ബ്രസല്സ്
കോവിഡ് പ്രതിസന്ധി വീണ്ടും രൂക്ഷമാകുന്ന സാഹചര്യത്തില് അമേരിക്കയില്നിന്നുള്ള വിനോദസഞ്ചാരികള്ക്ക് വിലക്ക് പുനഃസ്ഥാപിച്ച് യൂറോപ്യന് യൂണിയന്. 27 അംഗരാജ്യങ്ങളില് കര്ശന നിയന്ത്രണങ്ങളില്ലാതെ യാത്ര ചെയ്യാനാകുന്ന രാജ്യങ്ങളുടെ പട്ടികയില്നിന്ന് അമേരിക്കയെ ഒഴിവാക്കിയതായി ഇയു നയതന്ത്രജ്ഞര് അറിയിച്ചു.
ജൂണിലാണ് യൂറോപ്യന് യൂണിയന് യുഎസ് ഉള്പ്പെടെയുള്ള രാജ്യങ്ങളില്നിന്നുള്ള വിനോദസഞ്ചാരികള്ക്ക് ഒരു വര്ഷത്തിലേറെയായി ഏര്പ്പെടുത്തിയിരുന്ന നിയന്ത്രണം നീക്കിയത്. എന്നാല്, ഇയു അംഗരാജ്യങ്ങള്ക്ക് ഏകീകൃത വിനോദസഞ്ചാര നയങ്ങള് ഇല്ലാത്തതിനാൽ അമേരിക്കന് സഞ്ചാരികളെ സ്വീകരിക്കണോ എന്നത് അതത് രാജ്യങ്ങളുടെ തീരുമാനമാണ്.
● ഫ്രാന്സില് ഹോട്ടല് ജീവനക്കാരുള്പ്പെടെ വിവിധ മേഖലകളിലെ 20 ലക്ഷത്തോളം തൊഴിലാളികള്ക്ക് ആരോഗ്യ പാസ് നിര്ബന്ധമാക്കി. വാക്സിന് സ്വീകരിച്ചതിന്റെ രേഖകളും ഏറ്റവും പുതിയ കോവിഡ് നെഗറ്റീവ് സര്ട്ടിഫിക്കറ്റും ഉള്പ്പെടുത്തിയുള്ളതാണ് പാസ്. രാജ്യത്ത് 64 ശതമാനത്തിലധികം പേര് രണ്ട് ഡോസ് വാക്സിനും സ്വീകരിച്ചിട്ടുണ്ട്. 72 ശതമാനം പേർ ഒരു ഡോസെങ്കിലും എടുത്തിട്ടുണ്ട്.
●12 വയസ്സിനു മുകളിലുള്ള എല്ലാവര്ക്കും വാക്സിന്റെ ബൂസ്റ്റര് ഡോസ് നല്കുമെന്നും വാക്സിന് സ്വീകരിക്കാന് വിസമ്മതിക്കുന്നവരുടെ ഗ്രീന്പാസ് റദ്ദാക്കുമെന്നും ഇസ്രയേല് അറിയിച്ചു. ഇസ്രയേലില് വീണ്ടും കോവിഡ് വ്യാപനം രൂക്ഷമാകുന്ന സാഹചര്യത്തിലാണ് നിര്ദേശം. 20 ശതമാനത്തോളം പേർക്ക് മൂന്നാം ഡോസ് നൽകിക്കഴിഞ്ഞു.
● രോഗപ്രതിരോധശേഷി കുറവുള്ളവർ മൂന്നാമത്തെ ഡോസ് സ്വീകരിക്കണമെന്ന് ഡാനിഷ് സര്ക്കാര് നിര്ദേശിച്ചു.
● ബൂസ്റ്റര് ഡോസ് ആഡംബരമായി കാണരുതെന്നും കൂടുതല് പ്രതിരോധശേഷി ഉണ്ടാക്കാൻ അത് സഹായിക്കുമെന്നും ഡബ്ലയുഎച്ച്ഒ റീജണൽ ഡയറക്ടർ ഡോ. ഹാൻസ് ക്ലൂഗ് പറഞ്ഞു.
● അമേരിക്കയിൽ മാസ്ക് ധരിക്കാതെ ക്ലാസെടുത്ത അധ്യാപികയിൽനിന്ന് 26 പേർക്ക് കോവിഡ് ബാധിച്ചു. ക്ലാസ് മുറിയിലെ 18 കുട്ടികൾക്കും ചില രക്ഷിതാക്കള്ക്കുമാണ് രോഗം ബാധിച്ചത്.
● കോവിഡ് റിപ്പോര്ട്ട് ചെയ്തതിനുശേഷം ആദ്യമായി ഇന്തോനേഷ്യയില് സ്കൂളുകള് തുറന്നു. 610 സ്കൂളാണ് തുറന്നത്.
