തളിപ്പറമ്പിനടുത്തുള്ള അരിയിൽ എന്ന സ്ഥലത്തുവെച്ച് അന്ന് സിപിഎം കണ്ണൂർ ജില്ലാ സെക്രട്ടറിയായിരുന്ന പി ജയരാജനേയും കല്യാശേരി എംഎൽഎയായിരുന്ന ടി വി രാജേഷിനേയും ആക്രമിച്ചെന്നാണ് കേസ്. 2012 ഫെബ്രുവരി 20 നാണ് സംഭവം നടന്നത്. സിപിഎം നേതാക്കൾ സഞ്ചരിച്ചിരുന്ന വാഹനം തടഞ്ഞുനിർത്തി വധിക്കാൻ ശ്രമിച്ചെന്നായിരുന്നു പ്രോസിക്യൂഷൻ വാദം.
സംഭവത്തിനു പിന്നാലെ മുസ്ലിം ലീഗ് പ്രവർത്തകനായ അരിയിൽ ഷുക്കൂർ വധിക്കപ്പെട്ടു. സംഘർഷത്തിന്റെ തുടർച്ചയായി ഷുക്കൂറിനെ സിപിഎം കൊല്ലുകയായിരുന്നെന്നാണ് മുസ്ലിം ലീഗ് ആരോപിക്കുന്നത്.
സിപിഎം നേതാക്കൾക്കെതിരെ ആക്രമണം ഉണ്ടായിട്ടില്ലെന്നും കേസിൽ ഹാജരാക്കിയ രേഖകൾ യഥാർത്ഥമല്ലെന്നും കേസിൽ ഹാജരാക്കിയ ആയുധങ്ങൾ കൃത്രിമമായി ഉണ്ടാക്കിയതാണെന്നും പ്രതിഭാഗം വാദിച്ചു.
സംഭവ ദിവസം രാവിലെ 11 ന് പി ജയരാജനും ടി വി രാജേഷും സഞ്ചരിച്ച വാഹനം അരിയിൽ എത്തിയപ്പോൾ മുസ്ലിം ലീഗ് പ്രവർത്തകർ തടയുകയായിരുന്നു. കല്ലേറിൽ വാഹനത്തിന്റെ ചില്ലുകൾ തകർന്നു. തളിപ്പറമ്പ് സ്റ്റേഷനിലെത്തിയ ജയരാജൻ പരാതി നൽകി. തുടർന്ന് നൂറോളം പേർക്കെതിരെ കേസെടുത്തു. തുടർന്ന് ജയരാജനും രാജേഷും തളിപ്പറമ്പ് സഹകരണ ആശുപത്രിയിൽ ചികിത്സ തേടി. ഈ സംഘർഷത്തിന്റെ തുടർച്ചയായാണ് ഷുക്കൂർ കൊല്ലപ്പെടുന്നത് എന്നാണ് പോലീസ് ആരോപിക്കുന്നത്.
