മരിച്ച 12 വയസുകാരൻ്റെ വീട്ടിലെ ആടിനു രണ്ടര മാസം മുൻപ് എന്തോ അസുഖം വന്നിരുന്നതായി വിവരം ലഭിച്ചിട്ടുണ്ടെന്നും ഇക്കാര്യം പരിശോധിക്കുകയാണെന്നും മന്ത്രി അറിയിച്ചു. കൂടാതെ വീട്ടിൽ മുൻപ് സന്ദര്‍ശനത്തിനെത്തിയ ബന്ധുക്കളെ ഉള്‍പ്പെടെ നിരീക്ഷിക്കും. നിപ ബാധയുട പശ്ചാത്തലത്തിൽ നടത്തിയ അവലോകന യോഗത്തിനു ശേഷമായിരുന്നു മന്ത്രിയുടെ പ്രതികരണം. രോഗബാധയുെ നില എല്ലാ ദിവസവും നാലു മണിയ്ക്കു മുൻപ് അറിയിക്കുമെന്നും മന്ത്രി അറിയിച്ചു.
ഇതിനിടെ നിപ ബാധിച്ചു മരിച്ച കുട്ടിയുടെ മൃതദേഹം പ്രത്യേക പ്രോട്ടോകോൾ അനുസരിച്ച് ഖബറടക്കി. കോഴിക്കോട് കണ്ണംപറമ്പ് ജുമാ മസ്ജിദ് ഖബര്‍സ്ഥാനിലാണ് മൃതദേഹം സംസ്കരിച്ചത്. ആരോഗ്യവകുപ്പ് ജീവനക്കാരുടെയും കോഴിക്കോട് കോര്‍പ്പറേഷൻ ജീവനക്കാരുടെയും മേൽനോട്ടത്തിലാണ് സംസ്കാരം നടന്നത്. കോഴിക്കോട്ടെ സ്വകാര്യ ആശുപത്രിയിലെ ചികിത്സയ്ക്കിടെ ഇന്നു പുലര്‍ച്ചെ അഞ്ച് മണിയ്ക്കാണ് കുട്ടി മരിച്ചത്. ഇന്നലെ രാത്രി തന്നെ പരിശോധനാ ഫലം പോസിറ്റീവാണെന്ന റിപ്പോര്‍ട്ടുകള്‍ വന്നിരുന്നതെങ്കിലും മൂന്ന് സാംപിളുകളും പോസിറ്റീവാണെന്ന് ആരോഗ്യവകുപ്പ് സ്ഥിരീകരിച്ചത് ഇന്നു രാവിലെയായിരുന്നു.
Also Read:
നിലവിൽ കുട്ടിയുടെ സമ്പര്‍ക്കപ്പട്ടികയിൽ മൊത്തം 188 പേരാണ് ഉള്ളത്. ഇവരെല്ലാവരും നിരീക്ഷണത്തിലാണ്. സ്വകാര്യ ആശുപത്രിയിലെ 36 ആരോഗ്യപ്രവര്‍ത്തകരും പട്ടികയിലുണ്ട്. കൂടാതെ കുട്ടിയുമായി ആദ്യം പോയ സ്വകാര്യ ക്ലിനിക്കിലെ എട്ട് ജീവനക്കാരും പട്ടികയിലുണ്ട്. ഇവരിൽ രണ്ട് പേര്‍ക്ക് നിലവിൽ രോഗലക്ഷണങ്ങളുണ്ട്. നിപ സ്ഥിരീകരിച്ച സാഹചര്യത്തിൽ പ്രതിരോധ കര്‍മ പരിപാടികള്‍ തുടങ്ങിയതായി മന്ത്രി പറഞ്ഞു. ഹൈറിസ്ക് സമ്പര്‍ക്കപ്പട്ടികയിലുള്ള 20 പേരെ ഇന്നു മെഡിക്കൽ കോളേജിലേയ്ക്ക് മാറ്റും.
രോഗബാധ കണ്ടെത്തിയ വാര്‍ഡ് പൂര്‍ണമായും അടച്ചിട്ടുണ്ട്. കൂടാതെ ഇതിൻ്റെ മൂന്ന് കിലോമീറ്റര്‍ പരിധിയിലും ലോക്ക് ഡൗൺ പ്രഖ്യാപിക്കും. കൊവിഡിനെ അപേക്ഷിച്ച് അൻപത് ശതമാനത്തിലധികം മരണനിരക്കുള്ള സാഹചര്യത്തിലാണ് ആരോഗ്യവകുപ്പ് കര്‍ശന നടപടികള്‍ കൈക്കൊള്ളുന്നത്.
Also Read:
രോഗനിയന്ത്രണം സംബന്ധിച്ച ചര്‍ച്ചകള്‍ക്കായി നിലവിൽ ആരോഗ്യമന്ത്രി വീണ ജോര്‍ജും പൊതുമരാമത്ത് വകുപ്പ് മന്ത്രി മുഹമ്മദ് റിയാസും കോഴിക്കോട്ടുണ്ടെന്ന് മുൻ ആരോഗ്യമന്ത്രി കെകെ ശൈലജ മാധ്യമങ്ങളോടു പറഞ്ഞു. കോഴിക്കോട് മെഡിക്കൽ കോളേജിൽ ഉള്‍പ്പെടെ മുന്നൊരുക്കങ്ങള്‍ നടക്കുന്നുണ്ടന്നും കൊവിഡ് 19 നിയന്ത്രണത്തിനായി സ്വീകരിച്ച മുന്നൊരുക്കങ്ങള്‍ നിപ നിയന്ത്രണത്തിനും സഹായകമാകുമെന്നാണ് സര്‍ക്കാര്‍ പ്രതീക്ഷിക്കുന്നത്. പ്രത്യേക ഐസൊലേഷൻ വാര്‍ഡ് ഉള്‍പ്പെടെ സജ്ജീകരിച്ചിട്ടുള്ളത് കോഴിക്കോട് മെഡിക്കൽ കോളേജിലാണ്. എല്ലാ വര്‍ഷവും നിപ വൈറസ് ബാധ ആവര്‍ത്തിക്കാനുള്ള സാഹചര്യമുണ്ടെന്നു മുൻപ് തന്നെ വിദഗ്ധര്‍ മുന്നറിയിപ്പ് നല്‍കിയിരുന്നുവെന്നും രോഗബാധ റിപ്പോര്‍ട്ട്ചെയ്തതിൻ്റെ അടിസ്ഥാനത്തിൽ കണ്ണൂര്‍, മലപ്പുറം ജില്ലകളിലും ജാഗ്രതാ നിര്‍ദേശം നല്‍കിയിട്ടുണ്ടെന്നും കെകെ ശൈലജ വ്യക്തമാക്കി.
