കോതമംഗലം: കോതമംഗലത്ത് വീടിന്റെ കാർപോർച്ചിൽ കിടന്ന കാർ കാട്ടാന കുത്തിമറിക്കുന്നതിന്റെ ദൃശ്യങ്ങൾ പുറത്ത്. കോട്ടപ്പാറ വനത്തിൽനിന്നെത്തിയ കൊമ്പനാന വടക്കുംഭാഗം സ്വദേശി വർഗീസിന്റെ വീട്ടുവളപ്പിൽ കയറിയാണ് വലിയ നാശനഷ്ടങ്ങൾ വരുത്തിയത്.
പുലർച്ചെ നാലരയോടെയാണ് കാട്ടുകൊമ്പൻ വീട്ടുപരിസരത്തെത്തി ആക്രമണം നടത്തിയത്. വന്നയുടൻ പോർച്ചിൽ കിടന്ന കാർ കൊമ്പുകൊണ്ട് കുത്തി നീക്കുകയും മറിച്ചിടാൻ ശ്രമിക്കുകയും ചെയ്തു. ഇടിയുടെ ആഘാതത്തിൽ കാറിന് കേടുപാടുകൾ സംഭവിച്ചു.
ശബ്ദം കേട്ട് വീട്ടിലുള്ളവർ ഉണർന്നപ്പോൾ ആന മുറ്റത്തുനിൽക്കുന്നതാണ് കണ്ടത്. വീട്ടുകാർ ശബ്ദമുണ്ടാക്കിയതോടെ ആന പിൻവാങ്ങി. എന്നാൽ പോകുന്ന പോക്കിൽ വീട്ടുപരിസരത്തെ വാഴ, കപ്പ, തുടങ്ങിയ കൃഷികൾ ആന നശിപ്പിച്ചു.
ഈ മേഖലയിൽ ഏറെക്കാലമായി കാട്ടാനയുടെ ഭീഷണി നിലനിൽക്കുന്നുണ്ട്. നിരവധി തവണ കാട്ടാനയുടെ ആക്രമണം ഉണ്ടാവുകയും നാട്ടുകാർപരാതി നൽകുകയും ചെയ്തിരുന്നു. വിഷയത്തിൽ വനംവകുപ്പ് ആവശ്യമായ നടപടികൾ സ്വീകരിക്കണമെന്നാണ് നാട്ടുകാർ ആവശ്യപ്പെടുന്നത്.
Content Highlights:Wild elephant Attempts to stab car
