അഞ്ച് ദിവസത്തിനകം അന്തിമ രേഖ പുറത്തുവിടും. വിദ്യാർഥികൾക്ക് യൂണിഫോം നിർബന്ധമാക്കില്ല. സ്കൂളിന് മുന്നിലെ കടകളിൽ പോയി ഭക്ഷണം കഴിക്കാൻ അനുവദിക്കില്ല. ഓട്ടോയിൽ രണ്ട് കുട്ടികളിൽ കൂടുതൽ പാടില്ല. ശരീര ഊഷ്‌മാവ്, ഓക്സിജൻ എന്നിവ പരിശോധിക്കാൻ പ്രത്യേക സംവിധാനം ഒരുക്കും. ചെറിയ ലക്ഷണങ്ങൾ പ്രകടിപ്പിക്കുന്ന കുട്ടികളെ സ്കൂളിലേക്ക് പ്രവേശിപ്പിക്കരുതെന്നും മന്ത്രി പറഞ്ഞു.
സ്കൂൾ തുറക്കുന്നതിന് മുൻപായി സ്കൂൾ വൃത്തിയാക്കാൻ ശുചീകരണ യജ്ഞം നടത്തും. സ്കൂൾ തലത്തിൽ പിടിഎ യോഗം ചേരും. ക്ലാസുകളുടെ ക്രമീകരണം, മുന്നൊരുക്കങ്ങൾ എന്നിവയുമായി ബന്ധപ്പെട്ട കാര്യങ്ങൾ ചർച്ച ചെയ്യുന്നതിനായി അധ്യാപക സംഘടനകളുമായി വിപുലമായ ചർച്ചകൾ നടത്തുമെന്നും മന്ത്രി പറഞ്ഞു. വലിയ സ്കൂളുകൾ ഉള്ള സ്ഥലത്ത് കൂടി കെഎസ്ആർടിസി സർവീസ് നടത്തുന്നതിനെക്കുറിച്ച് ചർച്ച നടക്കുകയാണെന്നും അദ്ദേഹം കൂട്ടിച്ചേർത്തു.
എല്ലാ ദിവസവും ക്ലാസുകൾ അണുവിമുക്തമാക്കും. രക്ഷിതാക്കൾക്ക് ബോധവത്കരണ ക്ലാസ് ഓൺലൈൻ മുഖേനെ നൽകും. സ്കൂളുകളിൽ അധ്യാപകരുടെ നിയന്ത്രണം ഉണ്ടാകും. പ്ലസ് വൺ പ്രവേശനത്തിൽ ആശങ്ക വേണ്ട. മുഴുവൻ വിദ്യാർഥികൾക്കും അവസരം നൽകും. സീറ്റ് ഒഴിഞ്ഞ് കിടക്കുന്ന ജില്ലകളിൽ നിന്ന് കുറവുള്ള ജില്ലകളിലേക്ക് മാറ്റും. മലബാർ മേഖലയിൽ 20 ശതമാനം സീറ്റ് കൂട്ടിയെന്നും മന്ത്രി പറഞ്ഞു.
സംസ്ഥാനത്തെ ഒന്നു മുതൽ ഏഴു വരെ ക്ലാസുകളും പത്ത്, പന്ത്രണ്ട് ക്ലാസുകളുമാണ് നവംബർ ഒന്നാം തിയതി മുതൽ തുറക്കുക. സ്‌കൂളുകള്‍ തുറക്കുന്നതുമായി ബന്ധപ്പെട്ട് വിദ്യാഭ്യാസ വകുപ്പും ആരോഗ്യവകുപ്പും സംയുക്തമായി യോഗം ചേര്‍ന്ന് ആവശ്യമായ തയ്യാറെടുപ്പ് നടത്തണമെന്ന് മുഖ്യമന്ത്രി പിണറായി വിജയൻ മുൻപ് വ്യക്തമാക്കിയിരുന്നു. നവംബര്‍ ഒന്നു മുതല്‍ സ്‌കൂളുകള്‍ തുറക്കാന്‍ കഴിഞ്ഞ ആഴ്ച ചേർന്ന കൊവിഡ് അവലോകന യോഗത്തില്‍ തീരുമാനമായിരുന്നു. നവംബര്‍ 15 മുതല്‍ എല്ലാ ക്ലാസുകളും ആരംഭിക്കുന്നതിന് തയ്യാറെടുപ്പുകള്‍ നടത്താനും പതിനഞ്ച് ദിവസം മുമ്പ് മുന്നൊരുക്കങ്ങള്‍ പൂര്‍ത്തീകരിക്കാനും മുഖ്യമന്ത്രി യോഗത്തില്‍ നിര്‍ദേശം നൽകിയിരുന്നു.
കൊവിഡ് വ്യാപനത്തിൽ നിന്നും കുട്ടികളെ സംരക്ഷിക്കുന്നതിനായി ബയോ ബബിൾ സുരക്ഷ ഒരുക്കുമെന്ന് മന്ത്രി വി ശിവൻകുട്ടിയും ആരോഗ്യ വകുപ്പ് മന്ത്രി വീണാ ജോർജും പറഞ്ഞിരുന്നു. ഇരു വകുപ്പുകളുടെയും സംയുക്ത യോഗത്തിനു ശേഷമാണ് മന്ത്രിമാരുടെ പ്രതികരണം. സ്കൂളുകൾ തുറക്കാൻ എല്ലാ ക്രമീകരണങ്ങളും പൂർത്തിയായതായി വി ശിവൻകുട്ടി പറഞ്ഞു. എത്രയും വേഗം സ്കൂളുകൾ തുറക്കാനുള്ള മാർഗനിർദ്ദേശം പുറത്തിറക്കുമെന്ന് മന്ത്രിമാർ പ്രതികരിച്ചു. വിദ്യാർത്ഥികൾക്ക് ബയോ ബബിൾ സുരക്ഷ ഒരുക്കാനാണ് സംസ്ഥാനം ലക്ഷ്യമിടുന്നത്. കുട്ടികൾ സ്കൂളിലെത്തി തിരിച്ച് വീടുകളിൽ എത്തുന്നതുവരെയുള്ള കാര്യങ്ങൾ സൂക്ഷ്മമായി പരിശോധിച്ച് ക്രമീകരണം ഏർപ്പെടുത്തുമെന്ന് ആരോഗ്യ വകുപ്പ് മന്ത്രി പറഞ്ഞു.
