കേന്ദ്ര മാർഗനിർദേശം അനുസരിച്ച് 30 ദിവസത്തിനുള്ളിൽ നടന്ന മരണങ്ങൾ പൂർണമായും ഉൾപ്പെടുത്താൻ നിർദേശിക്കുന്നതാണ് പുതിയ മാർഗരേഖ. നഷ്ടപരിഹാരം നേടാൻ ജില്ലാ കളക്ടർമാർക്കാണ് അപേക്ഷ നൽകേണ്ടത്. ഒക്ടോബർ പത്ത് മുതൽ അപേക്ഷ സ്വീകരിച്ച് തുടങ്ങും. നടപടി ക്രമങ്ങൾ ഓൺലൈൻ മുഖേനെ ആയിരിക്കും. നഷ്ടപരിഹാരം സംബന്ധിച്ചുള്ള അപേക്ഷയിൽ 30 ദിവസത്തിനകം തീരുമാനം എടുക്കണം. ജില്ലാതല സമിതികൾ മരണം പരിശോധിച്ച് തീരുമാനം എടുക്കണം. ജില്ലാതലത്തിൽ ഡി എം ഒ, എഡി എം, വിദഗ്ധനായ ഡോക്ടർ ഉൾപ്പെടെ അഞ്ച് അംഗങ്ങൾ ഉണ്ടായിരിക്കണം.
പരാതികൾ ഉന്നയിക്കാൻ പോർട്ടൽ സംവിധാനവും തയ്യാറാക്കുകയാണ്. നിലവിൽ പട്ടികയിൽ ഉള്ളവരുടെ വിവരങ്ങളറിയാൻ ഡെത് ഇൻഫർമേഷൻ പോർട്ടലിൽ സൗകര്യമുണ്ട്. ജില്ലാ തലത്തിൽ നിർണയ സമിതിയാണ് മരണം സംബന്ധിച്ച രേഖകൾ നൽകുക. മരിച്ച ആളുടെ ഉറ്റബന്ധു മരണ രജിസ്ട്രേഷൻ രേഖകൾ സഹിതം അപേക്ഷിക്കണം. പരാതികളുള്ള മരണ സർട്ടിഫിക്കറ്റുകൾ തിരുത്തി വാങ്ങാനും അവസരമുണ്ട്. പുതിയ മാർഗനിർദേശ പ്രകാരം ചേർത്ത മരണം പട്ടികയിൽ പ്രത്യേകം ചേർക്കും.
കൊവിഡ് ബാധിച്ച് മരിച്ചവരുടെ കുടുംബങ്ങൾക്ക് സംസ്ഥാന ദുരന്ത നിവാരണ ഫണ്ടിൽ നിന്നും 50000 രൂപ നഷ്ടപരിഹാരം നൽകുമെന്ന് കഴിഞ്ഞ ദിവസം കേന്ദ്ര സർക്കാർ സുപ്രീം കോടതിയെ അറിയിച്ചിരുന്നു. കൊവിഡ് സ്ഥിരീകരിച്ച് 30 ദിവസത്തിനകം മരിച്ചാൽ അത് കൊവിഡ് മരണമായി കണക്കാക്കുമെന്നും കേന്ദ്രം പറഞ്ഞിരുന്നു. കേന്ദ്രത്തിൻ്റെ ഈ നിലപാടിൻ്റെ അടിസ്ഥാനത്തിലാണ് സംസ്ഥാന സർക്കാർ കൊവിഡ് ബാധിച്ച് മരിച്ചവരുടെ കുടുംബങ്ങൾക്ക് നഷ്ടപരിഹാരം നിശ്ചയിക്കാനുള്ള മർഗരേഖ പുതുക്കാൻ തീരുമാനിച്ചത്. കേന്ദ്ര സർക്കാരിൻ്റെ മാർഗനിർദേശമനുസരിച്ച് സംസ്ഥാന സർക്കാർ കൊവിഡ് മരണം സംബന്ധിച്ച മാർഗരേഖകൾ പുതുക്കുമെന്ന് ആരോഗ്യ മന്ത്രി വീണാ ജോർജ് കൂട്ടിച്ചേർത്തിരുന്നു. നടപടിക്രമങ്ങൾ ആരംഭിച്ചുവെന്നും കൊവിഡ് നെഗറ്റീവായി മുപ്പത് ദിവസത്തിനുള്ളിൽ സംഭവിക്കുന്ന മരണങ്ങളും കൊവിഡ് മരണമായി കണക്കാക്കുന്നതും ഉൾപ്പെടെയുള്ള കാര്യങ്ങൾ പരിഗണിച്ചാകും പുതിയ മാർഗരേഖ തയ്യാറാക്കുയെന്നും മന്ത്രി കൂട്ടിച്ചേർത്തിരുന്നു.
വിശദമായ കൊവിഡ് മരണപ്പട്ടിക ഉടൻ പ്രസിദ്ധീകരിക്കുമെന്ന് ആരോഗ്യ മന്ത്രി പറഞ്ഞിരുന്നു. പരാമവധി പേർക്ക് സഹായം ലഭിക്കാനുള്ള നടപടി സ്വീകരിക്കും. നിലവിലെ പട്ടികയിൽ മാറ്റമുണ്ടാകും. ഇതിനായി ആരോഗ്യവകുപ്പ് മുൻകൈ എടുക്കുമെന്നും മന്ത്രി വ്യക്തമാക്കുകയും ചെയ്തിരുന്നു.
