തിരുവനന്തപുരം: രാജ്യത്ത് കർഷകസംഘടനകൾ പ്രഖ്യാപിച്ച ഭാരതബന്ദിന് ഐക്യദാർഢ്യവുമായി സംസ്ഥാനത്ത് ഹർത്താൽ ആരംഭിച്ചു. ആറുമുതൽ ആറുവരെയാണ് ഹർത്താൽ. ട്രേഡ് യൂണിയനുകളുടെ സംയുക്ത സമരസമിതിയാണ് ഹർത്താൽ പ്രഖ്യാപിച്ചിട്ടുള്ളത്. ഹർത്താലിന് എൽ.ഡി.എഫും ദേശീയ പണിമുടക്കിന് യു.ഡി.എഫും പിന്തുണ പ്രഖ്യാപിച്ചിട്ടുണ്ട്.
കെ.എസ്.ആർ.ടി.സി സർവീസ് നടത്തുന്നില്ല. ആശുപത്രികൾ, റെയിൽവേ സ്റ്റേഷനുകൾ, എയർപോർട്ടുകൾ എന്നിവ കേന്ദ്രീകരിച്ച് പ്രധാനപാതയിൽ പരിമിതമായ ലോക്കൽ സർവീസുകൾ പോലീസ് അകമ്പടിയോടെ നടത്തുന്നുണ്ട്. വൈകീട്ട് ആറുമണിക്കുശേഷം ദീർഘദൂരം ഉൾപ്പെടെ എല്ലാ സർവീസുകളും ആരംഭിക്കുമെന്നും യാത്രക്കാരുടെ തിരക്കുണ്ടെങ്കിൽ അധിക ദീർഘദൂര സർവീസുകൾ ഏർപ്പെടുത്തുമെന്നും കെ.എസ്.ആർ.ടി.സി അറിയിച്ചിട്ടുണ്ട്.
പാൽ, പത്രം, ആംബുലൻസ്, മരുന്നുവിതരണം, ആശുപത്രി, വിവാഹം, രോഗികളുടെ സഞ്ചാരം, മറ്റ് അവശ്യസർവീസുകൾ എന്നിവയെ ഹർത്താലിൽനിന്ന് ഒഴിവാക്കിയിട്ടുണ്ട്. വാഹനങ്ങൾ നിർത്തിയിട്ടും വ്യാപാര-വാണിജ്യ സ്ഥാപനങ്ങൾ അടച്ചിട്ടും ഹർത്താൽ വിജയിപ്പിക്കണമെന്ന് സമരസമിതി അഭ്യർഥിച്ചു. ഹർത്താലിനോട് സഹകരിക്കണമെന്ന് എൽ.ഡി.എഫ്. കൺവീനർ എ. വിജയരാഘവൻ അഭ്യർഥിച്ചിരുന്നു.
തിരുവനന്തപുരത്ത് കെ.എസ്.ആർ.ടി.സി ബസുകൾ ഒടുന്നില്ല. എന്നാൽ റെയിൽവേ സ്റ്റേഷനിൽ നിന്ന് ആർസിസിയിലേക്ക് അടക്കം പോകുന്നവർക്കുള്ള പരിമിതമായ സർവീസ് മാത്രമാണ് നടത്തുന്നത്. നിർബന്ധിച്ച് കടയടക്കലോ, വാഹനങ്ങൾ തടയലോ ഇല്ലെങ്കിലും പൊതുജനങ്ങൾ റോഡിൽ പൊതുവേ കുറവാണ്. എന്നാൽ ഓട്ടോ ടാക്സികൾ നിത്തിലുണ്ട്. പോലീസ് എല്ലായിടത്തും സംരക്ഷണം ഒരുക്കിയിട്ടുണ്ട്.
കൊച്ചിയിൽ കടകമ്പോളങ്ങൾ അടഞ്ഞുകിടക്കുകയാണ്. പൊതുഗതാഗത സംവിധാനം നിശ്ചലമാണ്. സ്വകാര്യ-കെഎസ്ആർടിസി ബസുകൾ സർവീസ് നടത്തുന്നില്ല. വിവിധ ഇടങ്ങളിലേക്ക് പോകാനുള്ളവർ റെയിൽവേ സ്റ്റേഷനിലും കെ.എസ്.ആർ.ടി.സി സ്റ്റാന്റിലും കുടുങ്ങിക്കിടക്കുകയാണ്. സംയുക്ത ട്രേഡ് യൂണിയനുകളുടെ സംയുക്ത പ്രതിഷേധ പ്രകടനം നഗരത്തിൽ നടക്കും.
കോഴിക്കോട് ദീർഘദൂര ബസുകൾ അടക്കമുള്ള സ്വകാര്യ ബസുകളും കെ.എസ്.ആർ.ടി.സിയും സർവീസ് നടത്തുന്നില്ല. സ്വകാര്യ വാഹനങ്ങളും നിരത്തിലിറങ്ങുന്നില്ല. അത്യാവശ്യ കാര്യങ്ങൾക്കായി പുറത്തിങ്ങുന്നവരെ തടയുന്നില്ല. കോഴിക്കോട് റെയിൽവേ സ്റ്റേഷനിൽ നിന്ന് മെഡിക്കൽ കോളേജിലേക്കും വിമാനത്താവളത്തിലേക്കുമുള്ള രണ്ട് സർവീസുകൾ നടത്തുമെന്നാണ് കെ.എസ്.ആർ.ടി.സി അറിയിച്ചിട്ടുള്ളത്.
Content Highlights:Bharat Bandh harthal started in Kerala
