100 രാജ്യങ്ങള്‍ സന്ദര്‍ശിച്ചു എന്നത് വെറുതെ പറഞ്ഞതാണെന്ന് മോൻസൺ പറഞ്ഞു. അതെന്തിനാണെന്ന് ചോദിച്ചപ്പോള്‍ ഒന്നോ രണ്ടോ രാജ്യങ്ങളിൽ പോയിട്ടുണ്ടെന്ന് പറഞ്ഞാൽ എന്തെങ്കിലും കാര്യമുണ്ടോ എന്നായിരുന്നു മോൻസൻ്റെ മറുചോദ്യം. ഈ അവകാശവാദമാണ് പ്രവാസി സംഘടനയുടെ തലപ്പത്ത് എത്താൻ തുണയായത്.
Also Read:
പുരാവസ്തുക്കള്‍ വിറ്റ വകയിൽ തന്‍റെ അക്കൗണ്ടിലേയ്ക്ക് 1350 കോടി പൗണ്ട് എത്താനുണ്ടെന്നും ഇത് റിസര്‍വ് ബാങ്ക് തടഞ്ഞിട്ടിരിക്കുകയാണെന്നും ചൂണ്ടിക്കാട്ടിയാണ് ഇയാള്‍ പലരിൽ നിന്നും കോടികള്‍ തട്ടിയത്. കൂടാതെ ബ്രൂണൈ രാജാവിനും ഖത്തര്‍ രാജകുടുംബത്തിനും പുരാവസ്തുക്കള്‍ വിറ്റിട്ടുണ്ടന്നും മോൻസൺ പല വീഡിയോകളിലും അവകാശപ്പെട്ടിരുന്നു. എന്നാൽ ഇയാള്‍ ഇവരുമായി ബന്ധപ്പെട്ടിട്ടില്ലെന്നാണ് ഇതുവരെയുള്ള വിവരം.
നാലുകോടി രൂപയോളം ഇയാള്‍ പലരിൽ നിന്ന് വാങ്ങിയതിനു ക്രൈം ബ്രാഞ്ചിന് തെളിവു ലഭിച്ചിട്ടുണ്ട്. എന്നാൽ അക്കൗണ്ട് വഴി ട്രാൻസ്ഫര്‍ ചെയ്യുന്നത് ഒഴിവാക്കിയ ഇയാള്‍ പണമായാണ് വൻ തുക സ്വീകരിച്ചിരുന്നത്. ഇയാളുടെ കാറിൽ നിന്ന് നോട്ടെണ്ണുന്ന യന്ത്രവും കണ്ടെത്തിയിരുന്നു. ഇയാളുടെ ബൗൺസര്‍മാരായി ജോലി ചെയ്തിരുന്നവരുടെ അക്കൗണ്ടുകള്‍ വഴി കോടികള്‍ കൈമാറിയിട്ടുണ്ടാകാമെന്നാണ് ക്രൈം ബ്രാഞ്ച് കരുതുന്നത്.
Also Read:
മോൻസൺ പണം വാങ്ങിയതുമായി ബന്ധപ്പെട്ട് നിരവധി ഡിജിറ്റൽ തെളിവുകളും അന്വേഷണസംഘത്തിന് ലഭിച്ചിട്ടുണ്ട്. ശബ്ദരേഖകള്‍ ഉള്‍പ്പെടെയുള്ളവയുടെ ആധികാരികത ഉറപ്പാക്കുന്നതിനായി മോൻസൻ്റെ ശബ്ദസാമ്പിളുകളും ശേഖരിക്കും.
അതേസമയം, മോൻസൺ അടുത്തിടെയായി കടുത്ത സാമ്പത്തിക പ്രതിസന്ധിയിലായിരുന്നുവെന്നാണ് ക്രൈം ബ്രാഞ്ച് കരുതുന്നത്. ഇയാളുടെ ആസ്തി സംബന്ധിച്ച് ഇനിയും വ്യക്തമായ വിവരങ്ങള്‍ ലഭിച്ചിട്ടില്ല. ബാങ്ക് അക്കൗണ്ടിൽ 176 രൂപ മാത്രമാണ് ഉണ്ടായിരുന്നത്. കലൂരിൻ്റെ വീടിൻ്റെ വാടകയും ബൗൺസര്‍മാരുടെ ശമ്പളവും മാസങ്ങളായി മുടങ്ങിയിരുന്നുവെന്നും മോൻസൺ മാവുങ്കൽ ക്രൈം ബ്രാഞ്ചിനു മൊഴി നല്‍കിയിട്ടുണ്ട്. പലരിൽ നിന്നായി ശേഖരിച്ച കോടികള്‍ ആഡംബര ജീവിതത്തിനു വേണ്ടിയായിരുന്നു ഇയാള്‍ ചെലവഴിച്ചിരുന്നതെന്നായിരുന്നു കുരുതന്നത്.
