വടക്കേ മലബാറിന്റെ തെയ്യം ബേക്കറി ബിസ്ക്കറ്റിൽ തീർത്ത് ഡാവിഞ്ചി സുരേഷ്

വടക്കൻ മലബാറിന്റെ തനത് കലാരൂപമാണ് തെയ്യം. വിഷ്ണുമൂർത്തി, ശ്രീ മുത്തപ്പൻ തെയ്യം, ഗുളികൻ, പുതിയ ഭഗവതി, മുച്ചിലോട്ട് ഭഗവതി എന്നിങ്ങനെ വിവിധ തരം തെയ്യങ്ങളുണ്ട്. ഡാവിഞ്ചി സുരേഷ് എന്ന് പേരുള്ള സുരേഷ് പികെ കുറച്ച് ദിവസങ്ങൾക്ക് മുൻപ് ഒരു തെയ്യം വരച്ചു. ഇതിലെന്താണ് ഇത്ര പ്രത്യേകത എന്നാണോ? വടക്കൻ മലബാറിൻറെ ആചാരാനുഷ്ടാന കലയായ തെയ്യത്തിൻറെ മുഖരൂപം ബേക്കറി ബിസ്കറ്റ് ഉൽപ്പന്നങ്ങളിൽ ഇരുപത്തിനാല് അടി വലുപ്പത്തിലാണ് ഡാവിഞ്ചി സുരേഷ് തയ്യാറാക്കിയത്.

ബേക്കറി ബിസ്ക്കറ്റുകൾ കൊണ്ടാണ് ഡാവിഞ്ചി സുരേഷ് തെയ്യത്തിൻറെ മുഖരൂപം തയ്യാറാക്കിയത്. കണ്ണൂരിലെ നഗരത്തിലെ ബേക് സ്റ്റോറി ലൈവ് ബേക്കറിയിലെ ഷെഫ് റഷീദ് മുഹമ്മദിൻറെ നിർദ്ദേശപ്രകാരമാണ് താൻ 15 മണിക്കൂർ സമയമെടുത്ത് വലിയ ചിത്രം തീർത്തത് എന്ന് ഡാവിഞ്ചി സുരേഷ് ഇൻസ്റ്റാഗ്രാം പോസ്റ്റിൽ കുറിച്ചിട്ടുണ്ട്. ചിത്രത്തോടൊപ്പമുള്ള ഇൻസ്റ്റാഗ്രാം പോസ്റ്റ് വൈറലാണ്.

ഹാളിനുള്ളിൽ ടേബിളുകൾ നിരത്തി അതിനു മുകളിൽ തുണി വിരിച്ചു ബിസ്ക്കറ്റുകൾ നിരത്തി വെച്ചും അടുക്കി വെച്ചും ആണ് ചിത്രം തയ്യാറാക്കിയത്. വിവിധ നിറങ്ങളിലും വിവിധ വലിപ്പത്തിലുമുള്ള ഇരുപത്തയ്യായിരം ബിസ്ക്കറ്റുകളും, മറ്റു ബേക്കറി ഉൽപ്പന്നങ്ങളും തെയ്യരൂപം തയ്യാറാക്കാനായി ഉപയോഗിച്ചിട്ടുണ്ട്.

വിവിധ മീഡിയങ്ങളിൽ ചിത്രങ്ങൾ ഉണ്ടാക്കുന്ന ഡാവിഞ്ചി സുരേഷിൻറെ എഴുപത്തി ഒൻപതാമത്തെ മീഡിയം ആണ് ബേക്കറി ഉൽപ്പന്നങ്ങൾ കൊണ്ട് കണ്ണൂരിൽ തയ്യാറാക്കിയത്. നിർമ്മാണ ശേഷം ഈ ഉൽപ്പന്നങ്ങളെല്ലാം ബയോ ഡീ ഗ്രേഡ് ചെയ്യുവാൻ കണ്ണൂർ ജില്ലയിലെ വെറ്റിനറി ഫാമിലേക്ക് നൽകി എന്നും ഡാവിഞ്ചി സുരേഷ് പോസ്റ്റിൽ കുറിച്ചിട്ടുണ്ട്.

കുറച്ച് വർഷങ്ങൾക്ക് മുൻപ് പാത്രങ്ങൾ ഉപയോഗിച്ച് മോഹൻലാലിന്റെ ചിത്രം തയ്യറാക്കി ശ്രദ്ധ നേടിയ ഡാവിഞ്ചി സുരേഷ് പിന്നീട് വിവിധ വസ്തുക്കൾ കൊണ്ട രജനീകാന്ത്, പൃഥ്വിരാജ് സുകുമാരൻ, ഫഹദ് ഫാസിൽ, ടൊവിനോ തോമസ് എന്നിവരുടെ ചിത്രങ്ങൾ ഡാവിഞ്ചി സുരേഷ് തയ്യാറാക്കിയിട്ടുണ്ട്.