മോൻസന്റെ ഇടപാടുകൾ അടക്കമുള്ള കാര്യങ്ങളാണ് രഹസ്യാന്വേഷണ വിഭാഗം അന്വേഷിച്ചത്. ഉന്നതരായ ആളുകളുമായുള്ള മോൻസന്റെ ബന്ധം, പുരാവസ്തു വ്യാപാരം, തുടങ്ങിയ കാര്യങ്ങളാണ് റിപ്പോർട്ടിൽ പരാമർശിച്ചിരുന്നത്. പുരാവസ്തു വ്യാപാരത്തിന് മോൻസന് ലൈസൻസ് ഇല്ലെന്നും റിപ്പോർട്ട് സംശയം പ്രകടിപ്പിക്കുന്നുണ്ട്.
വിദേശത്ത് അടക്കം മോൻസന് സാമ്പത്തിക ഇടപാടുണ്ട്. മോൻസന്റെ പിതാവ് സർക്കാർ ഉദ്യോഗസ്ഥനായിരുന്നു. സർവ്വീസിലിരിക്കെ പിതാവ് മരണപ്പെട്ടു. മോൻസന്റെ സഹോദരനാണ് ആശ്രിത നിയമനം ലഭിച്ചത്. പ്രൈമറി വിദ്യാഭ്യാസം മാത്രമുള്ള മോൻസൻ കന്യാസ്ത്രീയായിരുന്ന യുവതിയെയാണ് വിവാഹം കഴിച്ചതെന്നും റിപ്പോർട്ടിൽ പറയുന്നു. ഇതിന്റെ അടിസ്ഥാനത്തിൽ എൻഫോഴ്സ്മെന്റ് ഡയറക്ട്രേറ്റ് അന്വേഷണം നടത്തണമെന്ന് ഡിജിപി ആവശ്യപ്പെട്ടിരുന്നുവെന്ന് മാതൃഭൂമി റിപ്പോർട്ട് ചെയ്തു.
എന്നാൽ രഹസ്യാന്വേഷണ വിഭാഗത്തിന്റെ റിപ്പോർട്ടിന്റെ അടിസ്ഥാനത്തിൽ സംസ്ഥാന പോലീസോ ഇഡിയോ മോൻസനെതിരെ അന്വേഷണം നടത്തിയതായി വ്യക്തതയില്ല.
Also Read:
അതേസമയം മോൻസനുമായി വ്യക്തിപരമായ ബന്ധമുണ്ടെന്ന് മുൻ ഡിഐജി എസ് സുരേന്ദ്രൻ പറഞ്ഞു. എന്നാൽ മോൻസന്റെ സാമ്പത്തിക ഇടപാടുകൾക്ക് താൻ കൂട്ടുനിന്നിട്ടില്ലെന്നും അദ്ദേഹം വ്യക്തമാക്കി. തൃശൂർ ഡിഐജിയുടെ ഓഫീസിൽ വെച്ച് പണ കൈമാറ്റം നടന്നുവെന്ന ആരോപണവും സുരേന്ദ്രൻ നിഷേധിച്ചു. തന്റെ സാന്നിധ്യത്തിൽ സാമ്പത്തിക ഇടപാട് നടന്നിട്ടില്ല. തന്റെ വീട്ടിൽ വെച്ച് പണം കൈമാറിയെന്നാണ് പരാതിക്കാർ ആദ്യം പറഞ്ഞത്. പിന്നീട് പറയുന്നത് കാറിൽ വെച്ച് പണം കൈമാറിയെന്നാണ്. തനിക്ക് ഇതുമായി ബന്ധമില്ലെന്നും സുരേന്ദ്രൻ പറഞ്ഞു.
2019 ൽ കൊച്ചിയിൽ പോലീസ് കമ്മീഷ്ണറായിരിക്കെ മയക്കുമരുന്നിനെതിരെയുള്ള പരിപാടിയിൽ വെച്ചാണ് മോൻസനെ പരിചയപ്പെടുന്നത്. വേദിയിൽ വെച്ച് പുരാവസ്തു ശേഖരത്തെക്കുറിച്ച് മോൻസൺ പറയുകയും പിന്നീട് അത് കാണാൻ പോവുകയായിരുന്നുവെന്നും സുരേന്ദ്രൻ പറഞ്ഞു. കുടുംബങ്ങൾ തമ്മിൽ നല്ല രീതിയിലുള്ള ബന്ധമുണ്ടെന്നും പല ആഘോഷത്തിലും പങ്കെടുത്തിട്ടുണ്ടെന്നും അദ്ദേഹം വ്യക്തമാക്കി.
