കോഴിക്കോട് : മൂവാറ്റുപുഴ തൃക്കുളത്തൂരിൽ കാറും ലോറിയും കൂട്ടിയിടിച്ചുണ്ടായ അപകടത്തിൽ പൊലിഞ്ഞത് സഹോദരിമാരുടെ നാലു മക്കൾ. പുറപ്പുഴ കുന്നേൽ ബാബുവിന്റെയും രജനിയുടെയും മക്കളായ വിഷ്ണു(25)വും അരുണും(22) മൂക്കിലിക്കാട്ട് രാജേന്ദ്രൻ പിള്ളയുടെയും സജിനിയുടെയും മക്കളായ ആദിത്യ(23)നും അമർനാഥു(20)മാണ് മരിച്ചത്. അമ്മമാരായ രജനിയും സജിനിയും സഹോദരങ്ങളാണ്.
എന്തിനും എവിടേയും ഒരുമിച്ച്
ഇന്നലെ മരിച്ച വിഷ്ണുവിനും അരുണിനും ആദിത്യനുമൊപ്പം അമർനാഥിനേക്കൂടി നഷ്ടമായെന്നത് ഇനിയും ഉൾക്കൊള്ളാനായിട്ടില്ല ബന്ധുക്കൾക്കും നാട്ടുകാർക്കും.സഹോദരങ്ങൾ എന്നതിനപ്പുറത്തേക്ക് അടുത്ത കൂട്ടുകാരായിരുന്നു നാലു പേരുമെന്ന് വിങ്ങലോടെ ഓർക്കുകയാണ് പുറപ്പുഴക്കാർ.
വീടുകൾക്കിടയിൽ അധികം ദൂരമില്ലാത്തതിനാൽ കൂടുതലും ഇവർ ഒന്നിച്ചായിരുന്നു. ഒഴിവുസമയങ്ങളിൽ ഒരുമിച്ചിരുന്നിരുന്ന നാട്ടിലെ ചടങ്ങുകളിൽ ഒരുമിച്ചെത്തിയിരുന്ന കൂട്ടുകാർ. അവസാനത്തെ ഉല്ലാസയാത്രയിൽ മാത്രമല്ല, മരണത്തിലും അവർ കൈ കോർത്തപ്പോൾ നാട്ടിലും വീട്ടിലും ഏത് ആവശ്യത്തിനും ഓടിയെത്തുന്ന നാല് ചുണക്കുട്ടികളെയാണ്ഗ്രാമത്തിന് നഷ്ടമായത്.
അമ്മ രജനി നടത്തുന്ന പലചരക്കുകടയിൽവിഷ്ണുവും അരുണും അധികസമയവും ഉണ്ടാവുമായിരുന്നു. കടയിൽ എത്തുന്ന ആരുംനിറഞ്ഞ ചിരിയോടെയല്ലാതെ ഇവരെ കണ്ടിട്ടില്ല. അതുകൊണ്ടാവാണം ഇരുവരുടേയും ചേതനയറ്റ മൃതദേഹങ്ങൾ ഇന്നലെ വീട്ടിലെത്തിയപ്പോൾ പുറത്തുകൂടി നിന്നവരിലും കണ്ണീർ അണപൊട്ടിയത്.
ചേട്ടന്റെ ചിതയണയും മുമ്പേ അനിയനും
ആദിത്യന്റെ മൃതദേഹത്തിന് ചുറ്റും നിന്നും ഏങ്ങലടിച്ച് കരയുമ്പോളും ആദിത്യന്റെ അച്ഛന്റെ അമ്മയും ഉൾപ്പടെയുള്ളവർ പ്രതീക്ഷിച്ചിരുന്നു അമർനാഥ് ആശുപത്രിയിൽ കിടക്കയിൽനിന്നുജീവനോടെ തിരിച്ചെത്തുമെന്ന്. എന്നാൽ,ആദിത്യന്റെ ചിതയണയും മുമ്പ് കഠാരക്കുഴിലെ വീട്ടിൽ മറ്റൊരു ചിതകൂടി ഒരുങ്ങി. അമർനാഥിന് വേണ്ടി. വീട്ടിലെന്ന പോല ആദിത്യനു സമീപം തന്നെ അമർനാഥും ഉറങ്ങും.
content highlights: four killed in car lorry collission in moovattupuzha
