കൂട്ടിക്കലില്‍ ആറ് മൃതദേഹങ്ങള്‍ കൂടി കണ്ടെടുത്തു; കൊക്കയാറില്‍ മണ്ണിനടിയില്‍ ഏറെയും കുട്ടികള്‍

തിരുവനന്തപുരം:തെക്കൻ ജില്ലകളിൽ അതിതീവ്രമഴയുംമലവെള്ളപ്പാച്ചിലും ഉരുൾപ്പൊട്ടലുംസൃഷ്ടിച്ച ആഘാതത്തിൽ നിന്ന് തിരിച്ചുവരാൻ പാടുപെടുകയാണ് കേരളം.കാണാതായവർക്ക് വേണ്ടി തിരച്ചിൽ നടത്തുമ്പോൾ അവിചാരിതമായി മൃതദേഹങ്ങൾ കണ്ടെടുക്കുന്നത് ദുരന്തത്തിന്റെ ആഘാതം ഇരട്ടിയാക്കുന്നു. കാണാതായവരുടെ പട്ടികയിൽ ഉൾപ്പെടാത്ത രണ്ടു മൃതദേഹങ്ങളാണ് ഞായറാഴ്ച കണ്ടെടുത്തത്.

കോട്ടയം ഇളംകോട് സ്വദേശിയായ ഷാലറ്റ് (29) എന്നയാളുടെ മൃതദേഹമാണ് ഞായറാഴ്ച ആദ്യം കണ്ടെടുത്തത്. മലവെള്ളപ്പാച്ചിലിൽ അകപ്പെട്ടാണ് ഇയാൾ മരിച്ചതെന്നാണ് വിവരം. രണ്ടാമത്തെയാളെ തിരിച്ചറിഞ്ഞിട്ടില്ല.

കോട്ടയം, ഇടുക്കി, പത്തനംതിട്ട ജില്ലകളിലെ വിവിധ ഭാഗങ്ങളിലായിഒരു കുഞ്ഞിന്റേത് ഉൾപ്പടെ വിവിധയിടങ്ങളിൽ നിന്നായി എട്ട് പേരുടെ മൃതദേഹങ്ങളാണ് ഞായറാഴ്ചകണ്ടെടുത്തത്. ഇതിൽ പലരുടേയും ശരീരഭാഗങ്ങൾ മാത്രമാണ് കണ്ടെടുത്തതെന്നാണ് രക്ഷാപ്രവർത്തകർ പറയുന്നത്. വലിയ പാറകളും മണ്ണും അടിഞ്ഞുകൂടിയത് രക്ഷാപ്രവർത്തനം ദുഷ്കരമാക്കുന്നുണ്ട്.

കോട്ടയം കൂട്ടിക്കലിൽ കഴിഞ്ഞ ദിവസം മൂന്ന് പേരുടെ മൃതദേഹങ്ങളാണ് കണ്ടെടുത്തത്. ഇന്ന് കൂട്ടിക്കലിലെ കാവാലിയിലും പ്ലാപ്പള്ളിയിലുമായി ഇന്ന് ആറ് പേരുടെ മൃതദേഹങ്ങൾ കണ്ടെടുത്തു. ഇതോടെ കൂട്ടിക്കലിൽ മരിച്ചവരുടെ എണ്ണം ഒമ്പതായി. കൊക്കയാറിൽ കാണാതായ എട്ട് പേരിൽ അഞ്ചു പേരും കുട്ടികളാണ് എന്നാണ് വിവരം.

കൊക്കയാറിൽ ഏഴ് വീടുകൾ പൂർണ്ണമായും തകർന്നിട്ടുണ്ട്. ഇവിടെ രക്ഷാ പ്രവർത്തനത്തിനായി ഡോഗ് സ്ക്വാഡിനേയും എത്തിച്ചിട്ടുണ്ട്. കൂടുതൽ മണ്ണുമാന്തി യന്ത്രങ്ങളും എത്തിക്കുന്നുണ്ട്.

കൊക്കയാറിൽ നേരത്തെ ഏഴ് പേരേയാണ് കാണാതായതെന്ന് പറഞ്ഞിരുന്നത്. എന്നാൽ ഇവിടെ എട്ട് പേരെയാണ് കാണാതായിട്ടുള്ളത്. പെരുവന്താനത്ത് നിന്ന് ഒരാളുടെ മൃതദേഹവും കണ്ടെടുത്തിണ്ടെന്ന് റവന്യൂ മന്ത്രി കെ.രാജൻ പറഞ്ഞു.

ഇന്നലെ ലഭിച്ചതിൽ നിന്നും വ്യത്യസ്തമാണ് ഇപ്പോൾ ലഭിച്ചുകൊണ്ടിരിക്കുന്ന കണക്കുകളെന്ന് മന്ത്രി വി.എൻ.വാസവൻ അറിയിച്ചു. മന്ത്രിമാരായ കെ.രാജൻ, വി.എൻ.വാസവൻ, റോഷി അഗസ്റ്റി തുടങ്ങിയവരുടെ നേതൃത്വത്തിൽ പ്രദേശത്ത് രക്ഷാപ്രവർത്തനത്തിന്റെ പുരോഗതി വിലയിരുത്തുന്നുണ്ട്.

കേരളത്തിൽ പൊതുവേ മഴ കുറഞ്ഞുവരുന്നതായാണ് കാലവസ്ഥാ നിരീക്ഷണ കേന്ദ്രം അറിയിക്കുന്നത്. അടുത്ത മൂന്ന് മണിക്കൂറിൽ തൃശൂർ, പാലക്കാട്, മലപ്പുറം, കാസർകോട് ജില്ലകളിൽ ഇടിയോട് കൂടിയ മഴക്കും 40 കിലോമീറ്റർ വേഗതയിൽ വീശിയടിക്കാവുന്ന കാറ്റിനും സാധ്യതയുണ്ടെന്നാണ് കേന്ദ്ര കാലവസ്ഥാ വകുപ്പ് ഏറ്റവും ഒടുവിലായി നൽകിയിരിക്കുന്ന അറിയിപ്പ്.