ഇടയലേഖനം വായിക്കുന്നതിനിടെ ഒരു വിഭാഗം വിശ്വാസികൾ അൾത്താരയിൽ കയറി തടസപ്പെടുത്തി. ഇടയലേഖനം വായിക്കുന്നത് തടഞ്ഞ നടപടിയിൽ എതിർപ്പുമായി മറ്റൊരു വിഭാഗവും രംഗത്ത് എത്തിയതോടെയാണ് പള്ളിക്കുള്ളിൽ പ്രതിഷേധം ഉണ്ടായത്. ആലഞ്ചേരിയുടെ ലേഖനം വായിക്കാൻ അനുവദിക്കില്ലെന്ന് വ്യക്തമാക്കിയ പ്രതിഷേധക്കാർ ഇടയലേഖനം പള്ളിക്ക് മുന്നിൽ കത്തിച്ചു.
എതിർപ്പ് തുടരുന്നതിനിടെ സിനഡ് തീരുമാനത്തെയും കർദിനാളിനെയും അനുകൂലിക്കുന്ന അതിരൂപതയിലെ ഒരു വിഭാഗം വൈദികർ സർക്കുലർ പള്ളികളിൽ വായിച്ചു. സഭയുടെ കീഴിലുള്ള മറ്റ് അതിരൂപതകളിലും ഇടയലേഖനം വായിക്കും. ഇരിങ്ങാലക്കുട രൂപതയിലെ ഒരു വിഭാഗം വൈദികർ സർക്കുലർ വായിക്കില്ലെന്നാണ് സൂചന. കുർബാന ഏകീകരണത്തിൽ ഔദ്യോഗികമായി പരാതി നൽകിയ പശ്ചാത്തലത്തിൽ ഇടലേഖനം വായിക്കാൻ കഴിയില്ലെന്നാണ് എറണാകുളം അങ്കമാലി അതിരൂപതയിലെ വിമത വിഭാഗത്തിൻ്റെ നിലപാട്.
കുർബാനയിലെ രീതികൾ ഏകീകരിക്കണമെന്ന നിർദേശത്തിൽ എതിർപ്പ് വ്യക്തമാക്കി എറണാകുളം – അങ്കമാലി അതിരൂപതയിലെ വൈദികർ മാർപാപ്പയ്ക്ക് കത്ത് എഴുതിയിരുന്നു. മാർപാപ്പയ്ക്ക് അയച്ച കത്തിൽ അതിരൂപതയിൽപ്പെട്ട 466 വൈദികർ ഒപ്പിട്ടു. ഇന്ത്യയിലെ പൗരസ്ത്യ സഭയുടെയും അപ്പോസ്തോലിക് നൂൺസിയോയുടെയും പ്രിഫെക്റ്റിനും മെമ്മോറാണ്ടം അയച്ചിട്ടുണ്ട്. ഏകീകരണ രീതി നിർബന്ധിച്ച് അടിച്ചേൽപ്പിക്കാൻ ശ്രമിച്ചാൽ സഭയുടെ ഐക്യത്തെ ബാധിക്കുമെന്ന് വൈദികർ വിലയിരുത്തുന്നുണ്ട്.
സീറോ മലബാർ സഭയുടെ കുർബാന ആചരണത്തിൽ വിവിധ സ്ഥലങ്ങളിൽ പല രീതിയിലുള്ള രീതികളാണ് പിന്തുടരുന്നത്. വിശ്വാസികളെ അഭിമുഖീകരിച്ചും ബലിപീഠത്തെ അഭിമുഖീകരിച്ചുമാണ് കുർബാനയിലെ ഭാഗങ്ങൾ ചൊല്ലുന്നത്. എന്നാൽ, കുർബാനയുടെ ആദ്യഭാഗം ജനങ്ങൾ അഭിമുഖമായും പ്രധാന ഭാഗം അൾത്താരയ്ക്ക് അഭിമുഖമായും നടത്തണമെന്നാണ് വത്തിക്കാൻ നൽകിയിരിക്കുന്ന നിർദേശം. മാർപാപ്പ നൽകിയിരിക്കുന്ന ഈ നിർദേശത്തിനെതിരെയാണ് ഒരു വിഭാഗം വൈദികർ രംഗത്തുവന്നിരിക്കുന്നത്. എറണാകുളം – അങ്കമാലി അതിരൂപതയടക്കം ആറ് അതിരൂപതകളിൽ ജനാഭിമുഖമായിട്ടാണ് കുർബാന നടത്തുന്നത്.
കുർബാന ഏകീകരണം സംബന്ധിച്ച അന്തിമ തീരുമാനം മാർപാപ്പയാണ് സ്വീകരിക്കേണ്ടതെന്നും ഇതിൽ മാറ്റം വരുത്താൻ സിനഡിന് അധികാരമില്ലെന്നും ഇടയലേഖനത്തിൽ പറയുന്നുണ്ട്. ഇതാണ് ഒരു വിഭാഗം വൈദികരിൽ നിന്ന് എതിർപ്പുണ്ടാകാൻ കാരണമായത്.
സിനഡ് പുതുക്കിയ കുർബാന രീതിയിൽ ആദ്യഭാഗം വിശ്വാസികൾക്ക് നേരെയും പ്രധാനഭാഗം അൾത്താരയ്ക്ക് അഭിമുഖമായും ആണ് നടത്തുക. നവംബർ 28 മുതൽ പുതുക്കിയ രീതി തുടങ്ങാനാണ് സിനഡ് നിർദേശം. എന്നാൽ മുഴുവൻ സമയവും ജനാഭിമുഖ കുർബാന തുടരണമെന്നാണ് എറണാകുളം അങ്കമാലി അതിരൂപതയിലെ ഒരു വിഭാഗം വൈദികരുടെ ആവശ്യം.
സിനഡിൻ്റെ ഭാഗത്ത് നിന്നുമുണ്ടായ തീരുമാനത്തെ അംഗീകരിക്കാൻ കഴിയില്ലെന്ന വാദമാണ് എറണാകുളം അങ്കമാലി അതിരൂപതയിലെ ഒരു വിഭാഗം വൈദികർ ഉന്നയിക്കുന്നത്. ഒരു വിഭാഗം വിശ്വാസികളുടെ പിന്തുണ തങ്ങൾക്കുണ്ടെന്നും ഇവർ വ്യക്തമാക്കുന്നുണ്ട്. കുർബാനയിലെ രീതികൾ ഏകീകരിക്കണമെന്ന ഫ്രാൻസിസ് മാർപാപ്പയുടെ നിർദേശം നടപ്പിലാക്കണമെന്ന് ഇന്ത്യയിലെ വത്തിക്കാൻ സ്ഥാനപതി ആർച്ച് ബിഷപ്പ് ലിയോ പോൾ ദോ ജിറേലി വ്യക്തമാക്കിയിരുന്നു. എന്നാൽ അമ്പത് വർഷമായി തുടരുന്ന രീതികൾ തുടർന്നും പിന്തുടരാൻ അനുവദിക്കണമെന്ന് ആവശ്യപ്പെട്ട് വൈദികർ മാർപാപ്പയ്ക്ക് കത്തയച്ചിരുന്നു.
