ഡിസിസി അധ്യക്ഷ തെരഞ്ഞെടുപ്പുമായി ബന്ധപ്പെട്ട് പരസ്യപ്രതികരണങ്ങളും നേതാക്കൾക്കെതിരായ നടപടികളും തുടരുന്നതിനിടെയാണ് കെ മുരളീധരൻ പുറത്താക്കപ്പെട്ടവർക്കെതിരെ പരിഹാസവുമായെത്തിയത്. തിരുവനന്തപുരം ഡിസിസി പ്രസിഡന്റായി പാലോട് രവി ചുമതലയേൽക്കുന്ന ചടങ്ങിലായിരുന്നു മുരളീധരന്റെ പ്രസ്താവന. പാലോട് രവിയെ അധ്യക്ഷനാക്കിയതിനെതിരെ പ്രതികരിച്ച് പാർട്ടി വിട്ട പിഎസ് പ്രശാന്ത് കഴിഞ്ഞദിവസം സിപിഎമ്മുമായി സഹകരിച്ച് പ്രവർത്തിക്കാൻ തീരുമാനിച്ചിരുന്നു.
Also Read :
അതേസമയം തെറ്റിദ്ധാരണയുടെ പേരിൽ പാർട്ടിയിൽ നിന്ന് പുറത്ത് പോയവരെ മടക്കി കൊണ്ട് വരാൻ ശ്രമിക്കണമെന്നും കെ മുരളീധരൻ പറഞ്ഞു. പാര്ട്ടിയില് സമൂലമാറ്റം വേണമെന്നും അദ്ദേഹം ആവശ്യപ്പെട്ടു. അച്ചടക്കം പല കാലങ്ങളിലും ലംഘിക്കപ്പെട്ടിട്ടുണ്ട്. പക്ഷെ ഇനി അങ്ങനെ മുന്നോട്ടുപോകാനാകില്ല. ആരെയും മാറ്റി നിര്ത്തരുതെന്നും മുരളീധരന് ആവശ്യപ്പെട്ടു.
രമേശ് ചെന്നിത്തലയ്ക്കെതിരെ പരോക്ഷ വിമർശനം ഉന്നയിച്ച കെ മുരളീധരൻ പ്രസിഡന്റുമാര് ചുമതലയേല്ക്കുന്ന വേദി കലാപവേദിയാക്കരുതെന്നും പറഞ്ഞു. പഴയതൊക്കെ ഒരു പാട് പറയാനുണ്ടെന്നും താൻ താൻ ചെയ്യുന്ന കർമ്മങ്ങൾ താൻ താൻ അനുഭവിച്ചീടണം എന്നും അദ്ദേഹം ആരുടെയും പേരെടുത്ത് പറയാതെ വിമർശിച്ചു.
തിരുവനന്തപുരത്തെ ഡിസിസി അധ്യക്ഷ പട്ടികയുമായി ബന്ധപ്പെട്ട വിവാദത്തെ തുടർന്ന് കോൺഗ്രസ് വിട്ട പി എസ് പ്രശാന്ത് ഇന്നലെയാണ് സിപിഎമ്മിനൊപ്പം പ്രവർത്തിക്കാൻ തീരുമാനിച്ചത്. എകെജി സെന്ററിൽ സിപിഎം സംസ്ഥാന സെക്രട്ടറി എ വിജയരാഘവന്റെ സാന്നിധ്യത്തിലാണ് പ്രശാന്ത് പുതിയ രാഷ്ട്രീയ നിലപാട് പ്രഖ്യാപിച്ചത്.
Also Read :
സാധാരണക്കാരുടെ പ്രശ്നങ്ങളിൽ ഇടപെട്ട് മതനിരപേക്ഷത ഉയർത്തിപ്പിടിക്കുന്ന പാർട്ടിയെന്ന നിലയിലാണ് സിപിഎമ്മിൽ ചേർന്ന് പ്രവർത്തിക്കാൻ തീരുമാനിച്ചതെന്നായിരുന്നു പ്രശാന്തിന്റെ വാക്കുകൾ “ജനാധ്യപത്യമില്ലാത്ത രീതിയിൽ കോൺഗ്രസും ഹൈക്കമാൻഡും മാറി. സിപിഎം ഏൽപ്പിക്കുന്ന ഏത് ഉത്തരവാദിത്തവും ആത്മാർഥതയോടെ നിറവേറ്റും” എന്നും അദ്ദേഹം വ്യക്തമാക്കി.
കോൺഗ്രസ് നേതൃത്വത്തിനെതിരെ രൂക്ഷവിമർശനമായിരുന്നു പിഎസ് പ്രശാന്ത് ചടങ്ങിൽ ഉന്നയിച്ചത്. ഹൈക്കമാൻഡിന്റെ പ്രവർത്തനം ജനാധിപത്യമില്ലാത്ത രീതിയിലേക്ക് മാറി. രാഷ്ട്രീയ പ്രവർത്തകന് മനസമാധാനവും സുരക്ഷിതത്വവുമാണ് ആവശ്യം. സിപിഎമ്മിൽ എത്തുന്നത് അതുമാത്രം ആഗ്രഹിച്ചാണ്. സിപിഎമ്മിന് മുന്നിൽ ഒരു ഉപാധിയും വെച്ചിട്ടില്ല. അച്ചടക്കമില്ലാത്ത പാർട്ടിയാണ് കോൺഗ്രസ്. സ്ഥാനാർഥിയായ എനിക്ക് തെരഞ്ഞെടുപ്പ് പ്രചാരണം നടത്താൻ പോലും സാധിക്കാത്ത രീതിയിലാണ് കോൺഗ്രസിനെ അവസ്ഥയെന്നും പ്രശാന്ത് പറഞ്ഞിരുന്നു.
Also Read :
നിയമസഭാ തെരഞ്ഞെടുപ്പിൽ നെടുമങ്ങാട് യുഡിഎഫ് സ്ഥാനാർഥിയായി മത്സരിച്ച് പരാജയപ്പെട്ട പ്രശാന്ത് ഡിസിസി പ്രസിഡന്റ് പാലോട് രവിക്കെതിരെ പരസ്യമായി ആരോപണം ഉന്നയിച്ചിരുന്നു. ഇതിന് പിന്നാലെയായിരുന്നു അദ്ദേഹത്തെ പാർട്ടി സസ്പെൻഡ് ചെയ്തത്. പിന്നീട് എഐസിസി ജനറൽ സെക്രട്ടറി കെ സി വേണുഗോപാലിനെതിരെ ഗുരുതര ആരോപണം ഉന്നയിച്ചതോടെ പ്രശാന്തിനെ പാര്ട്ടിയില് നിന്നു പുറത്താക്കുകയും ചെയ്തിരുന്നു.
