കണ്ണൂർ സർവ്വകലാശാലയ്ക്ക് സിലബസിന്റെ കാര്യത്തിൽ പ്രത്യക്ഷത്തിൽ തെറ്റുപറ്റി. അത് തിരുത്തുകയാണ് വേണ്ടത്. സർവ്വകലാശാലകൾ സ്വയംഭരണ സ്ഥാപനങ്ങളാണ്. അവ സർക്കാർ തീരുമാനങ്ങൾ അനുസരിച്ച് പ്രവർത്തിക്കുന്നവയല്ലെന്നും അദ്ദേഹം പറഞ്ഞു.
അതേസമയം, ലൗ ജിഹാദിനൊപ്പം നാർക്കോട്ടിക് ജിഹാദും കേരളത്തിൽ നടക്കുന്നുണ്ടെന്ന പാലാ ബിഷപ്പ് മാർ ജോസഫ് കല്ലറങ്ങാട്ടിൻ്റെ പ്രസ്താവന തള്ളി മുഖ്യമന്ത്രി പിണറായി വിജയൻ രംഗത്തുവന്നിരുന്നു. ഉത്തരവാദിത്തപ്പെട്ട സ്ഥാനത്ത് ഇരിക്കുന്നവർ ഇത്തരം പ്രശ്നം കൈകാര്യം ചെയ്യുമ്പോൾ ശ്രദ്ധിക്കണം. ഏതെങ്കിലും തരത്തിലുള്ള മതപരമായ വേർതിരിവ് ഉണ്ടാകാതിരിക്കാനും അനാവശ്യമായി ചേരികൾ സൃഷ്ടിക്കാതിരിക്കാനും ശ്രദ്ധിക്കണമെന്നും മുഖ്യമന്ത്രി പറഞ്ഞു.
പാലാ ബിഷപ്പിനെതിരെ പ്രതിപക്ഷ നേതാവ് വി ഡി സതീശൻ രംഗത്തെത്തിയിരുന്നു. നാർക്കോട്ടിക് ജിഹാദ് എന്ന വാദം സംഘപരിവാർ അജണ്ടയാണ്. ക്രൈസ്തവരെയും മുസ്ലീം വിഭാഗങ്ങളെയും അകറ്റുകയാണ് ഇതിലൂടെ ലക്ഷ്യം വെക്കുന്നത്. കുഴപ്പം ഉണ്ടാക്കാൻ മാത്രമായി ചില ആളുകൾ വന്നിരിക്കുകയാണ്. ഇവർക്ക് അവസരം നൽകരുതെന്നും അദ്ദേഹം പറഞ്ഞു.
സമൂഹത്തെ ഭിന്നിപ്പിക്കുന്ന തലത്തിലേക്ക് വിഷയം വളർത്തരുത്. കേരളത്തിലെ സമുദായ സംഘർഷം ഉണ്ടാകാതിരിക്കാനും നോക്കുന്നതിനൊപ്പം സമുദായ മൈത്രി നിലനിൽക്കണം എന്നാണ് ആഗ്രഹിക്കുന്നത്. അനാവശ്യ അഭിപ്രായ പ്രകടനങ്ങൾ നന്നല്ല. മുഖ്യധാരാ രാഷ്ട്രീയ പാർട്ടികളും മാധ്യമങ്ങളും പ്രശ്നം വഷളാകാതെ നോക്കണമെന്നും വി ഡി സതീശൻ വ്യക്തമാക്കി.
ബിഷപ്പ് ഉന്നയിച്ച ആരോപണം വഷളാക്കാൻ മറ്റൊരു വിഭാഗം ശ്രമം നടത്തുന്നുണ്ട്. അതിലേക്ക് പോകാതെ പ്രശ്നം അവസാനിപ്പിക്കണം. പരാതിയുണ്ടെങ്കിൽ സർക്കാരിനെ അറിയിക്കണമെന്നും സതീശൻ പറഞ്ഞു.
എന്നാൽ ബിഷപ്പിനെ പിന്തുണച്ച് ബിജെപി രംഗത്തെത്തി. അപ്രിയ സത്യം പറഞ്ഞവരെ ഭരണപക്ഷവും പ്രതിപക്ഷവും വളഞ്ഞിട്ടാക്രമിക്കുകയാണെന്ന് കേന്ദ്ര മന്ത്രി വി മുരളീധരൻ പറഞ്ഞു. മുഖ്യമന്ത്രിയും പ്രതിപക്ഷ നേതാവും ജിഹാദികളുടെ വക്താക്കളാണെന്നും അദ്ദേഹം ആരോപിച്ചു.
സമുദായത്തിന്റെ ചില ആശങ്കകളാണ് ബിഷപ്പ് വ്യക്തമാക്കിയത്. അത് വൈകാരികമായ അഭിപ്രായമല്ല. എഴുതി വായിച്ച സുചിന്തിത അഭിപ്രായമാണ്. അതിനെതിരെ പറഞ്ഞതുകൊണ്ട് സത്യം ഇല്ലാതാകില്ലെന്നും മുരളീധരൻ പറഞ്ഞു. ജോസഫ് മാഷിന്റെ കൈ വെട്ടിയ കാലം കഴിഞ്ഞെന്ന് ജിഹാദികളെ പിന്തുണയ്ക്കുന്നവർ മനസിലാക്കണം. കേരളത്തിൽ നാർക്കോട്ടിക്ക് ജിഹാദ് ഉണ്ടോയെന്ന് കേന്ദ്ര സർക്കാരിനോട് ചോദിച്ചിട്ടു പറയാമെന്ന് മാധ്യമ പ്രവർത്തകരുടെ ചോദ്യത്തോട് അദ്ദേഹം പ്രതികരിച്ചു.
