കഴിഞ്ഞ ജൂൺ മാസത്തിലാണ് മരണം ഓൺലൈനായി ആശുപത്രികൾ നേരിട്ട് രജിസ്റ്റർ ചെയ്യാൻ ആരംഭിച്ചത്. അതിന് മുൻപുള്ള മരണങ്ങളിൽ രേഖകൾ ഇല്ലാതെയും മറ്റും ഔദ്യോഗിക മരണപ്പട്ടികയിൽ ചേർക്കപ്പെടാതെ പോയ മരണങ്ങളുണ്ട്. ഇത്തരത്തിൽ സംഭവിച്ച ഏഴായിരത്തോളം മരണങ്ങളാണ് കൊവിഡ് മരണ പട്ടികയിൽ ഉൾപ്പെടുത്താൻ സർക്കാർ തീരുമാനിച്ചത്. ഇതുസംബന്ധിച്ച് തുടർന്നും പരാതികളുണ്ടെങ്കിൽ പരിശോധിക്കണമെന്നും ആരോഗ്യമന്ത്രി പറഞ്ഞു.
കേന്ദ്ര സർക്കാരിൻ്റെ പുതുക്കിയ മാനദണ്ഡങ്ങളനുസരിച്ച് കൊവിഡ് മൂലമെന്ന് കണക്കാക്കപ്പെടേണ്ട മരണങ്ങൾ സംബന്ധിച്ച് അപേക്ഷകൾ ഒക്ടോബർ പത്ത് മുതൽ സമർപ്പിക്കാൻ സാധിക്കും. ആരോഗ്യവകുപ്പ് തയ്യാറാക്കിയ പോർട്ടലിലൂടെയും നേരിട്ട് പിഎച്ച്സികൾ വഴിയും അപേക്ഷകൾ സമർപ്പിക്കാവുന്നതാണ്. കൊവിഡ് ബാധിച്ച് മുപ്പത് ദിവസത്തിനകം മരിച്ചവരെയെല്ലാം പട്ടികയിൽ ഉൾപ്പെടുത്തും. ലിസ്റ്റിൽ ഉൾപ്പെടാത്തവർക്ക് ഓൺലൈനായും നേരിട്ടും അപേക്ഷ നൽകാവുന്നതാണ്. അപേക്ഷ ലഭിച്ച് 30 ദിവസത്തിനുള്ളിൽ പരിഹാരം കാണും.
സമയബന്ധിതമായി സുതാര്യമായി പരാതികൾ തീർപ്പാക്കും. സീറോ പ്രിവിലൻസ് സർവേയുടെ സമഗ്രമായ റിപ്പോർട്ട് തയ്യാറാക്കും.സംസ്ഥാനം സ്വയം തീരുമാനിക്കുകയും സ്വയം നടത്തുകയും ചെയ്ത പഠനമാണിത്. ഐസിഎം ആറിൻ്റെ ഗൈഡ് ലൈൻ അനുസരിച്ചാണ് പഠനം നടത്തിയതെന്നും മന്ത്രി വ്യക്തമാക്കി. സുപ്രീം കോടതി വിധിക്ക് പിന്നാലെ കേന്ദ്ര സർക്കാർ പുറത്തിറക്കിയ മാർഗനിർദേശങ്ങളുടെ അടിസ്ഥാനത്തിൽ സംസ്ഥാന സർക്കാർ കൊവിഡ് മൂലം മരിച്ചവരുടെ ധനസഹായം ലഭ്യമാക്കുന്നതിന് വേണ്ടിയുള്ള എല്ലാ നടപടികളും സ്വീകരിക്കുന്നുണ്ട്.
കൊവിഡ് മരണങ്ങളിൽ നഷ്ടപരിഹാരം നൽകാനുള്ള മാർഗനിർദേശം സംസ്ഥാന സർക്കാർ തയ്യാറാക്കിയിരുന്നു. സംസ്ഥാന സർക്കാർ. 50,000 രൂപയാകും നഷ്ടപരിഹാരമായി നൽകുക.
കേന്ദ്ര മാർഗനിർദേശം അനുസരിച്ച് 30 ദിവസത്തിനുള്ളിൽ നടന്ന മരണങ്ങൾ പൂർണമായും ഉൾപ്പെടുത്താൻ നിർദേശിക്കുന്നതാണ് പുതിയ മാർഗരേഖ. നഷ്ടപരിഹാരം നേടാൻ ജില്ലാ കളക്ടർമാർക്കാണ് അപേക്ഷ നൽകേണ്ടത്. ഒക്ടോബർ പത്ത് മുതൽ അപേക്ഷ സ്വീകരിച്ച് തുടങ്ങും. നടപടി ക്രമങ്ങൾ ഓൺലൈൻ മുഖേനെ ആയിരിക്കും. നഷ്ടപരിഹാരം സംബന്ധിച്ചുള്ള അപേക്ഷയിൽ 30 ദിവസത്തിനകം തീരുമാനം എടുക്കണം. ജില്ലാതല സമിതികൾ മരണം പരിശോധിച്ച് തീരുമാനം എടുക്കണം. ജില്ലാതലത്തിൽ ഡിഎംഒ, എഡിഎം, വിദഗ്ധനായ ഡോക്ടർ ഉൾപ്പെടെ അഞ്ച് അംഗങ്ങൾ ഉണ്ടായിരിക്കണം.
പരാതികൾ ഉന്നയിക്കാൻ പോർട്ടൽ സംവിധാനവും തയ്യാറാക്കുകയാണ്. നിലവിൽ പട്ടികയിൽ ഉള്ളവരുടെ വിവരങ്ങളറിയാൻ ഡെത് ഇൻഫർമേഷൻ പോർട്ടലിൽ സൗകര്യമുണ്ട്. ജില്ലാ തലത്തിൽ നിർണയ സമിതിയാണ് മരണം സംബന്ധിച്ച രേഖകൾ നൽകുക. മരിച്ച ആളുടെ ഉറ്റബന്ധു മരണ രജിസ്ട്രേഷൻ രേഖകൾ സഹിതം അപേക്ഷിക്കണം. പരാതികളുള്ള മരണ സർട്ടിഫിക്കറ്റുകൾ തിരുത്തി വാങ്ങാനും അവസരമുണ്ട്. പുതിയ മാർഗനിർദേശ പ്രകാരം ചേർത്ത മരണം പട്ടികയിൽ പ്രത്യേകം ചേർക്കും.
കൊവിഡ് ബാധിച്ച് മരിച്ചവരുടെ കുടുംബങ്ങൾക്ക് സംസ്ഥാന ദുരന്ത നിവാരണ ഫണ്ടിൽ നിന്നും 50000 രൂപ നഷ്ടപരിഹാരം നൽകുമെന്ന് കേന്ദ്ര സർക്കാർ സുപ്രീം കോടതിയെ അറിയിച്ചിരുന്നു. കൊവിഡ് സ്ഥിരീകരിച്ച് 30 ദിവസത്തിനകം മരിച്ചാൽ അത് കൊവിഡ് മരണമായി കണക്കാക്കുമെന്നും കേന്ദ്രം പറഞ്ഞിരുന്നു. കേന്ദ്രത്തിൻ്റെ ഈ നിലപാടിൻ്റെ അടിസ്ഥാനത്തിലാണ് സംസ്ഥാന സർക്കാർ കൊവിഡ് ബാധിച്ച് മരിച്ചവരുടെ കുടുംബങ്ങൾക്ക് നഷ്ടപരിഹാരം നിശ്ചയിക്കാനുള്ള മർഗരേഖ പുതുക്കാൻ തീരുമാനിച്ചത്.
