നിസ്സഹായവസ്ഥയിലും പരാശ്രയത്തിലും ഇരിക്കുമ്പോൾ നടത്തുന്ന കൊലയെ സാധൂകരിക്കുന്നതാണ് നിയമം എന്നാണ് ബിഷപ്പിന്റെ പക്ഷം. പുതിയതായി വരുത്തിയ ഭേദഗതികള്‍ എന്താണെന്നും മറ്റ് വ്യവസ്ഥകള്‍ എന്തെല്ലാമാണെന്നും എല്ലാം വിശദീകരിച്ചാണ് ആര്‍ച്ച് ബിഷപ്പിന്റെ ലേഘനം വന്നിരിക്കുന്നത്.
ഗര്‍ഭാവസ്ഥയിലുള്ള ഒരു മനുഷ്യ വ്യക്തിക്ക് മറ്റുള്ളവരെപ്പോലെ തന്നെ ജീവിക്കാൻ അവകാശമില്ലേ? ജനിച്ചു കഴിഞ്ഞ ഒരു കുഞ്ഞിന്റെ ജീവനെടുക്കുന്നത് കുറ്റകരമാണെങ്കിൽ അമ്മയുടെ ഉദരത്തിലായിരിക്കുന്ന കുഞ്ഞിന്റെ ജീവൻ എടുക്കുന്നതും കുറ്റകരമല്ലേ? എന്നീ ചോദ്യങ്ങളും ലേഖനത്തിലെ നിയമത്തിന്റെ ഭീകരമുഖം എന്ന തലക്കെട്ടിൽ വൈദികൻ ചോദിക്കുന്നു.
ഗര്‍ഭം ധരിക്കുനന്ന സ്ത്രീയും ഗര്‍ഭാവസ്ഥയിലുള്ള ശിശുവും ജീവിക്കാൻ തുല്യാവകാശമുള്ള മനുഷ്യവ്യക്തികളാണെന്ന് വൈദികൻ കുറിക്കുന്നു.
അമ്മയെന്ന് വിളിക്കുന്ന ആ സ്ത്രീ തന്നെ സമ്മതത്തോടെ ഈ കൊലപാതകം നടത്തുന്നുവെന്ന് എത്രയോ വേദനാജനകമാണ്. അതിന് നിയമസാധുത നൽകുന്ന ഗര്‍ഭച്ഛിദ്ര നിയമത്തെ മനുഷ്യജീവന്റെ മേലുള്ള ഭീകരാക്രമണം എന്നല്ലാതെ എന്താണ് വിളിക്കേണ്ടത് എന്നും ചങ്ങനാശേരി ആര്‍ച്ച് ബിഷപ്പ് മാര്‍ ജോസഫ് പെരുന്തോട്ടം കുറിക്കുന്നു.
ശാരീരിക മാനസിക ദൗർബല്യങ്ങളുടെ പേരിൽ ഗർഭച്ഛിദ്രത്തെ ന്യായീകരിക്കാനാകില്ല. അമ്മയുടെ ഉദരത്തിൽ വച്ച് ജീവൻ എടുക്കുന്നത് കുറ്റമാണ്. വിവാഹേതര ബന്ധം, ബലാൽസംഗം എന്നീ കാരണങ്ങളാൽ ഗർഭഛിദ്രം നടത്തുന്നത് ന്യായീകരിക്കാനാവില്ലെന്നും മറ്റ് രാജ്യങ്ങൾ ഗർഭചിത്രം അനുവദിക്കുന്നു എന്നതുകൊണ്ട് നരഹത്യയ്ക്ക് അത് നീതീകരണമാകില്ലെന്നും ആര്‍ച്ച് ബിഷപ്പ് കുറിക്കുന്നു.
ഉപദ്രവകാരികളായ കാട്ടുമൃഗങ്ങളെ കൊല്ലുന്നതിനും വാഹനമിടിച്ച് മൃഗങ്ങള്‍ മരിക്കുന്നതിനും മൃഗസംരക്ഷണനിയമത്തിന്റെ പേരിൽ ഗൗരവത്തോടെ കണ്ട് നടപടികള്‍ എടുക്കുന്ന സാഹചര്യത്തിലാണ് ഗര്‍ഭച്ഛിദ്രം നടപ്പാക്കുന്നത് എന്നും കത്തോലിക്ക വൈദികന്റെ ലേഖനത്തിൽ കുറ്റപ്പെടുത്തുന്നു.
മനുഷ്യജീവന് മഹത്വവും വിലയും കൽപ്പിക്കുന്നുണ്ടെങ്കിൽ കേന്ദ്രസർക്കാർ നിയമം പിൻവലിക്കണം. ആയിരം കുറ്റവാളികൾ രക്ഷപെട്ടാലും ഒരു നിരപരാധി പോലും ശിക്ഷിക്കപ്പെടരുതെന്നുള്ള നീതിന്യായം നിരപരാധികളായ ശിശുക്കൾ വധിക്കപ്പെടാൻ അനുവദിക്കുന്ന ഗർഭച്ഛിദ്രത്തിന് ബാധകമല്ലേയെന്നും സഭ ലേഖനത്തിലൂടെ ചോദിക്കുന്നു.
