നീ എന്തൂട്ട് കള്ളനാടാ? അപ്പൊ ആത്മാർത്ഥമായി നീ മണ്ടൻ ആണല്ലേ!

കക്കാൻ മാത്രം പഠിച്ചാൽ പോരാ നിക്കാനും പഠിക്കണം എന്നൊരു ചൊല്ലുണ്ട്. ചിലരുടെ കാര്യത്തിൽ ഈ ചൊല്ല് അക്ഷരാർത്ഥത്തിൽ സത്യമാണ്. 2014 ഇറങ്ങിയ സപ്തമശ്രീ തസ്‌കര എന്ന മലയാളം സിനിമയിലെ ചെമ്പൻ വിനോദ് കഥാപാത്രം ഇതിനുദാഹരണമാണ്. പള്ളിയിലെ പണപ്പെട്ടി കുത്തിത്തുറക്കാൻ ഇറങ്ങിപ്പുറപ്പെട്ട് ഒടുവിൽ നാട്ടുകാർ പിടിക്കാൻ എത്തിയപ്പോൾ കക്ഷി ഓടി ഒരു വാഴത്തോപ്പിൽ കയറി ഇരുന്നു. നാട്ടുകാർ അല്പം പോലും വഴി തെറ്റാതെ ചെമ്പൻ വിനോദ് കഥാപാത്രം മാർട്ടിന്റെ അടുത്തെത്തി. കാരണം എന്തെന്നല്ലേ? സ്വന്തം തലയിൽ കെട്ടിവച്ചിരുന്ന ടോർച്ച് ഒളിച്ചിരിക്കുമ്പോഴും ഓഫ് ചെയ്യാൻ കക്ഷി മറന്നു. ഓടിക്കൂടിയ നാട്ടുകാരിൽ ഒരാൾ ചോദിക്കുന്നുണ്ട് “നീ എന്തൂട്ട് കള്ളനാടാ?” എന്ന്.

ഇതേ ചോദ്യമാണ് ഡെർബിഷയർ പോലീസ് സ്വാഡ്‌ലിൻകോട്ടിലെ ഒരു വീട്ടിൽ റെയ്ഡ് നടത്തി പിടിച്ച കള്ളനോടും ചോദിച്ചിരിക്കുക. 36-കാരനായ ഈ കള്ളൻ ചെയ്തതെന്തെന്നോ? പുതപ്പ് കൊണ്ട് സ്വയം മൂടിയ ശേഷം അലമാരയ്ക്ക് അകത്ത് കയറി ഒളിച്ചിരുന്നു. ഇതിലെന്താ ഇത്ര മണ്ടത്തരം എന്നാവും? അലമാരയിൽ കയറി നിന്ന കള്ളൻ പുതപ്പ് പൂർണമായും മൂടിയിരുന്നില്ല. അലമാര തുറന്ന് നോക്കിയ പോലീസ് കൃത്യമായി കാല് കാണുകയും കള്ളൻ പിടിയിലാവുകയും ചെയ്തു.

സൗത്ത് ഡെർബിഷെയറിലുടനീളം നിരവധി മോഷണങ്ങൾ നടത്തിയെന്നാരോപിച്ചാണ് ഇയാളെ അറസ്റ്റ് ചെയ്തത്. “അലമാരയിൽ പുതപ്പിനടിയിൽ ഒളിഞ്ഞിരിക്കുന്ന കള്ളനെ കണ്ടെത്തി,” സ്വാഡ്ലിൻകോട്ട് പോലീസ് എസ്എൻടി ഫേസ്ബുക്കിൽ എഴുതി. “നിങ്ങളെ തേടിയിറങ്ങിയ ഞങ്ങൾ അലമാര തുറന്നു നോക്കില്ല എന്ന് നിങ്ങൾ കരുതിയോ? നിങ്ങൾ ഒരു പുതപ്പിനടിയിൽ ഒളിച്ചിരിക്കുന്നത് ഞങ്ങൾ തിരിച്ചറിയില്ല എന്നാണോ കരുതിയത്?” പോലീസ് കുറിച്ചു.

“ഒരു 36 വയസുള്ള പുരുഷനെ അലമാരയിൽ പുതപ്പിനുള്ളിൽ ഒളിപ്പിച്ച നിലയിൽ കണ്ടെത്തി, അവന്റെ വലിയ പാദങ്ങൾ അവനെ ചതിച്ചു. സൗത്ത് ഡെർബിഷയറിൽ മോഷണങ്ങൾ നടത്തിയതിന് ഒരാളെ കൂടി പ്രതിയാക്കി റിമാൻഡ് ചെയ്തു.” പോലീസ് വിശദീകരിച്ചു.