർ വിളിച്ച് ആളെ മാറ്റുകയും ചെയ്തിരുന്നുവെന്ന് ജി സുധാകരൻ പറഞ്ഞതായി മാതൃഭൂമി റിപ്പോർട്ട് ചെയ്തു.
രാജ്യത്ത് ചില ഉദ്യോഗസ്ഥരും കരാറുകാരും രാഷ്ട്രീയക്കാരും തമ്മിൽ അവിശുദ്ധ ബന്ധമുണ്ടെന്ന് ദേശീയ തലത്തിൽ നിയോഗിച്ച കമ്മീഷൻ കണ്ടെത്തിയിരുന്നു. തൻ്റെ കാലത്ത് ഈ ബന്ധം തകർത്തിരുന്നു. എൻ്റെ മുൻപിൽ കരാറുകാരുമായി ഒരു എംഎൽഎയും എത്തിയിട്ടില്ല. മന്ത്രി റിയാസ് പറഞ്ഞതിനെ ആരും വ്യക്തിപരമായി കാണേണ്ടതില്ല. അഴിമതിയുണ്ടാകാതിരിക്കാനുള്ള ഇടതുനിലപാടാണിതെന്നും സുധാകരൻ പറഞ്ഞു.
മന്ത്രി റിയാസിൻ്റെ നിലപാടിനെ പിന്തുണച്ച് കെപിസിസി പ്രസിഡൻ്റ് കെ സുധാകരനും കഴിഞ്ഞ ദിവസം രംഗത്തുവന്നിരുന്നു. “കരാറുകാരെക്കൂട്ടി മന്ത്രിയെ കാണുന്നത് അവിഹിതമായ കാര്യങ്ങൾ നടത്തിയെടുക്കാനാണ്. ഇക്കാര്യത്തിൽ മന്ത്രി മുഹമ്മദ് റിയാസിന് പൂർണ പിന്തുണ നൽകും. അദ്ദേഹം പറഞ്ഞ കാര്യങ്ങൾ സത്യമാണ്. എംഎൽഎമാർ കോൺട്രാക്ടർമാരെ കൂട്ടി മന്ത്രിയെ കാണുന്നത് ശരിയല്ല. അവിഹിതമായ കാര്യങ്ങൾ നടത്തിയെടുക്കാനാണ് ഇങ്ങനെ ചെയ്യുന്നത്” – എന്നും സുധാകരൻ പറഞ്ഞു.
മന്ത്രി മുഹമ്മദ് റിയാസിൻ്റെ നിലപാടിനെ സിപിഎം പിന്തുണച്ചിരുന്നു. മന്ത്രിയുടെ പ്രതികരണം സർക്കാരിൻ്റെ പൊതു നിലപാട് അനുസരിച്ചുള്ളതാണെന്ന് സിപിഎം ആക്ടിങ് സെക്രട്ടറി എ വിജയരാഘവൻ വ്യക്തമാക്കി. മന്ത്രിക്ക് ഇക്കാര്യത്തിൽ പൂർണ പിന്തുണയാണുള്ളത്. ശുപാർശകൾ ഇല്ലാതെ കാര്യങ്ങൾ വേഗത്തിൽ നടക്കണമെന്ന് സർക്കാരിൻ്റെ നിലപാടാണെന്നും അദ്ദേഹം പറഞ്ഞു.
എംഎൽഎമാർ ഉയർത്തുന്ന വിഷയങ്ങൾക്ക് മന്ത്രിമാർ അർഹിക്കുന്ന പരിഗണന നൽകുന്നുണ്ട്. മന്ത്രിമാരുടെ ഓഫീസ് എങ്ങനെ പ്രവർത്തിക്കണമെന്നതിന് സർക്കാരിന് നിലപാടുണ്ട്. സർക്കാരും മന്ത്രിമാരും എങ്ങനെ പ്രവർത്തിക്കണം എന്നത് സംബന്ധിച്ച് സിപിഎമ്മിന് പൊതു നിലപാടുണ്ട്. ശുപാർശകൾ ഇല്ലാതെ കാര്യങ്ങൾ വേഗത്തിൽ നടക്കണം. ഭരണഘടനാ സ്ഥാപനമെന്ന നിലയില്‍ സര്‍ക്കാര്‍ ഇക്കാര്യത്തില്‍ സാധ്യമായതെല്ലാം ചെയ്യുമെന്നും വിജയരാഘവന്‍ വ്യക്തമാക്കിയിരുന്നു.
എംഎൽഎമാർ കരാറുകാരെ കൂട്ടി കാണാൻ വരരുതെന്ന റിയാസിൻ്റെ നിയമസഭാ പ്രസംഗത്തിലെ പരാമർശത്തിനെതിരെ സിപിഎമ്മിലെ ഒരു വിഭാഗത്തിൽ നിന്നും വിമർശനം ഉയർന്ന പശ്ചത്തലത്തിൽ കൂടിയാണ് മന്ത്രിക്ക് പിന്തുണയുമായി സിപിഎം ആക്ടിങ് സെക്രട്ടറി നേരിട്ട് രംഗത്തുവന്നത്. പാർട്ടി നേതൃത്വവുമായുള്ള ചർച്ചയ്ക്ക് ശേഷം തൻ്റെ പ്രസ്താവനയിൽ ഉറച്ച് നിൽക്കുന്നതായും ഒരടി പിന്നോട്ടില്ലെന്നും മന്ത്രി റിയാസ് വെള്ളിയാഴ്ച പറഞ്ഞിരുന്നു.
