ഗര്‍ഭനിരോധന മാര്‍ഗം സ്ത്രീകളെ മോശക്കാരാക്കുമോ? പുരുഷ മനസിന്‍റെ വിചിത്ര ഭാവനകള്‍

സെക്‌സും ഗര്‍ഭവും പോലെ മലയാളി അപവാദ മനസിനെ സ്വാധീനിച്ച മറ്റൊരു വിഷയമുണ്ടാവില്ല. നെറ്റ്ഫ്‌ളിക്‌സിലെ ലോകപ്രശസ്തമായ സെക്‌സ് എജ്യുക്കേഷന്‍ വെബ് സീരിസിനെ കുറിച്ച് സംസാരിക്കുന്ന പെണ്‍കുട്ടികള്‍ പോലും സോഷ്യല്‍ മീഡിയയില്‍ മോശക്കാരായി ചിത്രീകരിക്കപ്പെടുന്നുണ്ട്. അപ്പോള്‍, ഗര്‍ഭനിരോധന മാര്‍ഗങ്ങള്‍ ഉപയോഗിക്കുന്ന സ്ത്രീകളെ കുറിച്ച് മലയാളി പുരുഷന്‍മാര്‍ എന്താണ് ആലോചിക്കുന്നുണ്ടാവുക? കുടുംബാസൂത്രണം-ഗര്‍ഭനിരോധനം എന്നിവയെ കുറിച്ചുള്ള നാഷണല്‍ ഫാമിലി ഹെല്‍ത്ത് സര്‍വ്വെ റിപ്പോര്‍ട്ട് ചില സൂചനകള്‍ നല്‍കുന്നുണ്ട്.

ലൈംഗിക അച്ചടക്കമില്ലാത്ത സ്ത്രീകള്‍

ഗര്‍ഭനിരോധന മാര്‍ഗങ്ങള്‍ ഉപയോഗിക്കുന്ന സ്ത്രീകള്‍ ലൈംഗിക അച്ചടക്കമില്ലാത്തവരായി മാറിയേക്കാമെന്നാണ് 15നും 49നും ഇടയില്‍ പ്രായമുള്ള 44 ശതമാനം മലയാളി പുരുഷന്‍മാരും വിശ്വസിക്കുന്നതെന്ന് സര്‍വ്വെ റിപ്പോര്‍ട്ട് പറയുന്നു. ഹിന്ദു വിഭാഗത്തിലെ 45.2 ശതമാനത്തിനും ക്രിസ്ത്യന്‍-മുസ്ലീം വിഭാഗത്തിലെ 42.8 ശതമാനത്തിനും ഈ തോന്നലുണ്ട്. കേരളത്തിലെ 14 ജില്ലകളിലുള്ള 1233 കുടുംബങ്ങളിലും 10969 സ്ത്രീകളിലും 1473 പുരുഷന്‍മാരിലും നടത്തിയ ഫീല്‍ഡ് വര്‍ക്കിലൂടെയാണ് റിപ്പോര്‍ട്ട് തയ്യാറാക്കിയിരിക്കുന്നത്. മുപ്പതിനും 34നും ഇടയില്‍ പ്രായമുള്ളവര്‍ക്കിടയിലാണ് ഈ തോന്നല്‍ കൂടുതലത്രെ.

ദലിത് വിഭാഗങ്ങളിലെ 43 ശതമാനത്തിനും ആദിവാസി വിഭാഗങ്ങളിലെ 27.4 ശതമാനത്തിനും ഒ.ബി.സി വിഭാഗങ്ങളിലെ 44.9 ശതമാനത്തിനും ഈ തോന്നലുണ്ട്. നഗരപ്രദേശങ്ങളിലെ 43.4 ശതമാനം പേര്‍ക്കും ഗ്രാമങ്ങളിലെ 44.8 ശതമാനം പേര്‍ക്കും ഈ കാഴ്ച്ചപാടുണ്ട്. വിദ്യഭ്യാസം കൂടുന്തോറും തോന്നല്‍ കൂടുന്നതായും സര്‍വ്വെ നിരീക്ഷിക്കുന്നു. പന്ത്രണ്ട് വര്‍ഷത്തിലധികം ഔപചാരിക വിദ്യഭ്യാസം ലഭിച്ചവരില്‍ 46.4 ശതമാനം പേര്‍ക്കും ഈ തോന്നലുണ്ട്.

കുടുംബാസൂത്രണ മാര്‍ഗങ്ങള്‍

വിവിധ കുടുംബാസൂത്രണ മാര്‍ഗങ്ങളെ കുറിച്ച് മലയാളിക്ക് പൊതുധാരണയുണ്ട്. 52 ശതമാനം സ്ത്രീകള്‍ക്കും ഫീമെയില്‍ കോണ്ടത്തെ കുറിച്ചറിയാം. പക്ഷെ, അടിയന്തിര സാഹചര്യങ്ങളില്‍ സ്വീകരിക്കാവാവുന്ന ഗര്‍ഭനിരോധന മാര്‍ഗങ്ങളെ കുറിച്ച് 46 ശതമാനം പേര്‍ക്കുമറിയില്ല. അത്യാധുനിക ഗര്‍ഭനിരോധന മാര്‍ഗങ്ങള്‍ ഉപയോഗിക്കുന്ന 38 ശതമാനം പേരും ഒരു വര്‍ഷത്തിനുള്ളില്‍ അവ നിര്‍ത്തുന്നതായും സര്‍വ്വെ നിരീക്ഷിക്കുന്നു. സെക്‌സ് കുറയുന്നതും ഭര്‍ത്താവ് ജോലി ആവശ്യത്തിന് പുറത്തു പോവുന്നതും ആര്‍ത്തവചക്രത്തിലെ പ്രശ്‌നങ്ങളും വിവാഹമോചനവുമാണ് പ്രധാന കാരണങ്ങള്‍.

പുരുഷന്‍മാരും കുടുംബാസൂത്രണവും

കുടുംബാസൂത്രണം സ്ത്രീകളുടെ മേഖലയാണെന്നാണ് 15നും 49നും ഇടയില്‍ പ്രായമുള്ള 16 ശതമാനം പുരുഷന്‍മാരും വിശ്വസിക്കുന്നതെന്ന് സര്‍വ്വെ ഫലം പറയുന്നു. കോണ്ടം ശരിയായ രീതിയില്‍ ഉപയോഗിച്ചാല്‍ ഗര്‍ഭധാരണം തടയാമെന്ന് അമ്പത് ശതമാനം പുരുഷന്‍മാര്‍ക്ക് അറിയാം.

സ്ത്രീകളും കുടുംബാസൂത്രണവും

വിവാഹിതരായ 15നും 49നും ഇടയില്‍ പ്രായമുള്ള 61 ശതമാനം സ്ത്രീകളും എന്തെങ്കിലും തരത്തിലുള്ള ഗര്‍ഭനിരോധന മാര്‍ഗങ്ങള്‍ ഉപയോഗിക്കുന്നവരാണ്. മുന്‍കാലത്തെ അപേക്ഷിച്ചു നോക്കുമ്പോള്‍ സ്ത്രീകളുടെ വന്ധ്യംകരണം കുറഞ്ഞു. പ്രാഥമിക വിദ്യഭ്യാസം നേടാത്ത സ്ത്രീകളില്‍ 72 ശതമാനം പേര്‍ വന്ധ്യംകരണത്തിന് വിധേയമായി. പന്ത്രണ്ടോ അധികമോ വര്‍ഷം വിദ്യഭ്യാസം നേടിയ സ്ത്രീകളില്‍ ഇത് 34 ശതമാനമാണ്. മുസ്ലീം സമുദായത്തില്‍ നിന്നുള്ള സ്ത്രീകളിലാണ് വന്ധ്യംകരണം കുറവ്.

ആണ്‍കുട്ടികളും മലയാളികളും

ആണ്‍കുട്ടികളോട് മലയാളികള്‍ക്ക് പൊതുവില്‍ താല്‍പര്യമുണ്ടെന്നാണ് സര്‍വ്വെ ഫലം പറയുന്നത്. എട്ട് ശതമാനം സ്ത്രീകളും 14 ശതമാനം പുരുഷന്‍മാരും ആണ്‍കുട്ടികള്‍ വേണമെന്ന് ആഗ്രഹിക്കുന്നവരാണ്. ഒരു ആണ്‍കുട്ടിയെങ്കിലും വേണമെന്ന് 51 ശതമാനം സ്ത്രീകളും 58 ശതമാനം പുരുഷന്‍മാരും ആഗ്രഹിക്കുന്നു.

ആണ്‍കുട്ടികളുള്ള സ്ത്രീകള്‍ ഗര്‍ഭനിരോധന മാര്‍ഗങ്ങള്‍ ഉപയോഗിക്കാനുള്ള സാധ്യത കൂടുതലാണ്. ഒരു ആണ്‍കുട്ടിയടക്കം മൂന്നു മക്കളുള്ള സ്ത്രീകളില്‍ 82 ശതമാനവും ഗര്‍ഭനിരോധന മാര്‍ഗം ഉപയോഗിക്കുന്നതായി സര്‍വ്വെഫലം പറയുന്നു. അതേസമയം, രണ്ടു പെണ്‍മക്കളുള്ള സ്ത്രീകളില്‍ 78 ശതമാനം മാത്രമേ ഗര്‍ഭനിരോധന മാര്‍ഗങ്ങള്‍ ഉപയോഗിക്കുന്നുള്ളൂ.

ആണ്‍കുട്ടികളുടെ എണ്ണവും കൂടുതല്‍ കുട്ടികള്‍ വേണമോയെന്ന ആലോചനയും തമ്മില്‍ ബന്ധമുണ്ടെന്നും സര്‍വ്വെഫലം പറയുന്നു. ആകെയുള്ള രണ്ടു കുട്ടികളില്‍ രണ്ടും ആണാണെങ്കില്‍ കൂടുതല്‍ കുട്ടികള്‍ വേണ്ടെന്നാണ് 83 ശതമാനം പേരുടെയും നിലപാട്.

****

[Compiled by അനീബ് പി.എ]