Also Read:
കേരളം ഭീകരരുടെ സുരക്ഷിത താവളമാണെന്നും സ്ത്രീകളെ ഉപയോഗിച്ച് ഭീകരവാദ പ്രവർത്തനങ്ങൾക്ക് നേതൃത്വം നൽകുകയാണെന്നും ലേഖനത്തിൽ ആരോപിക്കുന്നു. മലയാളി മനസിലെ സ്ത്രീ സങ്കൽപങ്ങളൊന്നാകെ കടപുഴകി വീണു. കേരളത്തിലെ സാംസ്കാരിക തനിമയെ ചോദ്യം ചെയ്ത് ലഹരി വിപണിയിലെ ഇടനിലക്കാർ സംസ്ഥാനത്തിന്റെ വിവിധ കേന്ദ്രങ്ങളിൽ നടത്തുന്ന നിശാപാർടികളിലേയും റേവ് പാർടികളിലേയും പെൺ സാന്നിധ്യം നാടിന്റെ സ്ത്രീ മുഖം വികൃതമാക്കി. വഴി തെറ്റുന്ന ഈ നാടിനെയോർത്ത് വിലപിക്കാൻ അന്തിച്ചർച്ചകളിലെ അടിമകൾക്കോ സ്വയം അവരോധിത സാംസ്കാരിക നേതാക്കൾക്കോ സാധിക്കുന്നില്ലെന്നും ലേഖനത്തിൽ പറയുന്നു.
സ്വർണ്ണക്കടത്ത് സംഘങ്ങളും ലഹരി മാഫിയയും ഭീകര സംഘടനകളുടെ കണ്ണികളാണ്. ന്യൂനപക്ഷ ക്ഷേമ പദ്ധതികൾ ഒന്നാകെ വെട്ടിവിഴുങ്ങിയവർ അധികാരം കൈപ്പിടിയിൽ ഒതുക്കി തീവ്രവാദത്തിന് ആക്കം കൂട്ടുകയാണ്. രണ്ട് പതിറ്റാണ്ടിനിടെ കേരളത്തിലെ ഭീകര പ്രവർത്തനങ്ങൾക്ക് ഒഴുകിയെത്തിയ സമ്പത്തിനെക്കുറിച്ച് അന്വേഷണം വേണമെന്നും സഭ ലേഖനത്തിൽ ആവശ്യപ്പെടുന്നു.
അഫ്ഗാനിസ്ഥാനിലെ താലിബാൻ ഭീകരരിൽ നിന്നും ഉയർന്ന മലയാള ഭാഷ കേരളത്തിന്റെ കണ്ണു തുറപ്പിക്കണം. കേരളവുമായുള്ള താലിബാന്റെ ബന്ധമാണ് ഇത് തെളിയിക്കുന്നതെന്നും ലേഖനത്തിൽ ആരോപിക്കുന്നു. ഭീകര പ്രസ്ഥാനങ്ങളിലേക്ക് കേരളത്തിൽ നിന്നും തെന്നിന്ത്യൻ സംസ്ഥാനങ്ങളിൽ നിന്നും ആളുകൾ എത്തിച്ചേർന്നത് ഒരു ദിവസത്തെ സൃഷ്ടിയല്ല. ഡിജിപി വിരമിക്കലിന് ശേഷം കേരളം ഭീകര പ്രസ്ഥാനങ്ങളുടെ സ്ലീപ്പർ സെല്ലാണെന്ന് വിലപിച്ചതിന്റെ പൊരുൾ മനസിലാക്കണം. ഔദ്യോഗിക കാലയളവിൽ ഇവരുടെ കൈകൾക്ക് കൂച്ചുവിലങ്ങിട്ടിരുന്നോ എന്ന സംശയം ബാക്കിയാണെന്നും ലേഖനത്തിൽ പറയുന്നു.
കേരളത്തിലേക്ക് വിദേശത്തു നിന്നും പഠിക്കാൻ എത്തുന്നവർക്കെതിരെയും ലേഖകൻ സംശയം ഉന്നയിക്കുന്നുണ്ട്. ഇവിടെയെത്തുന്നവരിൽ നല്ലൊരു ശതമാനവും അഫ്ഗാനിസ്ഥാൻ, സിറിയ, ഇറാഖ്, ഘാന, വിയറ്റ്നാം എന്നിവിടങ്ങളിൽ നിന്നുള്ളവരാണ്. കാശ്മീരിലെ കേന്ദ്രസർക്കാരിന്റെ ഇടപെടലിന് ശേഷം കാശ്മീർ വിദ്യാർത്ഥികളും എത്തിത്തുടങ്ങി. ഉന്നത വിദ്യാഭ്യാസത്തിന്റെ മറവിൽ കേരളത്തിലെത്തുന്നവരെ നിരീക്ഷിക്കാൻ എന്ത് സംവിധാനമാണ് ഉള്ളതെന്നും ലേഖകൻ ചോദിക്കുന്നു.
