“കേരളത്തിന്റെ മതേതര ശരീരത്തെ സാരമായി ബാധിച്ച ഒരു വിവാദ വിഷയം സൃഷ്ടിച്ച സാമുദായിക വിഭാഗീയതയുടെ പശ്ചാത്തലത്തിൽ ഞാൻ ഏറെ സ്നേഹിക്കുകയും ആദരിക്കുകയും ചെയ്യുന്ന കർദിനാൾ മോർ ബസേലിയോസ് ക്ലീമീസ് കാതോലിക്കാ ബാവാ തിരുമനസ്സുകൊണ്ട് മുൻകൈയെടുത്ത് ഇന്ന് നടത്തിയ മത നേതാക്കളുടെ യോഗം അത്യന്തം സ്വാഗതാർഹമാണ്. പിതാവ് തുടർന്നു നടത്തിയ പ്രസ്താവനയും സമൂഹം ഹൃദയത്തിൽ ഏറ്റെടുക്കും. എന്നാൽ പൊതുസമൂഹം മുഴുവൻ ആവശ്യപ്പെട്ടിട്ടും കേരള സർക്കാർ ഈ വിഷയത്തിൽ സർവ്വകക്ഷി/ സർവ്വമത യോഗം വിളിച്ചുകൂട്ടാൻ വൈകുന്നത് ഖേദകരമാണ്. ഇക്കാര്യത്തിൽ ഇനിയും അനാസ്ഥ ഉണ്ടായാൽ അത് ഇടതുപക്ഷത്തിന്റെ മതേതര കാഴ്ചപ്പാടിന് കനത്ത ആഘാതം ആയിരിക്കും സൃഷ്ടിക്കുക.” അദ്ദേഹം ഫേസ്ബുക്ക് പോസ്റ്റിൽ വ്യക്തമാക്കി.
അതേസമയം നാർക്കോട്ടിക്ക് ജിഹാദ് പരാമർശവുമായി ബന്ധപ്പെട്ട് ദീപിക ദിനപത്രത്തിൽ വന്ന ലേഖനം കത്തോലിക്കാ സഭയുടെ നിലപാടല്ലെന്ന് സിറോ മലങ്കര കത്തോലിക്കാ സഭയുടെ അധ്യക്ഷൻ മാർ ബസേലിയോസ് ക്ലീമിസ് ബാവ വ്യക്തമാക്കിയിരുന്നു. മയക്കു മരുന്നിനെ മയക്കു മരുന്ന് എന്നു തന്നെ പറഞ്ഞാൽ മതിയെന്ന് അദ്ദേഹം പറഞ്ഞു. തിരുവനന്തപുരത്ത് വിവിധ മത മേലധ്യക്ഷന്മാരുടെ നേതൃത്വത്തിൽ യോഗം നടത്തിയതിനു ശേഷം പ്രതികരിക്കുകയായിരുന്നു ക്ലീമിസ് ബാവ.
വിഷയത്തിൽ സർക്കാർ സർവ്വ കക്ഷി യോഗം വിളിക്കുന്നത് സ്വാഗതാർഹമാണെന്ന് അദ്ദേഹം പറഞ്ഞു. സർക്കാരിനെ അറിയിച്ചുകൊണ്ടല്ല ഇന്ന് വിവിധ മത സംഘടനകളുടെ യോഗം ചേർന്നത്. കേരളത്തിൽ മത സൗഹാ‍ര്‍ദം സൂക്ഷിക്കണമെന്നും ഇതര മതങ്ങൾക്ക് മുറിവേൽക്കുന്ന സാഹചര്യം ഒഴിവാക്കണമെന്നും അദ്ദേഹം വ്യക്തമാക്കി.
മറ്റ് മതങ്ങളെ ബഹുമാനത്തോടെ കാണുന്ന സാഹചര്യം ഒരുക്കണം. ഇതര മതങ്ങളെ മുറിവേൽപ്പിക്കരുത്. നാടിന്റെ മതസൗഹാ‍ര്‍ദം കാത്തുസൂക്ഷിക്കണം. സമാധാനപരമായ അന്തരീക്ഷം കാത്തു സൂക്ഷിക്കുന്നതിനാണ് ഇന്ന് യോഗം ചേ‍ര്‍‍ന്നതെന്നും ക്ലീമിസ് ബാവ പറഞ്ഞു.
