ബിഷപ്പിൻ്റെ ഭാഗത്ത് നിന്നും ഇത്തരമൊരു പ്രതികരണം ഉണ്ടായിട്ട് അധികാരത്തിലിരിക്കുന്ന സർക്കാർ പ്രതികരിക്കാത്തതാണ് വലിയ അപകടം. സമൂഹത്തിൽ സ്പർധ ഉണ്ടാകാതിരിക്കാനുള്ള ശ്രമമാണ് ഇതെന്ന് വ്യക്തമായ ബോധ്യമുണ്ട്. സമൂഹത്തിൽ സ്പർധയുണ്ടാക്കാൻ ശ്രമിക്കുന്നുവെന്ന കാരണത്താൽ കേസെടുത്ത് നിയമ നടപടികൾ സ്വീകരിക്കുകയുമാണ് വേണ്ടതെന്നും ഷൈജു ആൻ്റണി പറഞ്ഞു.
ഇത്തരം പ്രസ്താവനകൾക്കെതിരെ വിശ്വാസികളുടെ ഭാഗത്ത് നിന്ന് തന്നെ പ്രതികരണം ഉണ്ടാകണം. എന്ത് അടിസ്ഥാനത്തിലാണ് ബിഷപ്പിൻ്റെ ഭാഗത്ത് നിന്നും ഇത്തരം പ്രതികരണം ഉണ്ടായതെന്ന് തനിക്കറിയില്ല. കേസെടുത്ത് അദ്ദേഹത്തോട് തന്നെ തെളിവുകൾ ആവശ്യപ്പെടുകയാണ് വേണ്ടത്. കത്തോലിക്ക വിഭാഗത്തിലെ യുവതി – യുവാക്കളെ ലക്ഷ്യമാക്കി നടക്കുന്നുണ്ടെന്ന് പറഞ്ഞ സ്ഥിതിക്ക് ബിഷപ്പിൻ്റെ കൈവശം തെളിവ് ഉണ്ടായിരിക്കുമല്ലോ. ഇത്തരമൊരു ഗുരുതര ആരോപണം ഉന്നയിക്കുന്നതിന് മുൻപായി കേസ് നടപടികൾ സ്വീകരിക്കുകയും കൈയിലുള്ള തെളിവുകൾ സർക്കാർ ഏജൻസികൾക്ക് മുന്നിൽ നൽകുകയുമാണ് ചെയ്യേണ്ടിയിരുന്നത്. അല്ലാതെ വിശ്വാസികളെ ഭയപ്പെടുത്തുകയല്ല വേണ്ടതെന്നും ഷൈജു ആൻ്റണി വ്യക്തമാക്കി.
ആരോപണങ്ങളിൽ പറയുന്ന കാര്യങ്ങൾ തെളിയിക്കാൻ കഴിയുന്ന തെളിവുകൾ കൈവശമില്ലാത്തതിനാണ് കേസ് കൊടുക്കാൻ ആവശ്യപ്പെടുന്നത്. മുൻപ് ലൗ ജിഹാദുമായി ബന്ധപ്പെട്ട് ആരോപണങ്ങൾ ഉന്നയിച്ചപ്പോൾ കെസിബിസി രംഗത്ത് വന്നപ്പോൾ തെളിവുകൾ ആവശ്യപ്പെട്ടിരുന്നു. എന്നാൽ ഇന്നുവരെ തെളിവുകൾ നൽകാൻ അധികൃതർ തയ്യാറായില്ലെന്നും ഷൈജു ആൻ്റണി പറഞ്ഞു.
ഏകീകരിച്ച ആരാധനാക്രമത്തിനെതിരെ ശക്തമായ അമർഷത്തിലാണ് വിശ്വാസികൾ. ഈ സമയത്ത് മറ്റൊരു സാധനം ഇട്ട് നൽകുകയാണ്. ഇനി ഇക്കാര്യത്തിൽ ചർച്ച നടക്കാനാണ് ഇങ്ങൻ ചെയ്യുന്നത്. മുസ്ലീം – ക്രിസ്ത്യൻ വിഭാഗങ്ങൾ തമ്മിലടിക്കുന്ന ചർച്ചയിൽ ക്രിസ്ത്യാനികൾ ഒന്നിച്ച് നിൽക്കണമെന്ന് ഇനി പറയും. ഇതിന് പിന്നാലെ ബിഷപ്പിനെ അനുകൂലിക്കുന്ന അൽമായ സംഘടനകളും ക്രൈസ്തവ സഭയിലെ ക്രിസംഘികളും രംഗത്തുവരാനാണ് സാധ്യതയെന്ന് ഷൈജു ആൻ്റണി വ്യക്തമാക്കി.
ഇളം പ്രായത്തിൽ തന്നെ പെൺകുട്ടികളെ വശത്താക്കുക എന്ന ലക്ഷ്യത്തോടെ ലൗ ജിഹാദിനൊപ്പം നാർക്കോട്ടിക് ജിഹാദും കേരളത്തിൽ നടക്കുന്നുണ്ടെന്നായിരുന്നു കല്ലറങ്ങാട്ട് പറഞ്ഞത്. ഇളം പ്രായത്തിൽ തന്നെ പെൺകുട്ടികളേ വശത്താക്കുക എന്ന ലക്ഷ്യത്തോടെ സ്കൂളുകളിലും കോളേജുകളിലും ഹോസ്റ്റലുകളിലും കച്ചവടസ്ഥാപനങ്ങളിൽ ജിഹാദികൾ വലവിരിച്ചുവെന്ന് നാം തിരിച്ചറിയണം. പൊതുസ്ഥലങ്ങളിലും ഇത്തരം അവസ്ഥയുണ്ട്. നാം ഒരുപാട് വൈകിപ്പോയി. കേരളത്തിൽ നാർക്കോട്ടിക് ജിഹാദാണ് നടക്കുന്നത്. അമുസ്ലീങ്ങളെ പ്രത്യേകിച്ച് ചെറുപ്പക്കാരെ ലഹരിമരുന്നിന് അടിമയാക്കാൻ ശ്രമിക്കുന്ന അവസ്ഥയാണ് കേരളത്തിലുള്ളതെന്നും ബിഷപ്പ് ആരോപിച്ചു. കത്തോലിക്ക യുവാക്കളിൽ മയക്കുമരുന്ന് ഉപയോഗം വ്യാപകമാക്കാൻ ഗൂഢനീക്കം നടക്കുന്നുണ്ട്. ഈ സാഹചര്യത്തിൽ കത്തോലിക്ക കുടുംബങ്ങൾ കരുതിയിരിക്കണം. ഇതര മതസ്ഥരായ യുവതികൾ ഇസ്ലാമിക് സ്റ്റേറ്റ് (ഐഎസ്) ക്യാമ്പിൽ എങ്ങനെ എത്തിയെന്ന് പരിശോധിച്ചാൽ ഇക്കാര്യങ്ങൾ മനസിലാകുമെന്നും അദ്ദേഹം പറഞ്ഞിരുന്നു.
